Ӕртын азы размӕ, растӕндӕр июлы 14 бон Хуссар Ирыстонмӕ Гуырдзыстоны расидгӕ тугуарӕн хӕстӕн кӕрон скӕныны охыл конд ӕрцыдысты Ӕмхӕццӕ фидауынгӕнӕг тыхтӕ. Уый уыд, ӕппӕт дунейы политикон эксперттӕ иууыл ӕнтыстджындӕрыл кӕй банымадтой, ахӕм фидауынгӕнӕг мисси. Схонӕм ӕй ӕртӕфарсон ӕви цыппарфарсон, уымӕн ӕмӕ Ирыстоны сабырдзинад бахъахъхъӕныны фӕдыл ӕфсӕддон тыхты сконды уыдысты уӕрӕсейӕгтӕ, гуырдзиӕгтӕ ӕмӕ ирӕттӕ, куыд Хуссар Ирыстонӕй, афтӕ – Цӕгат Ирыстонӕй дӕр. Ӕмӕ кӕд знаг йӕ гӕрзтӕ нӕ бафснайдта, кӕд-иу рӕстӕгӕй-рӕстӕгмӕ ныккалд ӕнӕаххос ирон туг, уӕддӕр нӕ тугамӕхст зӕххыл уыд сабырад – сӕртӕг, фӕлӕ адӕмы зӕрдӕты царды ныфс чи бауагъта, ахӕм сабырад. Ӕмӕ уыцы сабырдзинад ахаста, цалынмӕ Гуырдзыстоны сӕргъ Михаил Саакашвили не слӕууыд, уӕдмӕ.
Стӕй фӕивта алцы дӕр. Фидауынгӕнӕг тыхты гуырдзиаг батальоны сконды ротаци райдыдта ротацийы фӕдыл, кӕд фидауынгӕнӕг миссийы уагӕвӕрдтӕм гӕсгӕ уый бар нӕ уыд, уӕддӕр. Фӕстӕдӕр куыд рабӕрӕг, афтӕмӕй Гуырдзыстоны къухдариуӕгад йӕ фидауынгӕнӕг тыхты ротацийы ӕфсон, фидауынгӕнджыты хуызы Хуссар Ирыстонмӕ ӕрвыста йӕ гарзджын тыхты, сӕрмагонд хӕстон къордты, цӕмӕй хуыздӕр базонгӕ уыдаиккой стратегион бынӕттимӕ, ӕмӕ сын фӕстӕдӕр ӕнцон «сисӕн» уыдаид Хуссар Ирыстон.
Кӕй зӕгъын ӕй хъӕуы, Гуырдзиаг лӕджыфыдхорты тугмондаг агресси ӕруромыны хъуыддаджы махӕн нӕ сӕйраг ныфс уыдысты уӕрӕсейаг фидауынгӕнджытӕ, ӕмӕ сын уый нӕ ныббарста Гуырдзыстон, августы тугуарӕн хӕсты фыццаграды «сӕ маст» уыдонӕй райстой, уыдоны ныццагътой ӕгъатырӕй.
Ӕмӕ кӕд уыцы уӕззау хӕсты фӕстиуӕгӕн Хуссар Ирыстоны хӕдбардзинад нымад ӕрцыд, ӕмӕ дзы нал хъуыд фидауынгӕнӕг миссийы сӕр, уӕддӕр махӕй никуы ферох уыдзысты, 1992 азӕй нын 2008 азы онг нӕ цард чи хъахъхъӕдта, уыцы фидауынгӕнджытӕ. Зын уыд уыдонӕн, тынг зын, уымӕн ӕмӕ сӕ уал азы дӕргъы гуырдзиаг тыхгӕнджытӕ провокаци кодтой алыгъуызы дӕр, цӕмӕй фӕрӕдыдаиккой, цӕмӕй ахӕм исты ӕрцыдаид, дунеон ӕмӕхсӕнады чи базмӕлын кодтаид, ӕмӕ фидауынгӕнӕг мисси чи сдзырддаг кодтаид. Ахӕм исты куы ӕрцыдаид, уӕд, ӕцӕгӕйдӕр, Гуырдзыстоны фарсхӕцджытӕ цъиувӕдис систаиккой ӕмӕ Уӕрӕсейӕ ӕрдомдтаиккой йӕ фидауынгӕнӕг тыхты Хуссар Ирыстонӕй акӕнын. Фӕлӕ сын уый фадат нӕ радтой фидауынгӕнджытӕ, цы фӕлгӕтты ӕрцыдысты, уыцы фӕлгӕттӕй ахизыны бар никуы радтой сӕхицӕн, никуы ӕруагътой рӕдыддзинад. Куыд ӕмхӕццӕ тыхты хӕстонтӕ, афтӕ рӕстӕгӕй-рӕстӕгмӕ ивд цыдысты сӕ командӕгӕнджытӕ дӕр. Уыдонӕй бирӕтӕ ирон адӕмӕн систы иузӕрдион хӕлӕрттӕ, ӕмӕ цӕрӕнбонтӕм баззайдзысты нӕ хӕлӕрттӕй.
Ныртӕккӕ Хуссар Ирыстоны нал хъӕуы фидауынгӕнӕг тыхты сӕр, уымӕн ӕмӕ нӕ фарсмӕ сты нӕ ӕмцӕдисон Уӕрӕсейы гарзджын тыхтӕ – ӕндӕр хуызы, ӕндӕр номимӕ, фӕлӕ иунӕг нысанимӕ – Хуссар Ирыстоны, нӕ иумӕйаг Уӕрӕсейы хуссайраг арӕнты ӕдасдзинад хъахъхъӕныны нысанимӕ.
Ӕртын азы размӕ стыр Уӕрӕсе нӕ фарсмӕ куыд ӕрбалӕууыд, афтӕ лӕууы абон дӕр. Ноджы ӕввахсдӕр, ноджы ахсджиагдӕр нысӕнттимӕ!
Ӕмӕ уый мах макуы хъуамӕ ферох кӕнӕм.
Comments are closed, but trackbacks and pingbacks are open.