Сывæллæтты республикон библиотекæйы уагъд æрцыд рæсугъд, цымыдисон мадзал. Уагдоны кусджытæ йæм фæхуыдтой нæ горæты скъола-интернаты 4-æм къласы æмæ «Альбион»-ы 5-æм къласы ахуыргæнинæгты. Уыдон иумæ цытджын æгъдауæй банысан кодтой «Сывæллæтты чингуыты къуырийы» бæрæгбон, кæцы баст уыд зынгæ уырыссаг фыссæг Крыловы баснитимæ. Скъола-интернаты   ахуырдзауты бацæттæ кодтой сæ ахуыргæнæг Уанеты Альбинæ,  хъомылгæнджытæ Гаглойты Аринæ æмæ Цоциты Фатимæ.«Альбион»-ы ахуырдзауты та – сæ къласгæс Тедеты Залинæ æмæ аивадон къухдариуæггæнæг Чохели Натия.

Мадзалмæ æрбацыдысты РХИ-йы Уæрæсейы дипломатон миссийы цур зонад æмæ культурæйы центры кусджытæ, Культурæйы министрады библиотекæты куысты фæ-дыл сæйраг специалист Дриаты Нателæ, сывæллæтты ныййарджытæ.

Литературон изæр гом кæнгæйæ, Сывæллæтты республикон библиотекæйы директор Джиоты Аллæ загъта, зæгъгæ мах абон нысан кæнæм ахæм бæрæгбон, кæцыйы фæнысан кæнынц æрмæстдæр сывæллæтты библиотекæтæ.

Бæрæгбонон изæр амыдта библиотекæйы кусæг Мæргъиты Маринæ. Уый цыбыртæй æрдзырдта ацы бæрæгбоны историйы тыххæй. Йæ ныхæстæм гæсгæ æрвылаз дæр, куыддæр уалдзыгон каникултæ райдайынц, афтæ Уæрæсейы æппæт сывæллæттæ фæнысан кæнынц «Сывæллæтты чингуыты къуыри»-йы бæрæгбон. Сывæллæтты чингуыты диссаджы бæрæгбон махмæ æрцыд дард хæстон 1943 азæй.

Хæст уыд карз æмæ тæссаг. Сывæллæттæ сæ сабибонтæ æрвыстой хæстон уавæрты. 1943 азы марты, хæсты тæккæ тæмæны хистæр кары адæм аскъуыддзаг кодтой сывæллæтты зæрдæтæ иу чысыл уæддæр бахъæлдзæг кæнын, уыдонæн бæрæгбон саразын, цæмæй сæ иу бон уæддæр фæиппæрд кæной хæсты тæссагдзинадæй. Фыссæг Лев Кассиль фæндон бахаста сывæллæтты чингуыты бæрæгбон ауадзыны тыххæй. Æмæ 23 марты Мæскуыйы Кремлы залмæ æрбацыдысты æрдæгæххормаг, мæгуырконд сывæллæттæ, фæлæ сæ цæстытæ æрттывтой цымыдисдзинад æмæ циндзинадæй. Ам сæм æнхъæлмæ кастысты сæ уарзон чингуыты фысджытæ. Бæрæгбоны хайадисджытæ аскъуыддзаг кодтой æрвылаз дæр уалдзыгон каникулты рæстæджы «Сывæллæтты чингуыты къуыри»-йы бæрæгбон  нысан кæнын æрмæст Мæскуыйы нæ, фæлæ æнæхъæн бæстæйы. Афтæ фæзынд «Сывæллæтты чингуыты къуыри»-йы  бæрæгбон».

Скъола-интернаты ахуыргæнинæгтæ бацæттæ кодтой  театрализацион мадзал «Бессмертные творения Крылова», зæгъгæ. Уыдон æрдзырдтой зынгæ уырыссаг фыссæг Крыловы цардвæндаг æмæ сфæлдыстады тыххæй. Банысан кодтой, зæгъгæ, сæ Крыловы куырыхон баснитæ  ахуыр кæнынц раст, хæларзæрдæ, цæсгомджын, куыстуарзаг уæвыныл. Æдæппæтæй Крылов ныффыста 205 баснийы. Александр Пушкин Крыловы басниты ардта  адæмы хицæн миниуджытæ. Скъола-интернаты сывæллæттæ равдыстой инсценировкæтæ фыссæджы баснитæй, куыд, зæгъæм, «Свинья под дубом», «Ворона и лиса», «Квартет», «Кукушка и петух», «Мартышка и очки», «Зеркало и обезьяна». Бакастысты баснитæ «Петух и жемчужное зерно», «Лиса и виноград».

Крыловы баснитæ тæлмац æрцыдысты дунейы 60 æвзагмæ. Стыр ирон фыссæг, ирон литературæйы бындурæвæрæг Хетæгкаты Къоста ратæлмац кодта фыссæджы цалдæр баснийы, уыцы нымæцы «Волк и журавль» æмæ «Ворона и лиса». Скъола «Альбион»-ы сывæллæттæ  ирон æзагыл равдыстой сценкæтæ ацы дыууæ уацмысмæ гæсгæ.

Мадзалы кæронбæттæны Джиоты Аллæ банысан кодта, зæгъгæ, «Сывæллæтты чингуыты къуыри»-йы бæрæгбон фæуыдзæн 2-æм апрелы Сывæллæтты чиныджы дунеон бонæй. Уыцы бон у Х. Андерсены райгуырæн бон æмæ сы-вæллæтты чиныджы дунеон советы инициативæмæ гæсгæ нысан цæуы 1967 азы 2 апрелæй фæстæмæ.  Фæлæ, зæгъ, уый афтæ нæ нысан кæны, æмæ уый фæстæ ахуырдзауатæ библиотекæмæ нал цæудзысты. Мах сæм æрвылбон дæр æнхъæлмæ кæсæм, нæ сын хæлæг кæнæм нæ хъусдард æмæ уарзондзинад. Мах, зæгъ, сæ фæцайдагъ кодтам чиныг кæсыныл æмæ нæм уыдон дæр зæрдæрайæ цæуынц.

Мадзалы кæрон Джиоты Аллæ литературон изæры æвзонг хайадисджытæн   балæвар кодта зæр-дылдарæн лæвæрттæ.

ДЖИОТЫ Екатеринæ

Comments are closed, but trackbacks and pingbacks are open.