Цæрджытæ ифтонг цæудзысты хи æркæнгæ картофæй
Нæ республикæйы сæрмагонд хъусдард здæхт цæуы амалиуæгад райтынг кæнынмæ, уæлдайдæр та хъæууон хæдзарады къабазы. Хицауадæн йæ фадæттæ куыд амонынц, афтæ æххуыс кæны æмæ сæ фарсмæ балæууы, ахæм архайд райтынг кæнын кæй фæнды, уыдонæн. Æмæ уый æмбæрстгонд дæр у. Республикæ у аграрон æмæ фадæттæ ис, цæмæй нæ цæрджыты ифтонг кæнæм хи æркæнгæ хъæууон хæдзарадон продукттæй. Æмæ кæд ацы здæхты нырма зæрдæйы фæндиаг æнтыстытæ нæй, уæддæр ныфс æвæрæн ис, къухты хуыздæрæй хуыздæр æнтыстытæ кæй æфтдзæнис.
Ныридæгæн нæ республикæйы дзæвгар ис æнтыстджын амалиуæгадон архайд чи кæнынц, ахæм адæймæгтæ, кæцытæн сæ æркæнгæ продукци æхсызгонæй агурынц фæлхасгæнджытæ.
Амалиуæгады фæндагыл чи ныллæууыд, ахæмтæ сты Елойты Владимир æмæ Гæджиты Тенгиз. Уыдон равзæрстой хъæууон хæдзарады ахæм къабаз, куыд картофгуыст. Бынатæн та – Дзауы районы бæрзонд хæххон хъæу Цъоны. Ацы бынаты ацы дыууæ адæймаджы æнæхъуаджы нæ равзæрстой. Дæлвæз бынæттæм абаргæйæ нæ хæхбæсты уæлдай хуыздæр зайы картоф. Фæлæ дзы цæрджытæ кæй скадавар сты, уымæ гæсгæ, йе ссарæн зын у, кæнæ та йын бынтондæр балхæнæн нал вæййы. Афтæ кæй у, уымæ гæсгæ Елойты Владимир æмæ Гæджиты Тенгиз ивгъуыд аз аскъуыддзаг кодтой банысангонд хъæуы 3 гектары фæзуатыл картоф байтауын. Ацы бынатыл ма Владимир æмæ Тенгизы цæст уымæн æрхæцыд, æмæ бæрзонд бынат кæй у æмæ дзы уыимæ уазал дæр кæй у æндæр бынæттæм абаргæйæ, уымæ гæсгæ картофы байтыдтытыл нæ фæзыны, тынг сын чи разиан кæны æмæ тыллæг æрконд зынгæ чи къаддæр кæны, уыцы колорадæйаг хъæндил. Уыимæ ма Владимир куыд зæгъы, афтæмæй зæхх у æнцон кусæн, хуымы кæрдæг нæ зайы, æмæ байтыдтыты дæр нæ хъыгдары.
Куыд райдыдтой ацы зæхх кусын, уый тыххæй нын амалиуæггæнæг радзырдта:
– Ме мбалимæ ацы зæхх бабæрæг кодтам æндæраз æмæ нæ зæрдæмæ фæцыд. Рагæй нæ уыд куыстгонд æмæ скъутæр ис, фæлæ йæ мах ныссыгъдæг кодтам, хуым кæныны æввонг æй æркодтам æмæ дзы фарон байтыдтам картоф. Хус рæстæг кæй ахаста, уымæ гæсгæ дзы уадиссаг тыллæг не ‘ркодтам, фæлæ махæн уæддæр нæ ныфс нæ асаст æмæ дзы ацы аз дæр байтыдтам. Байтыдтытæй зæрдæ рухс кæны, æмæ нын кæд боныгъæдтæ нæ къух саразой, уæд æнхъæлмæ кæсæм хорз тыллæг райсынмæ – æппынкъаддæр 70 тоннæйы бæрц. Мах нæ фæнд кæнæм нæ хъуыддаг æрдæгыл ныууадзын. Ам бирæ ис хуымкæнынæн бæзгæ зæххытæ æмæ нæ фæнды картофы байтыдтыты фæзуæттæ ноджы ауæрæхдæр кæнын. Ам ма нæхицæй бафтаудзыстæм уый дæр æмæ дæлвæз бынæттæй хъауджыдæр хæхбæсты, хуымзæххыты, донхæр кæй нæ хъæуы. Къæвдатæ дзы вæййы арæхдæр æмæ дзы уымæлад фаг вæййы.
Ацы бонты дыууæ фермеры картофы байтыдтытæ бабæрæг кодтой хъæууон хæдзарады министр Мæргъиты Алан æмæ йæ фыццаг хæдивæг Хъæцмæзты Джони. Базонгæ сты хæдзарады архайдимæ. Елойты Владимир сын радзырдта сæ куысты проект реализаци кæныны тыххæй. Уыимæ бузныг загъта, куыд министрады, афтæ паддзахадон унитарон куыстуат “Ирагропромсервис”-ы разамынадæн, хъæууон хæдзарадон техникæйæ сæ рæстæгыл кæй ифтонг кæнынц, уый тыххæй. Йæ ныхæстæм гæсгæ ахæм æххуыс куынæ райстаиккой, уæд сын æнтысгæ дæр ницы бакодтаид.
Министр дæр бузныг загъта Елойты Владимирæн сæ архайды тыххæй. Æмæ радзырдта министрад кæй кусы дарддæр дæр фылдæр хъæууон хæдзарадон техникæ самал кæныныл æмæ уæд ноджы хуыздæр ифтонг кæй цæудзысты ахæм техникæйæ, куыд фермертæ, афтæ хисæрмагонд хæдзарадты хицæуттæ дæр.
БЕСТАУТЫ Валя
