Анахарсисы номыл Национ библиотекæйы 8-æм августы уагъд æрцыд литературон-поэтикон изæр «Пять дней ада». Библиотекæйы кусджытæ бацæттæ кодтой мадзал РХИ-йы Культурæйы министрады хъæппæрисæй. Ам æрбамбырд сты Культурæйы министры хæдивæг Мамиты Григори, Национ музейы директор Зассеты Мераб, медиацентр «Ир»-ы директор Гаглойты Иринæ, 2008 азы хæстон архæйдтыты хайадисджытæ, зонады, культурæйы æмæ æхсæнады минæвæрттæ.
Литературон-поэтикон изæры райдианы экраныл æвдыст æрцыдысты документалон архивон кадртæ 2008 азы хæсты цауты тыххæй. Уый фæстæ æрæмбырдуæвджытæ иу уысм æмырæй алæугæйæ ссардтой, гуырдзиаг фашистты къухтæй чидæриддæр фæмард 1989 азæй фæстæмæ, уыдоны рухс нæмттæ. Мадзаламонджытæ æрдзырдтой уыцы хæсты цаутыл, бакастысты æмдзæвгæтæ, ныхасы бар радтой уазджытæн дæр. Хæсты хайадисджытæ Цхуырбаты Тимур æмæ Гуыцмæзты Вале æрымысыдысты, цавæр зындзинæдтимæ æмбæлдысты уæды рæстæджы, куыд æхсарджын тох кодтой ирон лæппутæ знаджы ныхмæ, уыдæттæ. Сæ мысинæгтæм хъусгæйæ сног сты зæрдæйы хъæдгæмттæ, цæстыты раз та февзæрдысты цы хъизæмæрттæ бавзæрстам, уыдоны зæрдæриссæн нывтæ.
Ныхасы ма рацыд Зассеты Мераб дæр æмæ уый дæр йæ мысинæгты радзырдта, уыцы фондз боны йæхи цæстæй цы федта, уый. Гаглойты Иринæ та уæды рæстæджы уыд нæ республикæйы Информаци æмæ мыхуыры комитеты сæргълæууæг æмæ уый та радзырдта, цавæр зындзинæдтимæ æмбæлдысты нæ журналисттæ, цæмæй рæстдзинад фехъусын кæной дунейæн.
Изæр рауад цымыдисон. Ӕрæмбырдуæвджытæ баззадысты райгондæй æмæ арфæ кодтой бацæттæгæнджытæн.
ДЖИОТЫ Алыксандр
