1 февралы горæттаг 47-аздзыд цæрæг тезгъо кодта Цхинвалы районы Присы хъæумæ ‘ввахс æмæ адагы суыдта æппæрст дзаума, кæцы йæм фæкаст æхсæнгарзы хуызæн. Йæ цурмæ куы бацыд, уæд æй бамбæрста, йæ зæрдæ æнæхъуаджы кæй нæ фехсайдта, – ацы предмет разынд Дегтяревы пулемет.
Милицийы экспертон-криминалистон центры куыд сбæрæг кодтой, афтæмæй ацы æхсæнгарзæн йæ маркировкæйы номыртæ сты хафт æмæ уымæ гæсгæ нæй гæнæн фидарæй зæгъын, мигæнæн заводы арæзт у, æви хиарæзт. Ӕддейæ бакæсгæйæ у Дегтяревы пулемет «ДП-27»-ы хуызæн. Ӕхсæнгарзæн йæ хæйттæй иу йæ уæлæ нæй æмæ уымæ гæсгæ ацы мигæнæн пайда кæнынæн нæ бæззы. Рагон арæзт æхсæнгарз кæй у, æмæ ма гом арвы бын къæвдамæ бирæ кæй фæлæууыд, уый фæстиуæгæн сызгæ ис.
Ацы пулемет æрымысыд зынгæ уæрæсейаг æфсæддон конструктор Василий Дегтярев æмæ дзы æфсæддонтæ пайда кæнын райдыдтой 1927 азæй фæстæмæ. Уыд æнцонархайд æмæ æнæсыкк, хæстонтæн алцæмæй дæр сæ къух арæзта. Стыр пайда ма æрхаста Стыр фыдыбæстæйон хæсты дæр, фæлæ фæстæдæр фæзындис хуыздæр пулеметты хуызтæ æмæ Уæрæсейы æфсады гæрзтæй ист æрцыд. Уымæ æнæкæсгæйæ дзы нырма абоны бон дæр пайда кæнынц бирæ хæстон архæйдтыты.
ДЖИОТЫ Александр
Comments are closed, but trackbacks and pingbacks are open.