Дзæуджыхъæуы национ зонадон библиотекæйы уагъд æрцыд Екатеринбургæй анимацион кинойы режиссер, Уралы архитектурон-аивадон университеты графикæ æмæ анимацийы кафедрæйы профессор Хъараты Алексейы сфæлдыстадон изæр æмæ фильм «Привычка»-йы премьерæ. Уымæн йæ куыстытæ æвдыст цыдысты æмæ цæуынц Европæйы бирæ бæстæты. Режиссер фыццаг хатт фестиваль ауагъта йæ историон Райгуырæн бæстæйы.
Мадзалы организатортæ уыдысты культурон-патриотон фонд «Центр «Содействие», Аслан-Гирей Галатийы номыл культурон фонд, УФ-йы Кинематографистты цæдисы цæгатирыстойнаг хайад, РЦИ-Аланийы национ зонадон библиотекæ.
УФ-йы Паддзахадон премийы лауреат Хъарайы фырт у бирæнымæц аннимацион фильмты автор. Ацы фильмы фыццаг хатт æвдисы ирон тематикæ. Аннимацион фильм арæзт æрцыд Хетæгкаты Къостайы æмдзæвгæ «Привычка»-мæ гæсгæ (режиссер Александр Рубцовимæ иумиаг куыст). Фильм ист æрцыд УФ-йы Культурæйы министрады кинематоргафийы департаменты финансон æххуысы фæрцы. Къостайы æмдзæвгæйы иронион-худæг сюжет режиссертæ баххæст кодтой ивгъуыд æнусы 20-æм азты композитор Галаты Барисы (Аслан-Гирей Галати) легендарон музыкалон-этнографион худæг коллизитæй. Фильм арæзт куыд цыд, Галатийы номыл ирон культурæйы свердловаг æхсæнадимæ хæлардзинады тыххæй, зынгæ композиторы сфæлдыстадмæ сæвзæргæ цымыдисдзинады, бирæнымæц фильмты, йæ фылдæты уидæгты æмæ райгуырæн зæххмæ уарзондзинады тыххæй радзырдæуыд сфæлдыстадон фембæлды рæстæджы. Композитор Галаты Барисы тыххæй иннæ дыууæ ног фильмтимæ «Привычка» æвдыст æрцыд Мæскуы æмæ Екатеринбургы «Урал-Кавказ: связующие нити. Осетинские параллели»-йы фестивалы фæлгæтты.
Мадзалы уазджытæ базонгæ сты фильм «Привычка»-мæ гæсгæ Хъарайы фырты графикон куыстыты равдыстимæ, афтæ ма фыццаг ирон композитор, ирон музыкæ – музыкалон драмæ, опереттæ, киномузыкæйы фыццаг егъау уацмысты автор Галаты Барисы бынты равдыстимæ дæр.
Мадзалы рæстæджы раныхас кодтой национ ахастыты фарстыты фæдыл республикон ведомствойы министр Цуциты Аслан, «Стыр Ныхас»-ы сæрдар Кучиты Юри, адæмон поэт Гуырджыбегты Иринæ, Галаты Барисы номыл культурæйы фонды минæвар Гæбæраты Андрей æмæ æндæртæ. Фонды сæргълæууæг Гаглойты Лианæ куыд загъта, уымæ гæсгæ мадзалы хайадисджытæн ирон адæмон зарджытæ æмæ мелодитæ сæххæст кодтой Ногиры адæмон хор æмæ Цæгат Ирыстоны культурæйы республикон колледжы адæмон инструментты оркестр.
ДЖИОТЫ Е.
Comments are closed, but trackbacks and pingbacks are open.