Абон у тагъд æхуысы кусджыты дунеон бон. Дохтыры професси у иууыл хъæуæгдæр кæцы баст у адæмы цард æмæ æнæниздзинадимæ. Уыдон сæ тыхтыл æмæ зонындзинæдтыл æнæ ауæрдгæйæ, стыр хайбавæрд хæссынц адæмы æнæниздзинад бахъахъхъæныны хъуыддагмæ. Се ‘рвылбонон удуæлдай куыстæй уыдон адæмæн цард лæвар кæнынц, сомбоны ныфс сын дæттынц.
Тагъд æххуысы кусæджы бон нын фадат дæтты, цæмæй сын бузныг зæгъæм сæ аудындзинады тыххæй. Сæ професси у, адæймаджы хæрзиуæгæн аккагæй лæггад кæныны цæвиттон.
Царды цыдæриддæр дæсныйæдтæ ис, уыдонæй дохтыры дæсныйад у æппæтæй ахсджиагдæр, зындæр æмæ вазыгджындæр. Тæригъæд кæнын, фæлмæнзæрдæ уæвын, искæй рыст хи рыстау æнкъарын – уыдон сты дохтырæн йæ сæйраг миниуджытæ.
Адæм уæм фенхъæлмæ кæсынц, ныфс уæ æвæрынц… Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, зæгъгæ, аирвæзын мæ кæндзæн, уæд уымæн æнæрцæугæ нæй. Æууæнкæй аразгæ у алцы дæр…
Хорз дохтыры алы хатт дæр Хуыцауæй лæвæрд фæхонынц, ома йæм Хуыцауæй лæвæрд курдиат ис.
Ацы вазыгджын рæстæг æвдисут хъæбатырдзинад æмæ патриотизм. Хъæбатыртæ уæ куы схонæм, уæд нæ фæрæдидзыстæм. Хъуамæ алчидæр уавæр æнкъара æмæ низ ма ‘руадзыны мадзæлттæ æххæст кæна.
Уавæр зæрдæхсайгæ кæй у, æмæ алы æнæнхъæлæджы уавæртæм цæттæ уæвын кæй хъæуы, уый фылдæр бæрндзинад домы тагъд æххуысы кусджытæй. Бæстæтыл цы хæцгæ низ ахæлиу, уый нæ республикæмæ ма æруадзыны тыххæй тагъд æххуысы кусджытæ дæр кусынц æхсæвæй-бонæй.
Паддзахады райрæзты иууыл ахсджиагдæр бæрæггæнæнтæй иу у æнæниздзинад хъахъхъæныны стыр æмвæзад. Нæ республикæйы æнæниздзинад хъахъхъæнынады къабазы уавæр хъуамæ фæхуыздæр уа, йæ лæггæдтæ фæхæрзхъæддæр уой, æмæ уыцы нысанæн хицауад ницы бавгъау кæндзæн. Нырмæ цы сарæзтой æнæниздзинад хъахъхъæнынады къабазы, уымæй ноджы фылдæр араздзысты дарддæр. Бындуронæй рацарæзтой медицинон объекттæ. Архайдзысты дохтыртæ æмæ медицинон кусджытæн сæ царды уавæртæ хуыздæр кæныныл, сæ мызды фарстатыл. Архайдзысты, кусын кæй фæнды æмæ размæ чи тырны, медицинæйы къабазы ахæм курдиатджын фæсивæд агурыныл æмæ сын куысты фадæттæ аразыныл.
Алыхуызон мадзæлттæ æххæстгонд цæуынц нæ республикæйы, уымæ гæсгæ коронавирусы ног хуызæй фæрынчыны цау Хссар Ирыстоны иунæг дæр нæма ис, æмæ уый æхсызгон у.
Тагъд æххуысы кусджытæ æхсæв æмæ бон нæ æвзаргæйæ, мæлæты ныхмæ тохы куы бацæуынц, æмæ сæ къухты арæхстдзинад, сæ зонындзинæдтæ æмæ уды хуыздæр миниуджыты руаджы рынчыны цардмæ раздахгæйæ уæлахиздзау куы свæййынц, уæд уыцы урсхалатджынтæ, рынчын æмæ йæм чи фенхъæлмæ кæсы, уыцы хиуæттæм зæххон лæг нал фæкæсы, фæлæ уæларвон. Уый стыр æмæ уæззау уаргъ у: дохтыры ном хæсгæйæ мыдадзын цырагъау адæмы хæрзæбонæн судзын.
Нæ зæрдæ уын зæгъы æнæниздзинад, фыццаджыдæр ног æнтыстытæ æмæ уæ рынчынты ‘рдыгæй арфæтæ фылдæр куыд кæной. Амондджын бæрæгбæттæ уыл куыд цæуа, Хуыцау уый зæгъæд. Æнæниздзинадыл кусæг стут, æмæ уæхæдæг дæр æнæнизæй куыд кусат, уыцы арфæ уæ уæд!
ДРИАТЫ Лейла
Comments are closed, but trackbacks and pingbacks are open.