Бæрæг куыд у, афтæмæй Цхинвалы районы администрацийы адæмон ахуы-рады хайады ныртæккæ ис 9 астæуккаг æмæ иу та æнæххæст астæуккаг скъолайы, сывæллæтты дыууæ рæвдауæндоны Къостайыхъæу æмæ Дменисы æмæ иу та нывгæнæн скъола-студи. Хъыгагæн, ивгъуыд аз йæ куыстæй æрлæууыд Дампъалеты астæуккаг скъола, ахуырдзаутæй кæй сцух, уый аххосæй.

Вазыгджын уавæртæм нæ кæсгæйæ, 2021 азы районы ахуырады хайад бакодта нысанмæздæхт куыст ахуыры гъæд æмæ ахуыргæнинæгты хъомылад ноджы фæхуыздæр кæныныл. Къалендарон азы дæргъы хайады кусджытæ планмæ гæсгæ цыдысты ахуыргæнæн уагдæттæм методикон æххуыс сын бакæныны ныса-нæн. Дзæвгар рæстæг бахардз кодтой кусæн программæтæ саразын, тематикон плæнттæ, ахуырдзауты ахуыргæнæн-фыссæнгарзы ифтонггæрзтæ баххæст кæнын, фыссыны куыстыты нормæтæ æмæ хуызтæ æххæстбæрцæй сæххæст кæнын æмæ ахуыргæнинæгты зонындзинæдты æмвæзад фæбæрзонддæр кæныны хъуыддаджы. Æппæт скъолаты дæр предметтæм гæсгæ уагъд æрцыдысты контролон куыстытæ, банысангонд ахуыргæнæн предметтæй та – олимпиадæтæ. Æмбæлон æгъдауыл уагъд æрцыдысты районон олимпиадæтæ, фæлæ уыимæ банысан кæнын хъæуы, бæрæг уавæртæм гæсгæ хайады совет аскъуыддзаг кодта, йæ хайадисджытæ кæй нæ уыдысты республикæйы æмвæзадыл.

Ахуыры цыд бахъыгдардта, æнæхъæн дунейыл цы низ апарахат, уый æмæ уымæ гæсгæ республикæйы иумиагахуырадон уагдæттæ ахызтысты дистанцион ахуырмæ. Дистанцион ахуыртæ уагъд цыдысты Къостайыхъæу, Дменис æмæ Сатихъары астæуккаг скъолаты интернет-хызæджы æмæ ахуырдзаутæн фадат кæм нæ уыд уымæй пайда кæнынæн, уыцы скъоладзаутæн та хæслæвæрдтæ лæвæрдтой сæ предметты ахуыргæнджытæ. Зæгъын хъæуы, карантин фæдфæдылон æгъдауæй дарддæр кодта йæ куыст æмæ уый та хъыгдардта ахуыры цыд. Февралы мæйы адæмон ахуырады методисттæ уыдысты скъола-ты æмæ ахуыргæнинæгты цæттæ кодтой районон олимпиадæмæ. Ивгъуыд аз 30 ахуыргæнæгæй фылдæр ацыдысты радон аттестацийы æмæ ахуыргæнджыты иннæ хай та уыдысты сæ квалификаци фæбæрзонддæр кæныны курсыты. Хайад æмбæлон организациимæ иумæ бакуыста, æнахъомты ‘хсæн барадон фæтк чи хæлдта, уыдонимæ. Систематикон æгъдауæй цыдысты скъолатæм æмæ уагътой хъомыладон мадзæлттæ, бæрæг кодтой, скъолайы фæтк чи хæлдта, уыцы ахуырдзауты æмæ зынхъомылгæнæн сывæллæттимæ кодтой æмбæлон куыст.

