250 азы сæххæст зынгæ уырыссаг фыссæг Иван Крыловы райгуырдыл. Уырыссаг литературæмæ Крылов сæйраджыдæр бацыд, куыд гениалон баснифыссæг, афтæ. Йе ‘мдзæвгæты рæнхъытæй бирæтæ систы æмбисæндты хуызæн æмæ сæ абон дæр адæм пайда кæнынц. Уый уыд уырыссаг царды æцæг культурон фæзынд. Фыссæджы юбилейон райгуырæн боны цытæн нæ республикæйы уагъд æрцыдысты æмæ нырма дæр уагъд цæуынц алыгъуызон мадзæлттæ.

Иу ахæм мадзал, фыссæджы баснитæ хуыздæр кæсынæй конкурс уагъд æрцыд нæ горæты 5-æм астæуккаг скъолайы. Сорганизаци йæ кодта зонад æмæ культурæйы уæрæсейаг центр «Россотрудничество» Сергей Скворцовы сæргълæудæй. Мадзалы хайад райстой нæ рес-публикæйы скъолаты ахуыргæнинæгтæ – горæт Цхинвалы, Хуыцъе, Знауыр, Дзауы æмæ Гуфтайы скъолаты ахуыргæнинæгтæ. Уыдон дих уыдысты 7-12 азты æмæ 13-17 азты гуырд къордтыл.

Конкурсы хайад райстой Ленингоры районы Хуриты Гивийы номыл Цъинагары астæуккаг скъолайы дыууæ ахуырдзауы дæр. 7-æм къласы ахуыргæнинаг Хуыбылты Аннæ тынг хорз бакаст Крыловы «Волк и ягненок»-ы æмæ 6-æм къласы ахуырдзау Уазæгты Дианæ та бакаст «Свинья под дубом». Цъинагайраг сывæллæтты курдиат æмæ арæхст-дзинад тынг фæцыд конкурсы организаторты зæрдæмæ. Сæрмагондæй сын раарфæ кодта «Россотрудничество»-йы къухдариуæггæнæг Сергей Скворцов, загъта сын, райгондæй сæ кæй баззад, уый тыххæй. Хуыбылты Аннæ конкурсы бацахста 3-æм бынат æмæ хорзæхджын æрцыд дипломæй, зæрдылдарынæн ын балæвар кодтой чиныг дæр. Уазæгты Дианæ та хорзæхджын æрцыд грамотæйæ, балæвар ын кодтой чиныг дæр. Скъоладзауты мадзалмæ бацæттæ кодта Цъинагары астæуккаг скъолайы уырыссаг æвзаг æмæ литературæйы ахуыргæнæг Хуыбылты Дианæ.

Фыццаг бынат бацахста Зассеты Максим, кæцы ралæууыд музыкалон номыримæ дæр. Мадзалы иумиагæй хайад райстой 80 ахуыргæнинаджы бæрц. Сергей Скворцов куыд банысан кодта, уымæ гæсгæ уæрæсейаг центр дарддæр дæр план кæны алыгъуызон конкурстæ уадзын уырыссаг æвзаг æмæ культурæ попу-ляризаци кæныны нысанæн. Уый ма куыд загъта, афтæмæй райгондæй баззад районты скъолаты ахуырдзауты ралæудтытæй, уымæн æмæ, зæгъ, тынг хорз бакастысты сæ уацмыстæ æмæ хорз зыдтой уырыссаг æвзаг. Мадзалы кæрон 6-æм астæуккаг скъолайы хъомылгæнинæгтæ сæ уаз-джытæн равдыстой музыкалон-театралон сценкæтæ Крыловы баснитæй.

              ХУЫБЫЛТЫ Ленæ

Ацы æрмæджытæ дæр бакæс:

Default ThumbnailНæ мыггæгты растфыссынад æмæ хæдгъуыз æууæлтæ    Литературон изæр «Сывæллæтты чингуыты къуыри»-йы сæраппонд Хъахъхъæнынады министрад фыццаг майдан радта Хуыбылты Валерийы бинонтæм Хуссар Ирыстоны рагондæр скъола Уырыссаг æвзаджы бон – Пушкины цырты цур

Comments are closed, but trackbacks and pingbacks are open.