УФ-йы Адæмты иудзинады боны цытæн Цхинвалы уагъд æрцыд турнир шахматтæй. Хайад дзы райстой 40 спортсмены бæрц Хуссар Ирыстон, Донецкы Адæмон Республикæ æмæ РЦИ-Аланийæ.
«РХИ-йы шахматты федераци»-йы президент Саулохты Георги куыд фехъусын кодта, афтæмæй фæстаг азты нæ республикæйы шахматистты нымæц бæрæг фæфылдæр. Ныр турнирмæ фæхуыдтам иууыл цæттæдæрты.
Ерысты партитæ иууылдæр акæнгæйæ, уæлахиздзау ссис æвзонг лæппу Танделаты Арсени. Уый турниры хъахъхъæдта РЦИ-Аланийы спортивон кад. Йæ фыд у Хуссар Ирыстоны Теделеты хъæуæй рацæугæ. Уымæн фадат куы фæвæййы, уæд йæ сывæллæтты æркæны Хуссар Ирыстонмæ. Ерысты дыккаг бынат бацахста ноджы иу цæгатирыстойнаг спортсмен, спорты дæснытæм кандидат Къораты Хъазбег. Æртыккаг та ссис Донецкы Адæмон Республикæйæ æвзонг шахматист Михаил Логачев.
Хуссарирыстойнаг спортсментæй иууыл хуыздæр бæрæггæнæнтæ равдыста Гæбæраты Ацæмæз. Скъоладзауты ‘хсæн та фыццаг ссис Джыгкайты Артур. Студентты ‘хсæн фылдæр баллтæ æрæмбырд кодта Къодоты Андрей. Чызджыты ‘хсæн та иууыл цæттæдæр разынд Тыбылты Аланæ.
ДЗЮДО
Ирон дзюдоист Коцойты Зелим ссис Европæйы чемпион. Ерыстæ уагъд цыдысты Францы. Зелим архайы Азербайджаны тырысайы бын. Уый 100 кг уæзы категорийы хæцгæйæ, финалмæ цæугæйæ фæуæлахиз Стыр Британи, Хорвати, Испан æмæ Уæрæсейы минæвæрттыл. Сæйраг тохы та фæуæлахиз Гуырдызстоны командæйы уæнг Илья Суламанидзейыл.
Чызджыты ‘хсæн ерысты та æвзист призер ссис Таймæзты Мадинæ. Уый та хæцыд 70 кг уæзы категорийы.
ФУТБОЛ
Футболæй Уæрæсейы фыццаг дивизионы 17-æм туры фæлгæтты Дзæуджыхъæуы «Алани» уазæгуаты 3:3 хыгъдæй ахъазыд Ярославлы «Шинник»-имæ. Алайнæгты сконды пуртитæ бакъуырдтой Ислам Машуков, Гуырцъыты Батраз æмæ Хæдæрцаты Батраз.
Радон туры «Алани» 12-æм ноябры уазгуаты хъаздзæн Набережные Челныйы командæ КАМАЗ-имæ.
ХУРИТЫ Батрадз
