СӔрæджы Дзæуджыхъæуы спорты галуан «Манеж»-ы уагъд æрцыд Республикæ Цæгат Ирыстон-Аланийы чемпионат уæгъдибар хъæбысхæстæй. Хайад дзы райстой 100 богалæй фылдæр 10 уæзы категорийы æмæ рабæрæг сты тыхджындæртæ.
70 килограммы уæзы æвзист майдан рамбылдта горæт Цхинвалы патрулон-постон службæйы кусæг Джиоты Андрей. Йæ ныхмæлæуджытæй цыппары рамбылдта, фæлæ финалы фембылд дзæуджыхъæуккаг богал Бадтиаты Артурæн.
Андрей милицимæ службæ кæнынмæ æрбацыд ацы аз æмæ нырма у стажер. Уæгъдибар хъæбысхæсты спортмæ та цæуы 8-аздзыдæй фæстæмæ, хайад райста æндæр æмæ турнирты æмæ-иу арæх рамбылдта кæнæ-иу ссис призер.
ДЖИОТЫ Алыксандр
Адарддæр кодта йæ контракт
Æрæджы ирон специалист Черчесты Станислав йæ контракт адарддæр кодта венгрийаг футболон клуб «Ференцварош»-имæ. Ивгъуыд сезоны йæ дæлбар командæ фæуæлахиз Венгрийы чемпионат æмæ кубокы дæр. Европæйы къорды ацы сезоны та йæ дæлкъорды бацахста фыццаг бынат, цыран хъазыдысты ахæм командæтæ, куыд французаг «Монако», туркаг «Трабзонспор» æмæ сербаг командæ «Царвена Звезда».
Черчесты Станислав куыд фехъусын кодта, афтæмæй цалынмæ йæ контракт нæ адарддæр кодта, уæдмæ ма йæ хуыдтой азиаг командæтæ дæр.
«Æрæджы мын серьезон европейаг компанийы минæвæрттæ, кæцытæ кусынц хъæздыг азиаг футболы, дзырдтой, цæмæй ахъуыды кæнон уым бакусыны тыххæй. Бузныг сæ дæн сæ хъусдарды тыххæй æмæ сын загътон ныртæккæ кæй дæн «Ференцварош»-ы тренер. Фæлæ йæ чи зоны фидæны цы уыдзæн, уый?», – банысан кодта тренер.
Ссис турниры уæлахиздзау
Ирыстоны хъæбысхæсты скъолайы хъомылгæнинаг Хуыбиаты Хасан ссис «АЛРОСА»-йы призтæ рамбулыны сæраппонд æппæтуæрæсейон турниры уæлахиздзау. Ерыстæ уагъд цыдысты Якутийы. 125 кг уæзы категорийы архайгæйæ, Хасан финалы фæуæлахиз бынæттон богал Андрей Ароновыл. Ирон спортсмен турниры хъахъхъæдта Мæскуыйы спортивон кад.
Турниры уæлахиздзаутæн лæвæрд æрцыдысты фæйнæ 100 мин сомы, æвзист призертæ райстой 50 мин сомы, æртыккаг бынæттæ бацахсæг спортсментæ та хорзæхджын æрцыдысты фæйнæ 30 мин сомæй. 30 мин сомы ма райстой ерысты уæлахиздзауты тренерт дæр.
ХУРИТЫ Батрадз
