Республикон фæсивæдон æхсæнадон организаци «Иууон Алани» æмæ Хуссар Ирыстоны Россотрудничествойы минæварад цæттæ кæнынц «Газета Победы»-йы æрвылазон акци ауадзын.
«Фæсивæдон организацийы активисттæ уардзысты историон газет «Правда» 1945 азы 9 майæ æмæ мингай «Георгийы лентæтæ». Акци райдайдзæн республикæйы районтæй æмæ фæуыдзæн Хуссар Ирыстоны столицæйы», – радзырдтой «Иууон Алани»-йы фæсивæдон организацийы. Акци нæ республикæйы уагъд цæуы 2017 азæй.
Банысан кæнын хъæуы уый, æмæ газет «Правда»-йы юбилейон номыры 1945 азы 9 майы рауагъды официалонæй мыхуыр æрцыдис, Советон Цæдис кæй фæуæлахиз фашистон Германыл.
«Газета Победы»-йы проекты инициатор ссис Хуссар Ирыстоны минæварад Татарстаны уагъдцæуæг форум «Ты нужен своей стране»-йы, æмæ хорз уаид, цæмæй ацы проект уа æхсæнадæмон æмæ Георгийы лентæйау парахат цæуид горæтты 9-æм майы бæрæгбоны цытæн», – загъта «Иууон Алани»-йы минæвæрттæй сæ иу.
Акцийæн йæ сæйраг нысан у рæзгæ фæлтæрæн сæ зæрдыл æрлæууын кæнын, цавæр аргъæй æлхæд æрцыд Уæлахиз.
Уымæй дарддæр ма волонтертæ ӕмӕ скъоладзаутӕ байуардзысты дыууӕ мин Георгийы лентæйæ фылдæр. Сау хæххытæ нысан кæнынц фæздæг, бурбын сырх та – арт. Афтæ та йæ хонынц сыгъдæг Георги Уæлахиздзауы дзуары кадæн. Лентæ дарын хъæуы риуыл, галиуæрдыгæй.
Хæсты ахæм лентæ кодтой тырысайыл, стæй йæхи хъæбатырæй чи æвдыста, уыдоны дзы хорзæхджын кодтой. Уыцы хорз миниуæг ис абон дæр. Акци “Георгийы лентæ”-йы азæй-азмæ цы бæстæтæ архайынц, уыдоны нымæц фылдæр кæны.
Акци “Георгийы лентæ”-йы хъӕппӕрис фӕзынд 2005 азы медиа къорд “Россия сегодня” æмæ ӕхсӕнадон организаци “Студенческая община”-йы ӕмархайдӕй. Уымӕй фӕстӕмӕ акци ссис ӕрмӕст ӕппӕтуӕрӕсейон нӕ, фӕлӕ ма ӕхсӕнадӕмон дӕр.
Уæлахизы символтæ бирæ æмæ алыхуызон сты, фæлæ сæ нысаниуæг стыр у. Уыдон нын нæ адæмæн, нæ кæстæр фæлтæрæн сæ зæрдыл лæууын кæнынц, цæмæй уарзæм æмæ цыт кæнæм нæ Райгуырæн бæстæйæн. Ацы символтæ æвдисæн сты, нæ зæрдыл кæй дарæм æмæ сæрбæрзонд кæй стæм нæ салдатты хъæбатырдзинæдтæй.
Стыр Фыдыбæстæйон хæст цы бирæ зиæнттæ æрхаста, уыдоны нымæц у æгæрон. Хæсты азты рæстæджы Советон Цæдисæй æфсæддон службæгæнджытæ æмæ сабыр цæрджытæ фæмард 26 600 000 адæймаджы. Хæсты рæстæджы Советон Цæдисы Гарзджын тыхты зиæнттæ уыдысты 8 668 400 адæймаджы, чи фæцæфтæ, чи фæрынчын сты, уыдоны нымæц уыдис 15 205 592 адæймаджы, уацары ба-хаудтой – 4 559 000 адæймаджы, гитлерон мæлæты лагерты куынæг æрцыдысты Советон Цæдисы 11 000 000 æмбæстаджы, хæсты рæстæджы пырх æрцыдысты 1710 горæты æмæ горæтон типы поселочы, куынæг æрцыдысты – 70 000 хъæуы, пырх æрцыдысты 31 850 заводы æмæ фабрикæйы, 1135 шахтæйы, 65 000 км æфсæнвæндаджы, тауæн фæзуæттæ фæкъаддæр сты 36 800 000 гектары.
1945 азы 9 Май – советон адæмы Уæлахизы бон гитлерон Германыл æнустæм уыдзæн, ссæдзæм æнусы æппæты уæззаудæр æмæ сæйрагдæр цау, лæгдзинад æмæ фидардзинады, Фыдыбæстæмæ уарзондзинады æмæ йыл æнувыд уæвыны нысан. Мах ыл æмбæлæм, хæстон фæлтæртæн кад кæнгæйæ, уыдоны фæрцы нæ бæстæ æмæ æппæт дуне фервæзтысты æвирхъаудæр фыдбылыз – фашизмæй.
Не ‘мбæстæгты хъæбатырдзинад, сæ рухс нæмттæ нæ рох не сты, фыст æрцыдысты цыртдзæвæнтыл, мемориалты, чингуыты, мысинæгты. Æнæмæнг, баззайдзысты Ирыстоны хъæбатырдзинад æвдисæг азфысты. Уый у нæ истори, мах дзы сæрыстыр стæм, кæстæр фæлтæртæн æй фæдзæхсæм, уадзæм сын æй, куыд æппæты зынаргъдæр хæзнатæ æмæ бынтæ, афтæ.
Comments are closed, but trackbacks and pingbacks are open.