Форум «Алания Медиа-2018» у ахуырадон проект, кæцы комкоммæ дæр здæхт у Цæгат Кавказы Федералон змæлды æвзонг курдиатджын фæсивæды фарс балæууынмæ. Йæ сæйраг хæс у курдиатджындæр æмæ æвзонгдæр журналисттæн сæ профессионалон æмвæзад æмæ сæ патриотикон хъомылад фæбæрзонддæр кæнын. Афтæ ма форумы хъомыладон программæйы раз ис æхсæннацион ахастытæ æрбиноныг кæнын æмæ иумиаг информацион тыгъдад райрæзын кæныныл бакусыны хæс. Йæ организатортæ ма хъавынц Цæгат Кавказы Федералон змæлды æвзонг журналистты профессионалон æхсæнад саразын. Форум уагъд цæуы Фæсивæды хъуыддæгты фæдыл федералон агентады хъæппæрисæй йæ информацион партнертæ сты ИТАР-ТАСС, «ГТРК «Алания», газет «Слово», НТК « Осетия-Ирыстон».
– Хуссар Ирыстоны дзыллон информацион фæрæзты минæвæрттæй дæр цалдæрæй хайад райсдзысты ацы форумы куысты. Форум цæудзæн Цæгат Ирыстоны Паддзахадон Университеты 20-23 ноябры. Ацы форумы хайадист фæахъаз уыдзæн нæ республикæйы æвзонг журналисттæн сæ профессионалон арæхстдзинад фæбæрзонддæр кæнынæн, афтæ ма уыдон базонгæ уыдзысты ногдзинæдтимæ, кæцытæ сын фæахъаз уыдзысты сæ куысты. Фадат сын уыдзæн Цæгат Ирыстоны æмæ Кавказы æндæр республикæты дзыллон информацион фæрæзты минæвæрттимæ базонгæ уæвынæн.
Махæн нæ цæгаттаг коллегæтимæ ис тынг æнгом ахастытæ. Не ‘мгуыстады фæрцы, мах ацы форуммæ æрвитæм нæ республикæйы паддзахадон газетæ «Южная Осетия» æмæ информацион агентад «Рес»-ы уацхæсджыты.
Нæ республикæйы масс-медиа йы системæйы ис тынг цъус æвзонг кадртæ æмæ ахæм æмвæзадыл мадзæлтты хайадист у тынг ахъаз нæ республикæйы фæсивæдæн. Кæй зæгъын æй хъæуы, хъуамæ куысты фадат дæттæм фæсивæдæн. Ацы форум уагъд цæуы æртыккаг хатт. Раздæр дзы хайад райстой Цæгат Каваказы Федералон змæлды республикæты æвзонг журналисттæ. Ацы аз форумы хайад райсыны тыххæй куырдиæттæ балæвæрдтой Цæгат Кавказы 160 курдиатджындæр авторы, 18 азæй 30 азы онг кæуыл цæуы, ахæмтæ. Форумы темæ та у «Молодой Кавказ. Стирая иформационные границы». Æртæ боны дæргъы форумы хайадисджытæн æмæ уазджытæн уагъд цæудзысты лекцитæ æмæ мастер-къластæ цыппар здæхты: тележурналистикæ, радиожурналистикæ, фотожурналистикæ, мыхуыр æмæ интернеты фæдыл, – банысан кодта Информаци æмæ мыхуыры паддзахадон комитеты сæрдары хæдивæг Харебаты Майæ.
Мастер-къластæ уадздзысты М.В. Ломоносовы номыл Мæскуыйы Паддзахадон Университеты журналистикæйы факультеты нырыккон медиа æмæ коммуникациты теорийы кафедрæйы сæргълæууæг Иван Засурский, Уæрæсейы журналистты цæдисы нымæрдар Юлия Загитова, радио æмæ телеуынынады амонæг Игорь Гмывза, Дунеон академийы регионалон райрæзты телеуынынад æмæ радиойы алæвæрдты вице-президент Кипрас Мажейка æмæ æндæртæ. Афтæ ма форумы фæлгæтты уагъд æрцæудзæн æвзонг журналисттæн конкурс «Молодой Кавказ». Ацы конкурсы йæ бон у хайад райсой 2017 азы фыццæгæм январæй 2018 азы фыццæгæм октябрмæ информацион фæрæзты ныммыхуыргонд æрмæджыты автортæ. Æрмæджытæн аргъ кæндзысты равзæрстгонд жюри, кæцыйы сконды сты зынгæ журналисттæ, Цæгат Ирыстоны Журналистты цæдисы минæвæрттæ, зонадон архайджытæ, Цæгат Кавказы дзыллон информацион фæрæзты ассоциацийы минæвæрттæ. Конкурсы фæуæлахиздзауты нæмттæ бæлвырд æрцæудзысты форумы фæстаг боны. Ацы мадзалы организатортæ сты регионалон æхсæнадон фæсивæдон организации «Ассоциация молодых журналистов Алании», æмæ Цæгат Ирыстоны мыхуыры комитет, Республикæйы журналистты цæдис, фæсивæдон комитет, курдиатджын сывæллæтæ æмæ фæсивæ-дæн æххуысы фонд «Национальное достояние».
Нæ уацх.
Comments are closed, but trackbacks and pingbacks are open.