Скъолайон формæйæ – рауагъдон дарæсмæ

Ацы аз хуссар ирыстоны традицион рауагъдон бал уагъд æрцыд 435 рауагъдонæн.

Æнæмæт сабибонтæ скъолайы ахуыры азтæ… Рæсугъд æмæ æнæмаст дуджы æнæферохгæнинаг тæлмæнтæ сæвзæрын кæнынц адæймагмæ ацы дзырдтæ. Уæлдай тынгдæр йæ зæрдæмæ бахъарынц, скъолайы рауагъдоны ном куы фæхæссы, уæд. Кæд тынг фæбæллы ахуыр фæуынмæ, уæддæр фæстаг дзæнгæрæджы зæлтæ куы айзæлынц, уæд йæ зæрдæйы цавæрдæр æнкъарддзинад райгуыры, уымæн æмæ аивгъуыдтой йæ сабидуг æмæ ахуыры азтæ, разæй та – ног цард æнхъæлмæ кæсы, зæгъгæ. Ацы бон ма сæ зæрдæтæм арф бахъары сæ уарзон ахуыргæнджыты лæггад, кæцытæ сыл ныййарæгау аудыдтой. Уымæ гæсгæ сын уыдон царды вæййынц фæзминаг. Ахæм зæрдæйыуаг вæййы ахуыргæнджытæн сæ-хицæн дæр.

Ацы аз дæр та скъолайæ рацыдысты ног рауагъдонтæ, айзæлдис сын фæстаг дзæнгæрæг æмæ радтой рауагъдон фæлварæнтæ дæр. Уыдоны фæстæ ма сæм æнхъæлмæ кастис æрмæстдæр рауагъдонты бал. Нæ горæты скъолаты рауагъдонтæн уый уагъд æрцыдис 23 июны. Ацы  бон  бæрæгбонон  фæлыстæй  сæ  ахуыргæнджытæ æмæ ныййарджытимæ æмбырд кодтой «Чермен»-ы киноконцертон залы раз. Сæ зæрдæтæ ма сын хъæлдзæг дардтой музыкæйы æхцон зæлтæ дæр. Киноконцертон залмæ рауагъдонтæ хуынд цыдысты сырх гауызыл скъолаты ранымадмæ гæсгæ æмæ сыл стыр цины æнкъарæнтимæ æмбæлдис нæ республикæйы Президент Бибылты Анатоли дæр. Стæй сæм аив фæлыст залы æнхъæлмæ кастис цымыдисон бæрæгбонон мадзал. Рауагъдонтæм ма арфæ кæнынмæ æрбацыдысты Республикæ Хуссар Ирыстоны Хицауады Сæрдар Пухаты Эрик, РХИ-йы Ахуырад æмæ зонады министр Гасситы Натали æмæ æндæр  официалон адæймæгтæ.

Зæрдиаг арфæйы ныхæстимæ байгом рауагъдонты бал. Уый фæстæ сценæмæ фæхуыдтой нæ республикæйы паддзахадон ансамбль «Симд»-ы артистты, кæцытæ рауагъдонтæн балæвар кодтой музыкалон номыр, аив сæххæст кодтой ирон нæртон кафт «Симд».

Зæрдиаг арфæтæ ракодта нæ сомбонаразæг фæсивæдæн РХИ-йы Президент Бибылты Анатоли:

– Арфæ уын кæнын, зынаргъ рауагъдонтæ, скъола каст кæй фестут, уый тыххæй! Ацы бæрæгбон сымах уæ зæрдыл дардзыстут цæрæнбонтæм. Сымахæй бирæтæ хъуыды кодтой, зæгъгæ, тагъддæр куы аивгъуыиккой ацы ахуыры азтæ, фæлварæнтæ, фæлæ мæн уырны, рацæу-дзæн рæстæг, æмæ сымах мысдзыстут уе скъолайон рæстæг æмæ ахуыргæнджыты. Сымах иуæндæс азы размæ бахызтыстут скъолайы къæсæрæй æмæ абон рахызтыстут уыцы къæсæрæй царды стыр фæндагмæ. Фæнды мæ, цæмæй сымахæн уыцы фæндаг уа рæсугъд æмæ лæгъз. Кæд æмæ уыцы фæндагыл цæугæйæ, зындзинæдтыл æмбæлат, уæддæр-иу сыл алыхатт дæр уæлахиз кæнут.

Бибылты Анатоли ма арфæ æмæ бузныджы ныхæстæ загъта ахуыргæнджытæн фæсивæды хъомыл кæныны хъуыддагмæ се стыр хайбавæрды тыххæй. «Ахуыргæн-джытæ сымах æрмæст ахуыры азты нæ фæуарзынц, фæлæ кæддæриддæр. Уыдон иуæндæс азы балæвар кодтой сымахæн æмæ уын амыдтой зонд, кодтой уæ ахуыры бæрзæндтæм, æмæ уæ ахуыргæнджытæ сты уый аккаг, цæмæй сын стыр бузныг æмæ арфæйы ныхæстæ зæгъат», -ба-нысан кодта Президент Бибылты Анатоли.

Бæрæгбонон мадзалы рауагъдонтæ бæстæйы сæргълæууæгæн радтой альбом сæ къамтимæ. Рауагъдонты бал адарддæр кодтой музыкалон номыртæ æмæ арфæйы ныхæстæ. Ам ма фæсивæд ацаходыдтой стыр бæрæгбонон тортæй.

Ацы цымыдисон мадзалы фæстæ та ра-уагъдонтæн Театралон фæзуаты уагъд æр-цыдис бæрæгбонон концерт æмæ фейерверк.

Нæ зынаргъ рауагъдонтæн нæ зæрдæтæ дæр зæгъынц стыр æнтыстытæ царды, æппæт хорздзинæдтæй хайджын уæнт æмæ сабыр арвы бын сæ фидæны рæсугъд цард аразæнт!

Нæ уацх.