Хетæгкаты Къостайы райгуырды 162 азы боны кадæн 28 хатт арæзт æрцыд радон мадзал: аивад æмæ литературæйы къабазы хуыздæр уацмысты тыххæй конкурс расидын. Сæ куыстытæ балæвæрдтой 11 адæймаджы æмæ коллективон автортæ дыууæ номинацийæ – аивад ææ литературæ. Ацы хатт конкурсы уагæвæрды æрцыд ивддзинæдтæ. Иугай адæймæгты уæлдай дзы архайдтой сфæлдыстадон коллективтæ æмæ цæдистæ: фысджыты, нывгæнджыты, кинематографисттæ, ирон театр, мыхуыры комитет…
Къамисы уæнгтæ сæ хъуыдытæ загътой конкурсы архайджыты тыххæй, уый фæстæ сусæг хъæлæс скодтой. Литературæйы къабазы фысджытæй сæ куыстытæ бавдыстой цыппарæй: Хуыгаты Сергей, Дауыраты Дамир, Гусалты Барис æмæ Касаты Батрадз. Уыдонæй фылдæр хъæлæстæ райста æмæ конкурсы уæлахиздзау сси Касаты Батрадз йæ чиныг «Уды дзæнгæрджытæ»-йы тыххæй.
Аивады къабазы хуыздæрыл нымад æрцыд авторты коллективы куыст – Сихъоты Тимур, Хъараты Алик æмæ Халиты Мерабы композици «Бæрæгбон хæхты». Уый фыст æмæ фыццаг хатт æвæрд æрцыд дыууæ азы размæ бæхты театр «Нарт»-ы сценæйыл Къостайы райгуырды 160 азы кадæн.
Уæлахиздзауты тыххæй бæрæггæнæнтæ æрвыст æрцыдысты республикæйы Сæргълæууæг Сергей Меняйломæ. Хицауады документ куы сфидар кæной, уæд æввахс рæстæджы уæлахиздзаутæ хорзæхджын æрцæудзысты дипломтæ æмæ æхцайы премитæй.
Къамисы уæнгтæ ма республикæйы разамындмæ барвыстой куырдиат, ацы премимæ ма уæлæмхасæн, сæрмагонд преми бафтауын, хицæн куыстыты тыххæй нæ, фæлæ культурæ æмæ аивадмæ стыр бавæрæн чи бахаста, уыдонæн.
Нæ уацх.
Comments are closed, but trackbacks and pingbacks are open.