Скусдзæн лагерь

«2023 азы æмбисы эксплуатацимæ лæвæрд æрцæудзæн Мзиугомы арæзтцæуæг лагерь», — фехъусын кодта Арæзтадон фирмæ «Бадо»-йы прораб Къæбулты Валери.

Арæзт фесты фондз æртæуæладзыгон корпус. Кусджытæ кæнынц электромонтаж æмæ сантехникон куыстытæ. Коттеджтæм хæстæг арæзт æрцыд административон корпус дæр. Уым кусæн хатæнты æмрæнхъ ис, лагеры персонал кæм цæрдзысты, ахæм улæфæн бынæттæ дæр. Кусджытæй иутæ архайынц лагерь цы 4 гектары территорийыл арæзт цæуы, уым зæххыбын доны хæтæлтæ аразыныл. Куыд зонæм, афтæмæй лагерь арæзт цæуы Инвестпрограммæйы фæлгæтты. Хицæн ын æрцыд 240 милуан сомы. Ам уыцы иу рæстæг сæ бон баулæфын уыдзæн 150 адæймагæн. Стационарон лагерь канд сæрдыгон улæфтæн лагерь нæ уыдзæн, фæлæ ма, афæдзы алы афон дæр каникулты рæстæджы кæстæр сабитæ æмæ фæсивæды минæвæрттæ кæм улæфдзысты, ахæм бынат.

Ам уагъд цæудзысты алыгъуызон фæсивæдон форумтæ. Лагеры территорийыл арæзт цæуы, дыууæ хъазæн фæзы беседкæтимæ, улæфджытæ-иу æхсæв арты фарсмæ кæм абадой, асфальт къахвæндаг æмæ афтæ дарддæр. Лагеры уыдзæн физкультурон хосгæнæндон. Уымæн æмæ ам баулæфыны фадат хъуамæ уа се ‘нæниздзинад мæгуырау кæмæн у, ахæм сывæллæттæн дæр. Уыдон хæрзиуæгæн корпустæй сæ иуы арæзт æрцыд пандустæ.

Арæзтад æмæ архитектурæйы министрады куыд зæгъынц, афтæмæй Мзиугомы стационарон лагеры арæзтад дих æрцыд æртæ этапыл. Ивгъуыд аз уым цыд сыгъдæггæнæн куыстытæ, ацы аз сын саразын цы бантыст, уыдон сты графикæй бирæ раздæр — 2023 кæрон у объектæн йæ цæттæйы æмгъуыд. Фæлæ куыстытæ цырд темптæй арæзт цæуынц, æмæ лагерь сцæттæ уыдзæн 2013 азы июлы мæймæ.

Министрады ма куыд зæгъынц, афтæмæй лагеры арæзтады инициатортæ уыдысты Ахуырад æмæ зонады министрад. Æрвылаз дæр уыдон сорганизаци кæнынц сæрдыгон лагертæ скъолаты базæйыл. Фæлæ сын уыйбæрц уавæртæ нæ вæййы. Стæй боныгон лагеры, кæцы конд æрцæуы скъола-интернаты базæйыл, баулæфынц æрмæстдæр кæстæр фæлтæр. Фæлæ хистæркъласонты дæр, цæмæй сæ рæстæг хъæлдзæгæй æрвитой æмæ сæ галиу митæм ма æвдæла, уый тыххæй æнæмæнг хъуыд ахæм стационарон лагерь. Ацы нырыккон лагерь куы сырæза, уæд æм улæфынмæ хондзысты æфсымæрон республикæты фæсивæды минæвæртты дæр, каникулты рæстæджы. Лагеры сараздзысты ирон культурæ æмæ традициты бындурыл ахуыргæнæн ахæм чысыл музей дæр.

УАЗÆГТЫ Марфа