Спорт

УÆЗЗАУ АТЛЕТИКÆ

Уæззау атлетикæйæ Уæрæсейы чемпион ссис Наниты Тимур. Уымæн сыгъзæрин майдан рамбулын бантыст 109 кг уæзы категорийы. Уый равдыста 390 кг бæрæггæнæн (175+215). Ацы уæзы категорийы æртыккаг бынат та бацахста Годжыцаты Дмитри. Уый та дыууæ истæн скодта 373 (168+205).

102 кг уæзы категорийы æвзист призер ссис Къæбысты Артур. Уый равдыста 365 кг бæрæггæнæн (160+205).  Бронзæйон призер та ссис Кокайты Сослан. Уый архайдта +109 кг уæзы категорийы. Сосланæн бантыст дыууæ истæн 395 кг сисын (184+211). Чызджыты ‘хсæн ерысты та бронзæ майдан бафтыд Хъайтыхъты Аллæйы къухты. Уый та йæ цæттæдзинад фæлвæрдта 64 кг уæзы категорийы. Аллæ равдыста 201 кг бæрæггæнæн (93+108).

Мæскуыйы æмбырдгонд командæйы сконды чемпионаты бронзæ майдан рамбылдта Хуыгаты Олег.  Уый 81 кг уæзы категорийы архайгæйæ, дыууæ истæн равдыста 329 кг бæрæггæнæн.

 

ТЕННИС

Хъæрæцаты Аслан æмæ Елена Веснина рахызтысты æмхæццæ къæйтты ‘хсæн ерысты «нæвæрттæ Деми Схюрс æмæ Уэсли Колхофавы. Фембæлд фæцис 6:4, 6:1 хыгъдæй. Уæрæсейаг теннисисттæ æрдæгфиналы та фæуæлахиз сты америкæйаг къæйттæ Николь Мелихар æмæ Раджив Рамыл – 6:7, 6:2, 10:8.

Ныр финалы сæ ныхмæлæууæг уыдзæн америкæйаг Дезир Кравчик æмæ бритайнаг Джо Солсберийы къай.

Ерыстæ фæуыдзысты 13-æм июны. Йæ призон фонд у 34 милуан евройы.

 

ГРЕКЪАГ-РОМАГ ХЪÆБЫСХÆСТ

Новосбирскы уагъд æрцыд Петр Барбашовы номарæн æппæтуæрæсейон турнир грекъаг-ромаг хъæбысхæстæй. Ерысты сæхи хорз равдыстой ирон богалтæ. 67 кг уæзы категорийы турниры уæлахиздзау ссис Гугкаты Давид. Бронзæйон призертæ та систы Дойаты Герман (60 кг) æмæ Джиоты Дмитри (82 кг).

ХУРИТЫ Батрадз