Скъоладзауты ‘хсæн предметон олимпиадæтæн стыр нысаниуæг ис, кæцыты фæрцы уыдон ноджы тынгдæр разæнгард кæнынц зонындзинæдтæ райсынмæ. Уымæ гæсгæ æрвылаз дæр нæ республикæйы иумиагахуырадон уагдæтты уагъд фæцæуынц хицæн предметтæй олимпиадæтæ. Ацы куысты фæстæ нæ лæууы Цхинвалы районы адæмон ахуырады хайад дæр. Фыццаг уал хицæн предметтæй олимпиадæтæ уагъд æрцæуынц скъолатæн сæхи мидæг, уый тыххæй ахуыргæнджытæ хайады методисттæй райсынц æмбæлон уагæвæрдтæ. Æрæджы дæр та ахуыргæнджытæ сæ хъомылгæнинæгтæн ауагътой ахæм ахсджиаг æмæ æнæмæнгхъæуæг мадзал æмæ дзы хайад райстой, ахуыргæнджытæ тынгдæр сæ зæрдæ кæуыл дардтой, ахæм ахуыргæнинæгтæ. Районы адæмон ахуырады хайады сæргълæууæг Козаты Олег куыд банысан кодта, афтæмæй олимпиадæ уагъд æрцыд ирон æвзаг æмæ литературæ, уырыссаг æвзаг æмæ литературæ, математикæ, истори æмæ биологийы предметтæй. Скъоладзаутæ сæ зонындзинæдтæ æвдыстой фыссыны куыстæй. Иууыл хуыздæр фæстиуджытæ равдыстой æмæ республикон олимпиадæйы дарддæр сæ зонындзинæдтæ æвдисдзысты ирон æвзагæй Рустауы астæуккаг скъолайы 10-æм къласы ахуыргæнинаг Кокойты Батрадз, Къостайыхъæуы астæуккаг скъолайæ – Джергаты Альбинæ æмæ Дменисы скъолайæ та – Дудайты Эльбрус. Уырыссаг æвзаг æмæ литературæйæ иууыл хуыздæр арæхстдзинад равдыста Дменисы скъолайы ахуырдзау Джиголаты Аланæ, хъыгагæн, кæй фæрынчын, уымæ гæсгæ хайад нæ райсдзæн республикон олимпиадæйы. Математикæйæ тынгдæр сарæхст Къостайыхъæуы скъолайы ахуыргæнинаг Саулохты Аннæ, историйæ та ацы скъолайы 11-æм къласы ахуыргæнинаг Хуыбиаты Маирбег æмæ биологийы предметæй та – Сатихъары астæуккаг скъолайы 9-æм къласы ахуыргæнинаг Къæбулты Дзамболат æмæ Рустауы скъолайы минæвар Кокойты Батрадз. Ахуыргæнинæгты хорз бацæттæ кодтой сæ ахуыргæнджытæ Плиты Заирæ, Коцты Мæдинæ, Дудайты Земæ, Къусраты Анжелæ, Саулохты Кристинæ æмæ Тедеты Маринæ.
Ахуырады хайады сæргълæууæг Козаты Олег ма радзырдта, сæ куысты цы ногдзинад ныббиноныг кодтой, уый тыххæй дæр. Цæвиттон, раздæр азты дæр уæвынад кодта методбаиугæнды куыст, фæлæ цасдæр рæстæг бамынæг. Ахæм баиугæнд хорз ахъаз у ахуыргæнджытæн сæхицæн дæр, уым æрдзурынц ахуыр-хъомыладон куысты бирæ фарстатыл, стæй кæрæдзийæ дæр исынц куысты фæлтæрддзинад. Хайады ног сæргълæууæджы хъæппæрисæй ахæм методбаиугæндтæ сырæзт ирон æвзаг æмæ литературæйæ, историйæ æмæ райдиан кълæстæн та – уырыссаг æвзагæй. Бацæттæ кодтой плæнттæ, куысты график æмæ уал ауагътой цалдæр рабадты. Методбаиугæнды куыст тынг феххуыс уыдзæн ахуыргæнинæгтæн дæр сæ ахуыр-хъомыладон куысты. Горæты скъолатæ пайда кæнынц интернетæй, фæлæ нæ ахуыргæнæн уадæттæ цух сты уымæй, æрмæст цалдæр скъолайы йедтæмæ. Цард размæ цæуы æмæ æнæмæнг не скъолатæ дæр хъуамæ пайда кæной уыцы фæрæзтæй.
ХУЫБИАТЫ Никъала
Comments are closed, but trackbacks and pingbacks are open.