Хуссарирыстойнаг æвзонг штангист Багаты Александр фæуæлахиз зындгонд турнир «Путь к Олимпу»-йы. Александр ерыс кодта 73 кг уæзы категорийы. Иу схæстæн систа 95 кг, сриуыгъгæйæ та 125 кг уæзы штангæ.
Йæ тренертæ сты Кæсæбиты Инал, Александр æмæ Эдуард.
ДЗЮДО
Спортсменты ног къорд рацыд цæттæгæнæн сбортæ. Ныр та ног сезонмæ сæхи цæттæ кодтой дзюдоисттæ. 50 спортсменæй фылдæр фæтыхджындæргонд тренировкæтæ цыдысты Знауыры районы дзюдойы скъолайы. Тренировкæтæ уагъд цыдысты развæлгъау бацæттæгонд программæмæ гæсгæ. Фæстаг бон та сын уагъд æрцыд мини-турнир волейболæй.
Тренировкæтæй дарддæр ма спортсментæн арæзт æрцыдысты историон бынæттæм экскурситæ.
Цæттæгæнæн сбортæ рацыдысты Цхинвал, Знауыр æмæ Ленингоры районы дзюдоисттæ, афтæ ма Цæгат Ирыстоны спортсментæ дæр. Цæгатирыстойнаг дзюдоистты ныхæстæм гæсгæ ам тынг хорз уавæртæ ис тренировкæ кæнынæн.
Спортсменты ‘хсæн уыд спорты дæсны Уалыты Сослан. Уый йæхи цæттæ кæны æппæтæуæрæсейон ерыстæм, кæцытæ уагъд цæудзысты Тольяттийы.
Цæтæгæнæн сбортæй райгонд у тренер Тулойты Георги дæр. Йæ ныхæстæм гæсгæ ацы тренировкæтæ æнæмæнгæйдæр фæзындзысты спортсменты бæрæггæнæнтыл.
Спортсментæм разæй æнхъæлмæ кæсы æвзæнгты ‘хсæн Цæгат Кавказы Федералон зылды чемпионат. Йæ фæстиуджытæм гæсгæ иууыл цæттæдæр дзюдоисттæн лæвæрд цæудзæн Уæрæсейы чемпионаты хайад райсыны бар.
ХУРИТЫ Батрадз
