Хæххон Къарабахы уавæрæн ис политикон æгъдауæй аскъуыддзаг кæнæн

УФ-йы Фæсарæйнаг хъуыддæгты министр Сергей Лавров фехъусын кодта, зæгъгæ, Хæххон Къарабахы вазыгджын уавæр гæнæн ис политикон æгъдауæй æрбæстон кæнын, фæлæ хъуамæ æххæст цæуой ныридæгæн къухы бафтгæ бадзырдтæ. «ЕÆÆО-йы Минскы къорды æмсæрдæрттæ цы фæндæттыл бакуыстой æмæ дарддæр дæр кусынц, уыдон сты бадзырдты стъолыл. Сæ мидис ныридæгæн бæрæг у», – банысан кодта уый.

Йæ ныхæстæм гæсгæ, фыццаг рады æнæмæнгхъæуæг у цадæггай, цалдæр этапæй Къарабахы алыварс районтæ ссæрибар кæнын, регионы æмæ йæ цæрджыты æдасдзинады гарантитæ хъахъхъæнгæйæ. Дыккаг, ахсджиаг у Сомихстон æмæ Къарабахы ‘хсæн æууæнкджын бастдзинад сифтонг кæнын, цалынмæ регионы кæройнаг статус бæрæг æрцæуа, уæдмæ.

Министры ныфс ис, зæгъгæ, фæстаг бонты трагикон цауты фæстæ сабырадон процесс фæактивондæр уыдзæн.

Сергей Лавровы ныхæстæм гæсгæ Къарабахмæ уæрæсейаг æфсæддон цæстдарджыты арвитын Уæрæсе нымайы растыл, фæлæ кæройнаг уынаффæ хъуамæ райсой Баку æмæ Ереван. Бадзырдтæм гæсгæ, кæцытыл уынаффæ кодтой уый размæ Хæххон Къарабахы конфликт æрбæстон кæныны тыххæй, регионмæ фæнд кодтой фидауынгæджыты бакæнын, фæлæ ныр фаг уыдзæн уырдæм æфсæддон цæстдарджыты бакæнын.

Сомихстоны фæсарæйнаг хъуыддæгты министр Мнацаканян фехъусын кодта Кавказы Туркы «агрессийы экспорты» тыххæй. «Абон цы цæуы, уый, кæй зæгъын æй хъæуы, стыр цæф у сабырадон процессæн. Фæлæ æз хъуыды кæнын, зæгъгæ, махмæ ис тыхтæ æмæ дунеон æмæхсæнады фаг фарсхæцынад, цæмæй домæм уавæр сабырадон æгъдауæй аскъуыддзаг кæныны тыххæй».

Сомихстоны премьер-министр Никол Пашинян банысан кодта, зæгъгæ, «21-æм æнусы хæст йæ масштабтæм гæсгæ у æнæпрецедентон. Уымæн æмæ дзы архайынц хæцæнгæрзты æппæт хуызтæ: танкæтæ, æнæпилотонтæ, хæдтæхджытæ æмæ вертолеттæ, бронетехникæ, ар-тиллери, ракетон артиллери æмæ афтæ дарддæр. Тынг бирæ салдаттæ æмæ æфсæдтæ хайад исынц ацы хæстон архайдтыты. Ома, уагъд цæуынц стыр масштабон æмæ æгъатыр хæстытæ. Ныртæккæ Хæххон Къарабахы хихъахъхъæнынады æфсадæн йæ бон у республикæйы бахъахъхъæнын. Фактон æгъдауæй гæнæн ис зæгъæн, зæгъгæ, уайтагъд Хæххон Къарабахы сæ контролы бынмæ райсыны тыххæй Турк æмæ Азербайджаны плæнттæ фæсыкк сты.

Æнæхъæн дуне дзуры, зæгъгæ, Азербайджанæн æххуыс кæнынц фæсарæйнаг хæстонтæ æмæ террористтæ. Ис конкретон бæлвырдгæнæнтæ, Сирийæ боевиктæ-террористтæ хайад кæй исынц Хæххон Къарабахы ныхмæ тохты. Афтæ ма Азербайджанæн стыр æххуыс кæнынц туркаг æфсæдтæ. Иуæй-иу информацимæ гæсгæ ма сын æххуыс кæны Пакистан дæр. Уæлдай хъусдард аздахын хъæуы, ацы процессы Туркæн цы нысæнттæ ис, уыдонмæ. Уырны мæ, 20-æм æнусы райдианы зынгæ цауты фæстæ Турк кæй фæнд кæны Хуссар Кавказмæ æрбаздæхынмæ, цæмæй адарддæр кæна Хуссар Кавказы сомихæгты геноциды политикæ. Уый тынг ахсджиаг у, Туркæн уый у прагматикон нысан. Хуссар Кавказы сомихæгтæ сты Туркы фæстаг барьер, цæгат, хурскæсæн, хуссар-скæсæны экспансийы тыххæй, уый у Турчы империон политикæ. Туркы фæнды æнæхъæн Хуссар Кавказы йæ контролы бынмæ райсын. Ныртæккæ Хуссар Кавказы цы цæуы, уымæ кæсын хъæуы уыцы политикæйы контексты, кæцы Турк уадзы Астæузæххон денджызы, Сирийы, Иракы, Греци æмæ Кипры ахасты. Ныртæккæ Хæххон Къарабахы цы цæуы, уый рахызт хæххонкъарабахон локалон конфликты фæлгæттæй. Æвæстиатæй дунеон æмæхсæнад мадзæлттæ куынæ райса, уæд тагъд рæстæджы туркæгты фендзысты Венæйы къулдуæртты цур, 17-æм æнусы куыд уыд, афтæ.

Æз хъуыды кæнын афтæ, æмæ ахæм уавæры конкретонæй æвнæлдæуы бирæ бæстæты национ æдасдзинады интерестæм, фыццаг рады, Уæрæсейы Федерацийы интерестæм. Уыимæ Цæцæны æмæ Дагъыстаны æнæнхъæлæджы нæ фæзындысты сирийаг боевиктæ. Фарст ис уый мидæг æмæ фæнд кæнынц Цæгат Кавказы уавæр сызмæнтынмæ, цæмæй Уæрæсейы хъусдард аздахой Хуссар Кавказы цæуæг цаутæй. Уый у ахсджиаг нюанс, кæцыйæн хъуамæ саргъ кæна Уæрæсе», – загъта Никол Пашинян.