Джиоты Владимир æмдзæвгæтæ фыссын куы райдыдта уæд нырма ахуыр кодта цыппæрæм къласы. Рæстæг куыд цыд, афтæ йæ сисфæлварæнты руаджы æргомдæр кодта йæ курдиат.
Поэзийы æндæвдад стыр у адæймагыл, æмдзæвгæтæ фыссын æмæ кæсын чи бауарзы, уыцы æрыгон фæлтæрыл ахъаз у иттæг хорз хъомылдзинадæн. Уыцы æндæвдад хæрз æрыгонæй банкъардта Владимир дæр. Æмæ фыццаг æмдзæвгæтæ кæсын бауарзта, уый фæстæ та сæ йæхæдæг райдыдта фыссын. Хъомылдзинады кой куы кæнæм, уæд уым та дызæрдыккагæй ницы ис. Владимир хæрз æвзонгæй базыдта, хорз цы у æмæ аразын цы не ‘мбæлы, уыдæттæ. Сабийæ уыд коммæгæс, хистæртæнкад æмæ лæггадгæнæг, æмгаруарзаг.
Владимир райгуырд æмæ схъомыл Цхинвалы горæты. Каст фæцис 5-æм астæуккаг скъола. Скъолайы ахуыр кæнгæйæ йæхицæн хорз ном скодта, æрмæст йе мкъласонты ‘хсæн нæ, фæлæ æнæхъæн скъолайы дæр. Ахуырмæ уыд рæвдз, æнæзивæг, æхсæнадон хъуыддæгты та активон. Уарзтой йæ, куыд хорз æмгар æмæ ахуыргæнинаг, афтæ.
Скъолайы æмæ æгъдауджын бинонты ‘хсæн хъомыл кæнгæйæ, Владимир фæхайджын ахæм бæллиццаг миниуджытæй, куыд рæстдзинад æмæ адæймагдзинадæй æмæ сын кæны стыр аргъ. Кæд фæстаг 30 азы дунейы æрцыдис стыр ивындзинæдтæ, рæстдзинад æмæ адæймагдзинад цасдæрбæрцæй фæцудыдтой, уæддæр сын Владимир раздæрау дæтты стыр нысаниуæг æмæ сæ арф æвæрдæй дары йæ зæрдæйы.
Скъолайы цардæй Владимир бирæ цыдæртæ бахъуыды кодта, арæх фæуайынц йæ цæстытыл, арæх æрымысы уыцы хъæлдзæг цард. Ноджы арæхдæр та æрымысы йæ ахуыргæнджытæ Дзабиты Элисо, Пæррæстаты Федося, Тыджыты Юри, скъолайы уæды директор Гасситы Зауыр æмæ æндæрты. Йæ ныхæстæм гæсгæ, уыцы ахуыргæнджытæм уыд стыр фæлтæрддзинад æмæ хорз зонындзинæдтæ. Уымæй дарддæр ма алы ахуыргæнинагмæ дæр дардтой рæвдаугæ æмæ уæздан ахаст.
Владимир кæд хъуыды кæны æмæ дзуры иронау, уæд æмдзæвгæтæ та фыссы уырыссагау. Иронау дæр фыссы æмдзæвгæтæ, мыхуыр дæр сæ ныккæны газет «Хурзæрин» æмæ журнал «Фидиуæг»-ы. Фæлæ уæддæр, сæйраджыдæр, уырыссагау фыссы. Уый тыххæй та йæхæдæг афтæ зæгъы, зæгъгæ, “скъолайы ма куы ахуыр кодтон, уæд бауарз-тон уырыссаг фысджытæ С. Есенин æмæ В. Маяковскийы уацмыстæ, кастæн сæ æмæ мæ уыдон сразæнгард кодтой уырыссагау фыссынмæ”.
Владимир абонмæ рауагъта фондз чиныджы, ныр та æнхъæлмæ кæсы æхсæзæм чиныджы фæзындмæ. Йе сфæлдыстадон рæзтыл ын мæгуырауырдæм бандæвта, йæ рагфыстытæ кæй фесæфтысты, уый. Куынæ разындысты уæд мæстджынæй поэзийыл ауыгъта йæ къух. Афтæ цалдæр аз иунæг рæнхъ дæр нал ныффыста. О, фæлæ адæймаджы сфæлдыстадон артæн банымæггæнæн нæй.
Владимир ногæй æмдзæвгæтæ фыссын райдыдта 22 аздзыдæй. Куыд бирæнымæц поэттæ, афтæ, Владимирæн дæр йæ сæйрагдæр æмдзæвгæтæ фыст сты Фыдыбæстæйы, рæстдзинады, уарзты, хæсты æмæ æндæр темæтыл.
Йæ фыццаг чиныг «Регион»-ы Фыдыбæстæмæ йæ ахасты тыххæй афтæ зæгъы:
Откуда столько взялось здесь солнца,
Откуда столько картин, как снов.
«Сказать»-все это богатство горца,
Не мог бы даже, я тонной слов.
Афтæмæй зæгъæн ис, æмæ поэтæн Фыдыбæстæйы темæ йе сфæлдыстады ахсы ахсджиагдæр бынат. Йæ алы чиныджы дæр Фыдыбæстæйы темæйыл фыст ис дзæвгар æмдзæвгæтæ. Йæ иннæ чиныг «Остров» райдыдта ахæм цыппаррæнхъонæй:
Не меняется песня моя
Хоть бегут мои годы как кони.
И люблю я все те же края,
И люблю, и тоскую до боли.
Автор кæд нырма æвзонг у, уæддæр æм бахъардта æмæ сагъæс кæны йе стыр Фыдыбæстæйы фехæлдыл æмæ фыссы:
Горит страна, спасенья нету,
Края счастливые в дыму.
Кто заварил отраву эту,
Глаза бы выколоть ему.
Владимиры цыппæрæм чиныджы сæйрагдæр бынат бацахстой верлибрæй фыст æмдзæвгæтæ. Сæ тематикæ та у, рацарæзты рæстæг æмæ Советон Цæдисы фехæлды фæстæ Хуссар Ирыстоны адæм цы уæззау уавæры бахаудтой, уый.
Ацы цауты тыххæй Владимир йæ цыппæрæм чиныг «Бурелом»-мæ бахаста бирæ æмдзæвгæтæ. Уыдонæй сæ иу хъуысы афтæ:
Мы воду носили, смиряя шаги,
По лестницам скользким, на этажи.
Мы воду носили…падая, шли.
Но прежде ее издалека везли.
Уымæй дарддæр ацы чиныгмæ хаст æрцыдысты стыр цаутæ æмæ зынгæ адæймæгтыл фыст, æдæппæт дыууæсæдæ æмдзæвгæйæ фылдæр.
Йæ фæстаг чиныг «Зной 2» рацыд 2016 азы. Кæд йæ размæ чиныг «Бурелом»-ы ис классикон стилыл фыст æмдзæвгæтæ, уæд ацы æмбырдгонды уацмыстæ та фыст сты верлибрæй. Иннæ æмдзæвгæтæм абаргæйæ, уыдон, кæд дзы маст æмæ катайдзинад æвдисæг æмдзæвгæтæ дæр ис, уæддæр дзы зыны царды хуыздæрæрдæм фæивд, поэты хуыздæр зæрдæйы равг.
Гæззаты Иван
Comments are closed, but trackbacks and pingbacks are open.