Хайады стыр хъусдард здæхтой къласæн æмæ скъолайæн æддейæ хъомыладон куыстмæ, кæцы уагъд фæцæуы сфидаргонд къалендарон планмæ гæсгæ. Æркастысты æмæ бахастæуыд коррективтæ къласгæстæ æмæ скъолаты организаторты сфидаргонд плæнтты хъомы-ладон куыстмæ. Районы скъолаты ахуыргæнинæгтæ хайад райстой район æмæ республикæйы фæлгæтты уагъдцæуæг мадзæлтты, куыд Республикæйы бон æмæ Ирон æвзаджы боны. Июны мæйы та уæрæхæй банысан кодтой рауагъдонты мадзал.

Хайады сæйраг специалистты фæрцы бакуыстæуыд ахуыр-педагогон проблемæтæ рабæрæг кæныны æмæ ауагъдæ-уыд æнæмæнгхъæуæг консультаци æмæ практикон æххуыс уыдон аиуварс кæны-ны фæдыл. Уагъд цыдысты индивидуалон консультацитæ скъолаты къухдариуæггæнджытимæ ахуыры фарстатыл.

Уагъд æрцыдысты организацион мадзæлттæ æмæ æнæмæнгхъæуæг методикон æххуыс скъолаты къухдариуæггæнджытæ æмæ ахуыргæнджытæн районы скъолаты иумиаг аттестаци æмæ ахуыры аз æнтысгæйæ ахицæн кæныны тыххæй. Уыимæ ма скъолаты сифтонг кодтой къласæй къласмæ æмæ рауагъдонты фæлварæнтæн æмбæлон æрмæджытæй.

2021-2022-æм ахуыры аз бакодтой бæрæг куыст ахуыры азы райдианыл æмбæлон æгъдауæй сæмбæлыны сæраппонд, афтæ ма ахуыр-хъомыладон процесс ахуыргæнæн уагдæтты сорганизаци кæныны тыххæй. Скъолаты сифтонг кодтой ахуыргæнæн-педагогон документацийæ дæр. Æхсызгон у уый банысан кæнын, æмæ Къостайыхъæуы иумиагахуырадон скъолайы цур æнтысгæйæ кæй архайы нывгæнæн скъола-студи (йæ къухдариуæггæнæг у РХИ-йы адæмон нывгæнæг Гæбæраты Барис). Студийы хъомылгæнинæгтæ сты, куыд республикæ, афтæ йæ арæнтæй æддейæ дæр активон хайадисджытæ æмæ бирæ хæттыты райстой бæрзонд хорзæхтæ. Республикон конкурсы фæстиуджытæм гæсгæ Дменисы сывæллæтты рæвдауæндоны хъо-мылгæнинæгтæ та хорзæхджын æрцы-дысты дыккаг къæпхæны дипломæй.

Иумиагахуырадон уагдæтты æнтыстыты æмрæнхъ ис цухдзинæдтæ дæр, уыдон аиуварс кæныныл та хъуамæ бакусой куыд скъолаты разамонджытæ, афтæ адæмон ахуырады хайады кусджытæ дæр. Скъолаты нæй химийы кабинеттæ, нæй сæм ацы предметæй фæлварæнтæ уадзынæн реактивтæ. Цæстуынгæ æрмæджытæ нæй ирон, уырыссаг æмæ англисаг æвзæгтæй. Спортивон зал ис æрмæстдæр Къостайыхъæуы астæуккаг скъолайы, иннæ иумиагахуырадон уагдæтты не сты, кæнæ та дзуапп нæ дæттынц нырыккон домæнтæн. Æрвылаз дæр ахуыргæнинæгты контингент кæны къаддæр æмæ ахæм уавæр дарддæр куы кæна, уæд скъолаты нымæц фæкъаддæр уыдзæн. Ахуыргæнджытæ æнæмæнг хъуамæ рацаразой сæ куыст, уадзой уæлæмхас ахуыртæ, методкабинет та хъуамæ фæтынгдæр кæна йæ куыст уавæр рараст кæныны нысанæн.

                                                                Хуыбиаты Никъала

Comments are closed, but trackbacks and pingbacks are open.