Нывгæнджыты лæвар – фидауынгæнджытæн

14-æм июль – Фидауынгæнæджы бон хуссарирыстойнаг фæллойгæнджытæн у ахсджиаг, нысаниуæгджын æмæ зынаргъ бæрæгбон. Уыцы бон уæд махæн, Хуссар Ирыстоны цæрæг адæмæн ссис, æцæгæйдæр, ног царды, ног дуджы райдайæн бон. Уæды рæстæджы дæр нæ фарсмæ æрбалæууыдысты æмæ нын æххуыс кодтой, абон фидар лæудæй нæ фарсмæ чи лæууы, уыцы стыр Уæрæсе æмæ йæ хъуамæ кæддæриддæр дарæм нæ зæрдыл.

 14-æм июлы Республикæ Хуссар Ирыстоны Нывгæнджыты цæдисы куыстыты равдыст конд æрцыдис Анахарсисы номыл республикон библиотекæйы фойейы. Нывты экспозици организацигонд æрцыд Республикæ Хуссар Ирыстоны Культурæйы министрадимæ иумæ. Равдысты адæмы рæгъмæ хаст æрцыдысты нæ республикæйы цардыл дзурæг алыгъуызон цымыдисон нывтæ, аф-тæ ма хицæн адæймæгты къухтæй арæзт хъæдæрмæгæй конд æрмæджытæ дæр. Уыдонæн сæ автортæ иууылдæр уыдысты нæ республикæйы нывгæнджытæ, кæцытæ алыхатт дæр сæ аивад, сæ алыгъуызон ахорæнты руаджы базонын кæнынц респуб-ликæйæн æдтейæ дæр Хуссар Ирыстоны. Банысан кæнын хъæуы уый æмæ нæ нывгæнджытæ кæддæриддæр активон хайад кæй райсынц нæ бæстæйы уагъдцæуæг æндæр æмæ æндæр мадзæлтты. Ногæй ногдæр æмæ бæркадджындæр кæны се сфæлдыстадон тематикæ: рагфыдæлтæй ныры дуджы онг, æмткæй Ирыстоны истори, ирон фæллойгæнджыты, Цхинвалы рагондæр уынгтæ, нæ бæстæйы фенддагдæр бынæттæ æмæ кæмттæ, нæ адæмы рыст æмæ трагеди, ирон хæххон хъæу, нæ хæдбардзинад нын чи банымадта, уыцы хъомысджын бæстæтæй сæ иу – Уæрæсеимæ сабыр арвы бын цæргæйæ, ног цард аразыны фæндæгтыл ныллæууын, цæрæгойтæ æмæ алыгъуызон предметтæ, зыны се сфæлдыстады. Нывтæ се ‘ппæт дæр уыдысты цымыдисон, адæймаджы зæрдæ гайдтой ахæмтæ куыд: «Джер» (автор Тедеты Ритæ), «Сон», «Хранитель тайных знаний» (автор Санахъоты М.), «Оберег», «Закат (автор Дзæгъиаты Альби-нæ), «На этюдах в горах» (автор Кокойты Хазби) æмæ æндæртæ.

Равдыстмæ уынынмæ цыдысты нæ республикæйы æмбæстæгтæ, фыццаджы-дæр, фидауынгæнджытæ. Уыдонимæ равдыстæн аргъгæнæг уыдысты Республикæ Хуссар Ирыстоны Президент Бибылты Ана-толи, Хуссар Ирыстоны Уæрæсейы Федерацийы æххæстбарджын минæвар Марат Кулахметов, РХИ-йы Парламенты Сæрдар Тадтаты Алан, РХИ-йы Культурæйы министр Зассеты Жаннæ æмæ Хицауады æндæр бæрнон кусджытæ.

Мадзал бацæуæн ныхасæй байгом кодта Зассеты Жаннæ æмæ зæрдиаг арфæтæ ракодта фидауынгæнджытæн. Культурæйы министр йæ раныхасы банысан кодта 14-æм июлы бон нæ адæмæн куыд ахсджиаг æмæ зынаргъ у, æмæ фида-уынгæнджытæ та йæ рæстæджы кæй æрхас-той сабырад æмæ циндзинад, уый. «Абон мах гом кæнæм сæрмагонд равдыст фидауынгæнджыты боны цытæн. Хуссар Ирыстоны нывгæнджытæ сымахæн лæвар кæнынц равдыст, кæцы у цымыдисон æмæ алыгъуызон. Равдысты хайад исынц дыууын нывгæнæгæй фылдæр æмæ сын абон уыдзыстут аргъгæнæг сæ куыстытæн. Мах зæрдиагæй бафæндыд, цæмæй нæ циндзинад адих кæнæм уе ‘ппæтимæ дæр æмæ ма уын но-джыдæр зæгъæм стыр бузныджы ныхæстæ нæ адæмæн стыр ныфс кæй уыдыстут æмæ сабырад кæй тыдтат нæ республикæйы, уый сæраппонд. Нывгæнджытæ нымад цæуынц, куыд рæсугъддзинад фæлдисджытæ æмæ фидауынгæнджытæ та – сабырад хæс-джытæ. Бузныг æппæт равдысты хайадисджытæн дæр сæ аивадон лæвары тыххæй», – загъта Зассеты Жаннæ. Уый ма сæрмагондæй арфæ æмæ бузныджы ныхæстæ загъта раздæры фидауынгæнджытæ Бибылты Анатоли æмæ Марат Кулахметовæн бирæ азты дæргъы фидауынгæнджыты мисси кæй æххæст кодтой æмæ нæ адæмы æдасдзинады хъуыддагмæ сæ хайбавæрд кæй бахастой, уый тыххæй.

Республикæ Хуссар Ирыстоны нывгæн-джыты цæдисы сæрдар Битеты Алан дæр йæхи æмæ нывгæнджыты номæй арфæ æмæ бузныджы ныхæстæ загъта фидауынгæнджытæн сæ куыст кад æмæ намы-симæ кæй æххæст кодтой æмæ нæ бæс-тæйæн, нæ адæмæн сабырдзинады гарант кæй уыдысты, уый. «Фыццаджыдæр абон мæн фæнды раарфæ кæнын нæ сæйраг фидауынгæнæг Республикæ Хуссар Ирыстоны Президент Бибылты Анатолийæн. Бибылты Анатоли æмæ мæхи номæй арфæ кæнын æппæт фидауынгæнджыты контингентæн дæр, цæмæй уой æнæниз, амондджын æмæ фæрнджын. Нæ абоны равдысты цыдæриддæр нывтæ ис, уыдон сты нæ куыстыты иу хай æмæ сты цымыдисон. Фæнды мæ бузныг зæгъын равдысты хайад чи исы, æппæт уыцы нывгæнджытæн. Уыдон сты 23 адæймаджы, куыд хистæр кары нывгæнджытæ, афтæ æрыгæттæ дæр, кæцытæ тырнынц аивады бæрзæндтæм схизыныл. Абон сымах уыдонæн уыдзыстут аргъгæнджытæ æмæ, мæнмæ гæсгæ, райсдзыстут эстетикон æхцондзинад», – загъта Битеты Алан. Уый ма куыд банысан кодта, афтæмæй равдысты тематикæ у алыгъуызон, ис дзы бирæ ног куыстытæ æмæ гом уыдзæнис июлы кæрæттæм.

Сæрмагонд раныхæсты фæстæ уазджы-тæ азылдысты æмæ зонгæ кодтой равдысты нывтимæ.

ЦХУЫРБАТЫ Ларисæ