Хæларзæрдæдзинад æмæ æгъдаудзинады бæрæгбон

Бæлас талайæ кæй тасы, уый æмбаргæйæ, нæ горæты 6-æм астæуккаг скъолайы ахуыргæнджытæ ахуыры æмрæнхъ сæ хъомылгæнинæгтимæ кæнынц хъомыладон æмæ æмбарынгæнæн куыст дæр алыгъуызон мадзæлтты фæрцы. Арæх ауадзынц уæлæмхас мадзæлттæ хæрзæгъдаудзинадыл сæ ахуыр æмæ хъомыл кæныны тыххæй.

Ацы бонты 6-æм астæуккаг скъолайы уагъд æрцыд хæларзæрдæдзинад æмæ æгъдаудзинады бæрæгбон. Сорганизаци йæ кодта ацы скъолайы директор, 2-æм  къласы ахуыргæнæг Людмила Александрова  йæ ахуырдзаутимæ. Мадзалмæ æрбацыдысты РХИ-йы Ахуырад æмæ зонады министрад æмæ горæт Цхинвалы администрацийы ахуырады управленийы минæвæрттæ  Гаглойты Элиса æмæ Лолаты Жаннæйы сæргълæудæй, сывæллæтты ныййарджытæ æмæ æндæр уазджытæ.

Мадзалы райдианы залы    хъуыстысты зарæг «Дорогою добра»-йы  зæлтæ. Сценæйыл ралæууыдысты ахуыргæнинæгтæ сæ ахуыргæнæгимæ. Александрова Людмила банысан кодта: «Ивгъуыд аз мах балцы уыдыстæм Дамгъуаты бæстæйы. Абон та уæ хонæм ног, ноджы цымыдисондæр балцы. Хъыгагæн, абон махæн нал фаг кæнынц хуымæтæджы адæймагон миниуджытæ: хæларзæрдæдзинад, быхсындзинад, хæрзаудындзинад. Нæ нын фаг кæны кæрæдзиимæ хæларзæрдæйæ ныхас кæнын, фаг  хъусдард не здахæм кæрæ-дзимæ. Мах балцы ацæудзыстæм æгъдаудзинады галуанмæ, культурæйы горæтмæ, аргъæутты æрдузмæ.

 Сывæллæттæ сбадут æмæ радарут уæ галиу къухтæ, уæ цæстытæ сæхгæнут, афтæмæй. Мæ къухты ис чысыл чырын, цы-ран ис хæларзæрдæдзинады кæлæнгæнæг гагатæ. Алкæмæн дæр уæ ратдзынæн фæйнæ гагайы. Ныр уæ тымбыл къухтæ сæвæрут уæ зæрдæтыл. Банкъарут, хæларзæрдæдзинад уæ зæрдæтæм куыд цæуы, уый. Уадз, æмæ хæларзæрдæдзинад рæзæд уæ удты, уæ зæрдæты. Фæлæ ма ферох кæнут иу тынг ахсджиаг уавæры тыххæй – хæларзæрдæдзинад рæзы æрмæстдæр уæд, кæд æмæ ныхæстæй нæ, фæлæ хъуыддагæй аразат хорз хъуыддæгтæ. Ахъуыды кæнут æмæ зæ-гъут, сымах уæхи нымайут хæ-ларзæрдæ адæймæгтыл?», – дзырдта ахуыргæнæг. Сывæл-лæттæ азарыдысты зарджытæ «Фунтик про доброту», «Доброта – это свет и тепло ваших глаз…», «В этом мире огромном, в котором живем я и ты…», «Если добрый ты…», «Не дразните собак». Сæххæст кодтой кæфтытæ «Сделай доброе дело», «Что такое доброта» æмæ æндæртæ. Бакастысты хæларзæрдæдзинадыл фыст æмдзæвгæтæ.

