Æвæццæгæн, ирон æфсæрмдзæстыг сылгоймаджы ирон кафт кæнгæйæ, иухатт чи федта, уымæй никуы ферох уыдзæн йе уæнгты рог фезмæлд, йæ фæлмæн мидбылхудт, йæ уæздандзинад.
Афтæ уыд рагзамантæй фæстæмæ, ирон сылгоймаг-иу хъазтмæ куы рахызт, уæд-иу цæстæвæрæн фæцис. Стæм адæймаг разындзæн, хъазтизæры ирон кæлæнгæнæг музыкæйы зæлтæм чи нæ бахъæлдзæг уа, кафынмæ рахизын кæй нæ бафæнда, фæлæ ис ахæм адæймæгтæ ирон кафты аивадимæ æнæхъæнæй дæр йæхи чи сбæтты. Уыдон кафты фæрцы раргом кæнынц сæ миддуне, сæ дунеæмбарынад æмæ æнæ кафтæй сæ царды иунæг бон дæр нал фæфæразынц.
Санахъоты Жаннæ чысылæй бауарз-та ирон кæфтытæ æмæ-иу йæ мадæн арæх дзырдта, цæмæй йæ кафджыты къордмæ бакæна.
3-аг къласы ахуыр кодта, афтæ Жаннæ бацыд, Ирыстоны зындгонд хореограф Саулохты Мелс цы скъола-студи бакодта уырдæм. Хореографийы ахæм скъола-студи Хуссар Ирыстоны уæд уыд иунæг. Жаннæ ныр куыд зæгъы, афтæмæй йын уырдæм бацыд стыр ахъаз фæци йæ дарддæры профессионалон рæзтæн. «Хореографийы цыдæриддæр хорзæй, æнæмæнгхъæуæгæй ис, уыдон иууыл-дæр махæн бацамыдта Мелс. Йæ фæрцы æз базыдтон ирон хореографийæн йæ сæйраг бындуртæ», – зæгъы Жаннæ.
Авд азы скъола-студийы Санахъоты чызг йæхи цайдагъ кодта кафыныл. Уый фæстæ, 1998 азы, Саулохты Мелсы æххуысæй ацыд ахуыр кæнынмæ Цæгат Ирыстоны культурæйы колледжмæ æмæ йæ каст фæци 2003 азы иттæг хорз нысæнттыл. Йæ дæсныйад чи фæуарзы, стыр æнтыстытæм чи фæтырны, ахæмты æнцонтæй бафиппайынц дæсны специалисттæ. Жаннæйы курдиат æмæ арæхстдзинад дæр бафиппайдта дæсны хореограф, Галаты Барисы номыл паддзахадон ансамбль «Симд»-ы уæды аивадон къухдариуæггæнæг Быценты Геннади, æмæ йæ ахуыры фæстæ, Ирыстонмæ æрыздæхгæйæ, Жаннæйы фæхуыдта ансамблмæ. Уæд райдыдта кафаг чызгæн йæ профессионалон рæзты фæндаг. Аныгъуылд ирон национ кафты дунейы. Æрвылбон дæр æвзонг чызг куыста йæхиуыл, арæзта æппæт дæр, цæмæй Ирыстоны сценæйæ рарттива æцæг дæсны кафæгæй.
Уæдæй абонмæ Жаннæ цæсгомджынæй лæггад кæны ирон сценæмæкæсæгæн. Куыд Ирыстоны сценæйыл, афтæ уымæн æдтейæ дæр бирæ хæттыты ралæууыд сценæмæкæсджыты раз. Ныр 15 азы «Симд»-ы кафгæйæ, уый гастрольты уыд бирæ рæтты. Уыд Абхаз, Мæскуы, Челябинск æмæ Уæрæсейы æндæр горæтты.
2011 азы Абхазы Республикæйы гастрольты уæвгæйæ, Жаннæйæн лæвæрд æрцыд Абхазы Республикæйы сгуыхт артисты ном. Уымæй дарддæр, хицæн рæстæджыты хорзæхджын æрцыд Кады грæмотатæй.
Жаннæмæ кафыны курдиат æнæнхъæлæджы нæ фæзынд. Йæ мад Коцты Людмилæ дæр йæ рæстæджы уыд кафæг. Дæргъвæтин азты, суанг пенсийы рацæуыны агъоммæ та фæкуыста нæ горæты скъола-интернаты музыкæйы ахуыргæнæгæй. Йæ фыд Георгий та уыд фыссæг. Йæ пъесæты æмбырдгонд «Фæстаг чындзæхсæв» хорз зындгонд у чиныгкæсæгæн.
Жаннæ иугæр куы базыдта ирон кафты сусæгдзинæдтæ, цы тых æмæ нысаниуæг ис ирон кафтæн, уæд сфæнд кодта йæ зонындзинæдтæ кæстæр фæлтæрæн дæр бацамонын. Авд азы хореографæй фæкуыста нæ горæты Мæскуыйаг микрорайоны 1-æм скъолайы.
«Симд»-ы ансамблæй дарддæр ма Жаннæ кусы нæ Республикæйы Культурæйы министрады цур Адæмон сфæлдыстады республикон центры адæмон хореографийы методистæй. Йæ куысты фæлгæтты адæмон хореографийæ мастер-класстæ ауадзы нæ горæты скъолаты, афтæ ма йæм районты хъæууон клубты кафджыты къордты къухдариуæггæнджытæй чи бахаты, уыдонæн. Уымæй дарддæр республикæйы æмвæзадыл, бацæттæ кæны ирон кафты фестивалтæ,цыран хайад райсынц алы кары адæм, куыд горæтæй, афтæ районтæй дæр.
Жаннæ йæ куысты куыд æнтыстджын у, афтæ у бинонты царды дæр. Йе’мкъай Куыдзеты Гарикимæ хъомыл кæнынц дыууæ чызджы. Гарик дæр у аивады кусæг. Бирæ азты кусы «Симд»-ы аккомпаниаторæй. Афтæ дыууæ æмкъайы дæр бæрзонд исынц æмæ лæггад кæнынц ирон аивадæн. Сæ хистæр чызг дæр архайы ирон национ кафджыты къорды, фæлæ йæ мады ныхæстæм гæсгæ, фидæны уый цы фæндаг равзардзæн, уый нырма бæрæг нæу.
Жаннæйы куы бафарстам, зæгъгæ, «Симд»-ы уал азы дæргъы кафгæйæ, цы у дæ бæллицц, уæд Жаннæ йæ мидбылты бахудт æмæ нын раргом кодта йæ зæрдæ: «Сценæйыл бирæ азты кафгæйæ, нырма не сæххæст кодтон мæ сæйраг кафт. Ныфс мæ ис уыцы кафт æввахс рæстæ-джы искуы æппæт зæрдæ æмæ хъаруйæ кæй сæххæст кæндзынæн», загъта Жаннæ. Цы кафт у, цы у йæ мидис, уый дæр нын Жаннæ раргом кодта, фæлæ ирон аивад, ирон кафтæн табугæнджытæн, уый рæстæгмæ сусæггагæй баззайæд.
Уæдæ тагъд рæстæджы йæ бæллиц сæххæст уæд æмæ та ирон сценæмæкæсæджы дисы баппарæд йæ диссаджы арæхстæй. Цы ансамблы кафы, уый та Жаннæ æмæ уый хуызæн адæймæгты фæрцы йæ рæсугъд ном æмæ кад макуы фесафæд.
Къæбысты Заринæ
Comments are closed, but trackbacks and pingbacks are open.