РЕСТАВРАЦИ ЦÆУЫ МЕМОРИАЛ
Ленингоры райцентры цы парк ис, уымæн йæ сæйраг фидыц у Стыр Фыды-бæстæйон хæсты фæмардуæвæг хæстонты мемориал.
Ныртæккæ уый кæнынц реставраци. Æрвылаз дæр ацы мемориалы раз уагъд æрцæуы хиирхæфсæн æмæ нысаниуæгджын мадзæлттæ.
Ленингоры район сæрыстыр у се ‘мзæххон, Советон Цæдисы Хъайтар Сабанты Григолæй. Бирæ сты, Стыр Фыдыбæстæйон хæсты хайад чи райста, уыдон дæр. Хъыгагæн ма ацы районы баззад æрмæстдæр иу ветеран – Александр Миделашвили. Уый æнæхъусдард никуы вæййы районы къухдариуæгадæй дæр æмæ ма ам УФ-йы арæнхъахъхъæнджытæн цы заставæ ис, уый службæгæнджытæй дæр.
УЛÆФÆН ЗОНÆ – УЛÆФÆН СЕЗОНМÆ
Ленингоры районмæ бахизæны Чысаны цæугæдон алы хатт дæр йæхимæ здæхта, найын, улæфын чи уарзы, уыдоны.
Ардæм сæрдыгон æнтæф бонты фæцæуы дзæвгар адæм. Районы администрацийы хъæппæрисæй ивгъуыд аз ам донбылгæрæтты хъуамæ арæзт æрцыдаид улæфæн зонæ. Районы коммуналон хæдзарады æххуысæй сын бантыст æрмæстдæр куысты иу хай бакæнын.
Районы администрацийы сæргълæууæг Мамытаты Витали уыцы нысанæн районы бюджетæй рахицæн кодта 1,9 милуан сомы æмæ æрæвнæлдтой куыстытæ адарддæр кæнынмæ.
Улæфæн зонæйæн йæ дæргъ у 120 метр.
Ацы бынаты æвæрд æрцыдысты æртæ беседкæйы. Сывæллæттæн та сарæзтой хъазæн фæзуæттæ. Уыдзæн дзы сæрмагонд найæн бынæттæ. Машинæтæн дæр арæзт цæуы сæрмагонд лæууæн бынат, кæцы æввахс уыдзæн найæн бынатмæ.
Районы администрацийы куыд зæгъынц, афтæмæй уыцы куыстытæ иууылдæр фæуыдзысты найæн сезонмæ хæстæг. Æмæ уæд фадат уыдзæн Чысаны сыгъдæг цæугæдоны найынæн канд ленингойрæгтæн нæ, фæлæ нæ республикæйы цæрджытæн дæр.
УАЗÆГТЫ Марфа
Comments are closed, but trackbacks and pingbacks are open.