Хуссар Ирыстонæй делегаци хайад райста уæрæсейаг æмфыдыбæстæйонтæ æмæ уырыссаг æвзагыл фæсарæйнаг дзыллон информацийы фæрæзтæ «Русское зарубежье»-йы фæсивæдон баиугæндты IX Петербургаг форумы.

Хуссарирыстойнаг делегацийы сконды уыдысты РХИ-йы Культурæйы министрады пресс-секретарь, уæрæсейаг æмбæстæгты цæдисы активон уæнг Остъаты Мадинæ æмæ координацион советы уæнг, Зонад æмæ культурæйы Уæрæсейаг центры уырыссаг æвзаджы курсыты ахуыргæнæг Диана Свиткова. ИА «Рес»-æн Остъаты Мадинæ куыд фехъусын кодта, афтæмæй форумы куысты делегацийы хайадист гæнæнуæвæн ссис Хуссар Ирыстоны Уæрæсейы Федерацийы минæварады руаджы.

«Форумы куысты хайад райстой 37 бæстæйæ 77 æмфыдыбæстæйоны. Уыдоны ‘хсæн уыдысты æхсæнадон организациты къухдариуæггæнджытæ æмæ уæнгтæ, кæцытæ кусынц фæсарæнты уырыссаг æвзагыл дзурæг фæсивæды ‘хсæн историон мысынадæн æххуыс кæныныл, æмфыдыбæстæйонтæ æмæ бынæттон цæрджытæн культурон-рухсадон мадзæлттæ реализаци кæныныл, удварнон бастдзинæдтæ рæзын кæныныл», — загъта уый.

Остъаты чызджы ныхæстæм гæсгæ форум цытджын æгъдауæй байгом кæныны церемони уагъд æрцыдис 2016 азы 6 июны Смольныйы Лепы залы.

«Санкт-Петербурджы хицауады номæй æмфыдыбæстæйонтæн раарфæ кодта Санкт-Петербурджы æддагон бастдзинæдты фæдыл комитеты сæрдары хæдивæг Сергей Марков. Уый банысан кодта петербургаг фæсивæдон форум «Русское зарубежье»-йы Петербурджы æддагон бастдзинæдты фæдыл комитеты традицион проекты уникалондзинад, кæцы здæхт у практикон æгъдауæй пайда кæнынмæ», — йæ ныхасмæ бафтыдта уый.

Форумы адресыл ма арфæйы ныхæстæ загътой секциты къухдариуæггæнджытæ —  А. Герцены номыл Уæрæсейаг паддзахадон педагогон университеты аивадон ахуырады æмæ декоративон аивады кафедрæйы доцент, аивадзонынæдты кандидат Елена Соколова, профессор, компаниты къорд «Омега»-йы ахуырады департаменты къухдариуæггæнæг, педагогон зонæдты доктор Владимир Литвиненко. Форумы хайадисджыты раз ма раныхас кодта Герцены номыл Уæрæсейаг паддзахадон педагогон университеты философон антропологи æмæ æхсæнадон коммуникациты кафедрæйы сæргълæууæг Кира Преображенская.

«Ахуырадон программæ конд уыд æртæ секцийæ: «Аивадзонынад», «Лидердзинад» æмæ «Дзыллон информацийы фæрæзтæ». Цыппар боны дæргъы æмфыдыбæстæйонтæ хъуыстой лекцитæм, цыдысты практикæйы, æмбæлдысты Петербурджы фæсивæдон змæлдтыты лидертимæ, афтæ ма дидинджытæ сæвæрдтой Пискаревскы мемориалон уæлмæрды монументыл, — радзырдта Остъаты Мадинæ. — Программæйы официалон хай куы фæцис, уæд æмфыдыбæстæйонтæ хайад райстой интерактивон ахуырты «Зонгæдзинады бон», зæгъгæ,  кæцыйы æппæт 37 делегацийы минæвæрттæ радзырдтой сæхи æмæ, цы организациты архайынц, уыдоны тыххæй».

Остъаты чызг ма фехъусын кодта, зæгъгæ,  форумы фыццаг бон Петропавловскы фидары ауагъд æрцыдысты фыццаг ерыстæ городошон спортæй уæрæсейаг æмфыдыбæстæйонты ‘хсæн. Ерыстæ уагъд æрцыдысты Санкт-Петербурджы æхсæнадон организацитæй сæ иуы æххуысæй.

«18 командæйы тох кодтой городошон спорты хуыздæр фæстиуджытæ равдисыныл, куыд командæтæй, афтæ иугæйттæй дæр. Алы командæйы скондмæ дæр бацыдысты Санкт-Петербурджы губернаторы цур Санкт-Петербурджы Фæсивæдон коллегийы минæвæрттæ. Ерысты æппæт хайадисджытæ æмæ фæуæлахизуæвджытæ райстой зæрдылдарæн лæвæрттæ Санкт-Петербурджы æддагон бастдзинæдты фæдыл комитетæй æмæ Санкт-Петербурджы городошон спорты федерацийæ», — загъта Остъаты Мадинæ.

Форум æхгæд æрцыд 10 июны Санкт-Петербурджы Культурæйы паддзахадон институты Урс залы, цыран равдыстæуыд, форумы хайадисджытæ кæй бакуыстой, уыцы проект «Араз фидæн», зæгъгæ.

«Афтæ ма форумы хайадисджытæ равдыстой сæ арæхстдзинад зарынæй, æххæст кодтой авторон зарджытæ, афтæ ма зындгонд зарджытæ дæр. Мадзалы кæронбæттæны форумы æппæт хайадисджытæн лæвæрд æрцыдысты сертификаттæ æмæ зæрдылдарæн лæвæрттæ», — банысан кодта Остъаты чызг.

Петербургаг форум 2008 азы йæ сырæзтæй фæстæмæ æххуыс кæны æрыгон фæсарæйнаг æмфыдыбæстæйонтæн, цæмæй бастдзинæдтæ фи-дардæр кæной сæ фыдæлты райгуырæн бæстæимæ, уынаффæ кæной культурон иудзинад бахъахъхъæныны проблемæтыл, бæрзонддæр кæной сæ профессионалон æмвæзад.

Форум уагъд æрцыд Санкт-Петербурджы хицауады Уæрæсейы Федерацийы паддзахадон политикæ фæсарæнты уæрæсейаг æмфыдыбæстæйонтæм ахасты реализаци кæныны фæлгæтты 5 июнæй 11 июнмæ. Йæ ауадзынæн баххуыс кодтой Петербурджы æддагон бастдзинæдты фæдыл комитет æмæ Санкт-Петербурджы Уæрæсейы Федера-цийы Фæсарæйнаг хъуыддæгты министрад.

Comments are closed, but trackbacks and pingbacks are open.