Уый фæстæ сывæллæттæ балцы уыдысты Культурæйы горæты. Цæвиттон, лæппу схызт автобусмæ, сбадт рудзынггæрон æмæ каст уынгмæ. Уыцы рæстæджы автобусмæ схызт сылгоймаг чысыл сывæллонимæ. Павлик сыстад æмæ загъта: «Табуафси, сбад». Сылгоймаг арфæ ракодта Павликæн. Иу хатт уынджы фæцæйцыд зæронд лæг, кæцы тых-хæйты иста йæ къæхтæ. Йæ ныхмæ йæ къухтæтилгæ ралыгъд лæппу æмæ æнæнхъæлæджы бацавта зæронд лæджы. Уый смæсты, фæлæ йæм лæппу раздæхт æмæ дзы хатыр ракуырдта. Зæронд лæгæн уайтагъд йæ цæсгом ныррухс.

Сывæллæттæ ма балцы уыдысты Адæмон куырыхондзинады галуаны дæр. Бакастысты ахæм фильммæ, цыран иу хорз ми йæ фæстæ расайдта бирæ æндæр хорздзинæдтæ.

Ахуыргæнæг: «Баззад ма нын хæларзæрдæдзинады бæлас сырæзын кæнын. Сымахæй алкæмæй дæр курæг уыдтæн, цæмæй сыфтыл ныффыссат хорз хъуыддæгтæ æмæ сæ бабæттат бæласыл». Сывæллæттæн сæ фылдæр ныффыстой, зæгъгæ, баххуыс кæндзысты зæронд нанайæн уынджы иу фарсæй иннæмæ ахизынæн.

Бæрæгбоны нысан уыд: сывæллæтты хæларзæдæдзинадыл, æгъдаудзинадыл, алфæмбылай дунемæ аудгæ ахаст дарыныл ахуыр кæнын. Алы адæймагæн дæр хъуамæ уа хæларзæрдæ уд, цæмæй æххуыс кæна фыдбылызы бахауæг адæймагæн. Ахæмты хонынц – хæларзæрдæ адæймæгтæ. Хæларзæрдæ адæймаг у, адæмы чи уарзы æмæ сын уæззау минутты æххуысмæ цæттæ чи у, ахæмты. Хæларзæрдæ адæймаг уарзы æмæ хъахъхъæны æрдз, уарзы мæргъты, цæрæгойты. Махæй алкæйы мидæг дæр ис чысыл хур – уый у хæларзæрдæдзинады хур. Сывæллæттæ бакастысты экраныл хæларзæрдæдзинады тыххæй цымыдисон видеоролик «Ласковое солнышко»-мæ.

 Æрæмбырдуæвджытæ æмæ мадзалы организаторæн бузныджы ныхæстæ загъта Гаглойты Элиса: «Тынг хорз мадзал уыд. Сывæллæттæ, мæ зæрдæ уын зæгъы, цæмæй бахъомыл уат æнæнизæй æмæ ныфс уат æрмæст уæ ныййарджытæн нæ, фæлæ æндæртæн дæр. Уырны мæ, сымах алыхатт дæр æххуысмæ кæй фæзындзыстут тыхст адæймагмæ. Уырны мæ, сымах кæй суыдзыстут аккаг адæймæгтæ. Бузныг, Людмила Анатолийы чызгæн йæ æвæллайгæ куысты тыххæй».

Арфæйы ныхæстæ загъта горæт Цхинвалы администрацийы ахуырады управленийы хистæр Лолаты Жаннæ дæр.

Адæймаг цыфæнды æвзæр зæрдæйы уагыл куы уа, уæддæр ын йæ цуры уæвджытæ хæларзæрдæйæ хъарм ныхæстæ куы зæгъой, уæд уайтагъд адæймаджы зæрдæйы равг фæхуыздæр вæййы. Цæй, æмæ хæларзæрдæ дарæм кæрæдзимæ.

ДЖИОТЫ Екатеринæ