20-æм июны республикæйы столицæйы уагъд æрцыд рауагъдонты бал. Уый фæсивæдæн ссис традицион се скъолайы ахуыры азы фæуды.

Цхинвалы Театралон фæзуат ацы бон уыд бæрæгбонгъуыз. Ацы цытджын æмæ хъæлдзæг боны æрæджыйы скъоладзаутæ царды æндæр къæпхæнмæ кæй схызтысты, уый фæдыл сын хореографион студийы залмæ раарфæ кæнынмæ æрбацыдысты республикæйы къухдариуæгады минæвæрттæ, сæ сæргъ Республикæ Хуссар Ирыстоны Президент Тыбылты Леонид, афтæмæй. Рауагъдон балмæ æрбацыдысты скъолаты ахуыргæн-джытæ, рауагъдонты ныййарджытæ æмæ хиуæттæ. Мадзалы райдианы рауагъдонтæ цытджын æгъдауæй къæйттæй сырх гауызыл музыкæйы зæлтæм цыдысты æмæ сæ алчидæр йæ бынат ссардта бæрæгбонвæлыст залы. Залмæ бахизгæйæ, республикæйы æппæт скъолаты рауагъдонтæй-иу бирæтæ загътой, уæлдæр ахуырад райсыны фæстæ сæ райгуырæн бæстæ — Ирыстонæн кæй лæггад кæндзысты зæрдиагæй æмæ дзы кæй фæллой кæндзысты рæсугъд цард аразгæйæ.

Æрæмбырдуæвджыты раз ныхас кæнгæйæ, паддзахады сæргълæууæг банысан кодта, зæгъгæ, абоны бон рауагъдонтæ бахъуыды кæндзысты цæрæнбонтæм, уымæн æмæ фæсивæдæн райдыдта ног цард.

«Абон сымах фылдæр хъуыды кæнут уæ дарддæры професси æмæ  цард аразыныл æмæ уын мæ цæст уарзы, цæмæй уæ равзаргæ дæсныйæдты уат хорз специалисттæ. Мæн фидарæй уырны æмæ сымах скъолаты, стæй уæлдæр  ахуыргæнæндæтты цы зонындзи-нæдтæ райсат, уыцы зонындзи-нæдтæ ахъаз кæй уыдзысты не ‘взонг паддзахады рæзтæн, уый. Абон уын арфæ кæнын уе ‘ппæтæн дæр æмæ уын мæ зæрдæ зæгъы, сæйраджыдæр, уæ ахуыры стыр æнтыстытæ. Ахуыр кæныны хъуыддаг сымахæн у сæйрагдæр æмæ максималон æгъдауæй тырнут ахуыры бæрзæндтæм. Æппæт ацы азты дæргъы сымахæн уæ фарсмæ уыдысты уæ иууыл æввахсдæр адæймæгтæ — уæ ныййарджытæ æмæ ахуыргæнджытæ, кæцытæ сæ тыхтыл нæ ауæрдгæйæ, хъомыл кодтой сымах. Æмæ нæ уырны, сымах уæ хъомылгæнджыты æмæ Ирыстоны кад дæлæмæ кæй не  ‘руаддзыстут, уый. Арфæгонд ут ноджыдæр!», — загъта Тыбылты Леонид.

Йæ раныхасы ма Президент Тыбылты Леонид рауагъдонтæн баныфсæвæрдта республикæйы арæзт кæй цæудзæнис æппæт дæр, цæмæй уæлдæр ахуырады фæстæ куыстæй ифтонг цæуой.

«Мах æппæт дæр араздзыстæм, цæмæй уын республикæйы уа куысты бынæттæ. Уæ разы цы хæстæ æрæвæрдтат, уыдон уæндонæй аразут æнæрлæугæйæ, кæд уæ разы исты цæлхдуртæ лæууа,  уæддæр. Уæндонæй цæут размæ æмæ размæ кæнут Хуссар Ирыстоны», — банысан кодта Президент Тыбылты Леонид. Уый фæстæ бæрæгбонон концерты, рауагъдонтæ скъола кæй фесты, уый фæдыл сын арфæ кодтой Хуссар æмæ Цæгат Ирыстоны аивадон коллективтæ дæр. Рауагъдонтæн ма сюрпризы хуызы сценæмæ хаст æрцыдис бæрæгбонон торт цырæгътимæ, кæцыты традицимæ гæсгæ  ахуыссын кодтой. Уый фæстæ бæрæгбонон изæр адарддæр кодтой рауагъдонтæ Театралон фæзуаты, хъæлдзæгæй сæ рæстæг æрвитгæйæ.

Афтæ ахицæн ис «рауагъдон бал-2016».

Нæ уацх.

Comments are closed, but trackbacks and pingbacks are open.