Хуссар Ирыстоны æвзонг адæймæгты иу къорд хайад исы Æппæтуæрæсейон фæсивæдон ахуырадон форум «Таврида-2019»-ы, æрдæгсакъадах Хъырымы. Уый тыххæй хъусын кæны республикæйы Фæсивæдон политикæ, спорт æмæ туризмы фæдыл комитеты пресс-службæ.
Ныртæккæ форумы кусы æстæм «Адæмон сменæ». Уыцы сменæйы хайадисджытæ систы музыканттæ, вокалисттæ, хореографтæ, кæцытæ æвдисынц аутентон адæмон аивады индустри. Форумы рæстæджы æвзонг адæймæгтæ хайад исдзысты зынгæ специалистты мастер-къласты, тренингты æмæ лекциты. Хуссарирыстойнаг делегацийы сконды сты Абайты Алинæ, Къуылыхты Аннæ, Маруан Аль-Дбейси, Елбачиты Дианæ, Гаглойты Эдгар æмæ Гæджиты Арсен. Сæ тренингты программæйы сты вокалон, хореографон æмæ инструменталон скъолаты æмæ адæмон театры скъолайы традицитæ.
Ноджы ма дзы ис дыууæ сменæ, кæцытæм ацæудзысты форум «Репсмена» (музыканттæ, вокалисттæ, sound-продюсертæ, поэттæ, хореографтæ, битмейкертæ, æнæжанрон æрмæджыты сæрмагонд автортæ æмæ æххæстгæнджытæ) æмæ «Видеоконти-нент»-ы (продюсертæ, режиссертæ, вайнертæ, клипмейкертæ, нывгæнæг-аниматортæ, интервьюертæ, интернет-сериалты æмæ цыбырметражон фильмты актертæ æмæ автортæ, motion-дизайнертæ) хуссарирыстойнаг хайадисджытæ.
Уымæй уæлдай ма, Фæсивæдон политикæ, спорт æмæ туризмы фæдыл комитеты пресс-службæйы информацимæ гæсгæ, ацы аз республикæйы алы æвзонг адæймагæн дæр фадат ис æндæр фæсивæдон ахуырадон форумтæ бабæрæг кæнынæн: Æппæтуæрæсейон форум «Балтийский Артек» æмæ Дунеон фæсивæдон ахуырадон форум «Евразия»-йы. Хайад райсын кæй фæнды, уыдонæн сæ бон у бахатой комитетмæ ахæм адресыл: Ирæтты уынг, №1 кæнæ та фæдзура ахæм телефонмæ: 8-929-811-64-54.
Comments are closed, but trackbacks and pingbacks are open.