Хуссар Ирыстоны хæдбардзинад банымайыныл 10 азы сæххæсты боны цытæн Цхинвалы паддзахадон университеты музейы байгом хъырымаг цæрджытæ Саулаты мыггаджы нывты равдыст. Равдысты æвæрд æрцыдысты ацы мыггагæй 13 адæймаджы куыстытæ, æдæппæт 80 куыстæй фылдæр. Се ‘хсæн уыдысты къамтæ, графикæ, архитектурон, декоративон аивады, интерьеры дизайны фæдыл куыстытæ.
Равдыст бацæуæн ныхасæй байгом кодта музейы зонадон кусæг Хъотайты Еленæ. Уый банысан кодта, зæгъгæ, равдыст ноджы тынгдæр сæнгом кæндзæнис Хъырым æмæ Ирыстоны адæмты, æмæ ноджыдæр фæхуыздæр уыдзысты нæ хæларадон ахастытæ.
Университеты ректор Тедеты Вадим бузныг загъта равдыстмæ æрцæуджытæн æмæ Хуссар Ирыстоны Президент Бибылты Анатолийæн æппæт хъуыддæгты дæр сæ фарсмæ кæй балæууы, уый тыххæй. Вадим ма банысан кодта, зæгъгæ, иу мыггагæй уал нывгæнæджы – уый у диссаг æмæ стыр æнтыст, æмæ сын йæ зæрдæ загъта, цæмæй се ‘нтыстытæ кæной фылдæр, сæ нывты гъæд та – хуыздæрæй хъуыздæр.
Йæ раныхасы Хуссар Ирыстоны Президент Бибылты Анатоли бафиппайдта, зæгъгæ, не ‘мбæлы президенты алы къахдзæфы тыххæй бузныг дзурын. Уымæн бузныг зæгъдзыстæм, кæд æмбæла, уæд, ома, фондз азы фæстæ…
Равдысты тыххæй дзургæйæ, уый банысан кодта, зæгъгæ, равдысты хорздзинæдтæ бирæ сты. Йæ хъуыдымæ гæсгæ уыдонæй, алы мыггагмæ дæр ис бирæ æвзыгъд адæймæгтæ, ацы равдыст та сæ тынгдæр разæнгард кæндзæнис ахæм хорз хъуыддæгтæ аразынмæ.
Уый фæстæ Президент Бибылты Анатоли, университеты ректор Тедеты Вадим æмæ Ахуырад æмæ зонады министры хæдивæг Гаглойты Элиса байгом кодтой равдыст æмæ æрбацæуæг адæм лæмбынæг зонгæ кодтой равдысты экспонаттимæ. Хуыздæр нывтыл нымад æрцыдысты «В горах Южной Осетии», «Крымская роза», «Галиат», «Верхний Мизур» æмæ æндæртæ.
ГÆЗЗАТЫ Иван
Comments are closed, but trackbacks and pingbacks are open.