Цхинвалы районы Къостайыхъæуы астæуккаг скъолайы цур цы нывгæнæн студи ис, уый нырма 7 азы йедтæмæ нæ уæвынад кæны, фæлæ йын ис зæрдæрухсгæнæн фæстиуджытæ. О, йæ байгом кæныны фыццаг азтæй æрлæууыд рæзты фæндагыл æмæ йыл абоны бон дæр цæуы ныфсджынæй.
Студийы ахуыргæнинæгтæн азæй-азмæ рæзы сæ дæсныйад, хуыздæр кæны сæ арæхстдзинад, сæ хъуыдыкæнынад, цы куыстытæ рахæссынц адæмы рæгъмæ, уыдонæй барухс вæййы канд сæхи нæ, фæлæ сæ табугæнджыты зæрдæ дæр. Уыимæ иумæ исынц фæлтæрддзинад сæ кæрæдзийæ дæр, иуы æнтыст кæмдæр иннæмæн дæр свæййы ныфс æмæ разæнгарды хос нывкæнынады аивады уæлдæр къæпхæнмæ схизынæн. Æппæт уыдæттæ та фадат дæттынц, цæмæй ахизой канд студийы, районы арæнтæй нæ, фæлæ уымæн æддейæ дæр ма уой къæмдзæстыг. Кæд райдианы сæ конд нывтимæ зонгæ кодтой бынæттон адæм, уæд сын фæстæдæр та сæ арæхстдзинадæн æвдисæн уыдысты Дменис, Сатихъар, Дзау, Знауыры ахуыргæнæн уагдæттæ. Фæлæ иууыл тынгдæр та цалдæр хатты фесгуыхтысты, Сочийы сын цы равдыстытæ уыд, уым. Æрмæст сæхæдæг нæ, фæлæ дзы бирæ бæстæтæ истой хайад æмæ ацы скъола-студийы ахуыргæнинæгты конд куыстытæ кæддæриддæр уыдысты цæс-тæвæрæн, æрхастой-иу Кады гæххæттытæ æмæ хорзæхтæ.
Студийы ахуыргæнинæгтæ тынг уарзынц æмæ цымыдис кæнынц Ирыстоны ноджы хуыздæр базонынмæ, йæ фæллойгæнджыты цард æмæ хæрзиуæгон архайдмæ. Æрæджы Республикæ Хуссар Ирыстоны бæрæгбоны хæдразмæ студийы хъомылгæнинæгты иу къорд абалц кодта Ленингормæ. Балцы хъомылгæни-нæгтимæ уыдысты сæ ахуыргæнджытæ Республикæ Хуссар Ирыстоны адæмон нывгæнæг Гæбæраты Барис, нæ республикæйы сгуыхт нывгæнæг Хуыбиаты Роберт, нывгæнæг Зæгъойты Егнат æмæ астæуккаг скъолайы директор Тыбылты Олег. Фæндагыл цæугæйæ, сæ цæстæнгас нæ ивгъуыдта ацы диссаджы æрдзæй. Уый æнæмæнгдæр фæахъаз уыдзæн æвзонг курдиæттæн, ахорæнтæй йæ радæтдзысты сæ куыстыты. Иннæ ахæм Чысангомы уазæгуарзондзинад сæ зæрдæйæ никуы сæфтдзæн.
Уырыссаг скъолайы кæрты равæрдтой скъоладзаутæ Гаглойты Камилæ, Хуыбиа-ты Аннæ, Иннæ, Миленæ, Тараты Иренæ, Джергаты Альбинæйы конд нывтæ – уыдысты 50 фылдæр. Скъолайы коллектив стыр цымыдисæй кастысты æвзонг нывгæнджыты куыстытæм æмæ сæ дисы бафтыдта сæ арæхстдзинад. Уыдис дзы натюрморттæ, пейзажтæ, ранывæстой Нарты кадджыты хъайтардзинад, стæй, нæ адæмыл Гуырдзыстоны тугмондаг адæм 20-æм азты цы генцид скодтой, уыдон. Уæлдай хуыздæр уыдысты æмæ нывкæнынадæн табугæнджытæ стыр æхсызгондзинады æнкъарæнтæ истой Тараты Иренæйы куыстытæй. Равдысты ма хайад райстой Ленингоры администрацийы кусджытæ, арфæйы ныхæстæ уазджытæн ракодта йæ сæргълæууæг Гулиты Владимир æмæ сæ схорзæхджын кодта Кады грамотæтæй. Уый фæстæ сæ фæуазæг кодтой бынæттон музеймæ æмæ базонгæ сты йæ диссаджы экспонаттимæ.
Иудзырдæй, уазджытæ æмæ фысымтæ дæр райгондæй баззадысты сæ кæрæдзийы хъарм ахастæй.
Хуыбиаты Никъала
Comments are closed, but trackbacks and pingbacks are open.