Спорт

ЛÆВÆРД ЫН ÆРЦЫД УФ-ЙЫ СПОРТЫ ДÆСНЫЙЫ КАДДЖЫН НОМ

Зассеты Арсæмæгæн лæвæрд æрцыд Уæрæсейы спорты дæсныйы кадджын ном. Уый фæдыл ын уæгъдибар хъæбысхæстæй Мæскуыйы чемпионаты размæ æвдисæндар æмæ риуылдарæн нысан радта уæгъдибар хъæбысхæстæй Мæскуыйы æмбырдгонд командæйы сæйраг тренер Александр Прохоров.

Ерыстæ уагъд цыдысты спортивон комплекс «Олимпийская деревня-80». Чемпионаты иууыл уæззаудæр уæзы категорийы хайад райста Арсæмæг йæхæдæг дæр  æмæ бацахста дыккаг бынат. Финалы фембæлд иннæ ирон богал Хуыбиаты Хасанимæ. Банысан кæнын хъæуы уый дæр, æмæ 2019 азы Арсæмæг кæй ссис æвзæнгты ‘хсæн дунейы чемпионаты уæлахиздзау.

ШАШКÆТÆ

Фыдыбæстæ хъахъхъæнæджы боны цытæн ахуырдзауты ‘хсæн уагъд æрцыд Цхинвалы районы чемпионат шашкæтæй. Ерыстæ уагъд фæцæуынц æрвылаз дæр æмæ сæ хайад  райсынц районы скъолаты командæтæ. Ныр дæр сæйраг призтыл тох кодтой 6 командæйы.

Ерыстæ байгом кодта РХИ-йы шашкæты федерацийы президент Лолоты Барис. Уый, фыццаджыдæр, бузныг загъта ахуыргæнджытæн, кæцытæ бацæттæ кодтой командæты.

Ерыстæ байгом кæныны церемонийы хайад райста Цхинвалы районы администрацийы сæргълæууæджы хæдивæг Туаты Алан. Паддзахады сæргълæууæджы номæй чемпионаты хайадисджытæн арфæ ракодта спорты фарстаты фæдыл президенты æххуысгæнæг Джиоты Руфин.

Ерысты регламентмæ гæсгæ командæтæ кæрæдзиимæ акодтой фæйнæ хъазты. Алы командæйы дæр бахъуыд фæйнæ 5 партийы акæнын. Сæ фæстиуджытæм гæсгæ иууыл фылдæр очкотæ æрæмбырд кодта Къостайыхъæуы командæ æмæ бацахста фыццаг бынат. Дыккаг бынат фæцис Дменисы командæйы æмæ æртыккаг бынат та бацахста  Къостайыхъæуы дыккаг командæ.

Хорзæхтæ дæттыны церемонийы хайад райста нæ республикæйы шашкæтæй иууыл хуыздæр хъазджытæй сæ иу Джиоты Павел. Ерысты уæлахиздзаутæ æмæ призертæ хорзæхджын æрцыдысты кубоктæ æмæ майдантæй. Уыцы нымæцы хорзæхджын æрцыд турниры æвзонгдæр хайадисæг Дудайты Элинæ дæр. Спортивон мадзæлттæ активонæй кæй равдисы, уый тыххæй ерысты организатортæ Кады грамотæйæ схорзæхджын кодтой информацион агентад «Рес»-ы уацхæссæг Хуыбиаты Заринæйы.

ЕРЫСТÆ ДЫККАГ ЭТАП

Спортивон галуан «Олимп»-ы уагъд æрцыд ленк кæнынæй ерыстæ «Золотая рыбка»-йы дыккаг этап. Йæ хайадисджытæ сæ цæттæдзинад фæлвæрдтой ленк кæныны ахæм стиль куыд баттерфляйæ.

Ерысты уæлахиздзаутæ систы: Уалыты Тамилæ, Бежанты Давид, Джиоты Кристинæ, Лалыты Арсен, Уалыты Даянæ, Уалыты Александр, Мулдарты Валерия, Быценты Арсен, Тыджыты Дианæ, Тасойты Арсен, Гуыбаты Мария æмæ Чиаты Михаил.

ХУРИТЫ Батрадз