Милицийы наркотикты ӕрзылды контроль кӕныны управленийы кусджытӕ 9 мӕйы дӕргъы бакӕнгӕ куыстӕн сарӕзтой хыгъд. Сӕ архайд, сӕйраджыдӕр, нысанмӕздӕхт у наркотиктимӕ баст фӕткхалӕн цаутӕ ӕмӕ фыдракӕндтӕ ма ӕруадзынмӕ, ӕмӕ сын ис ӕнтыстытӕ. Кӕд ӕмӕ наркотиктимӕ баст фыдракӕндтӕ фӕстаг рӕстӕджы фӕфылдӕр сты, уӕд уыимӕ иумӕ сӕ райхалын ӕмӕ фыдгӕнджыты бӕрндзинадмӕ ӕркӕныны статистикӕ дӕр бӕрӕг фӕхуыздӕр. Зӕгъӕм, ацы аз оперативон кусджытӕ сбӕлвырд кодтой 11 фыдракӕнды ӕмӕ иууылдӕр раргом сты. Фарон та регистраци ӕрцыдис авд фыдракӕнды ӕмӕ дзы цыппар раргом кодтой.
Слестгӕнӕн управлени азы дӕргъы 11 ӕмбӕстагыл бакодта уголовон хъуыддӕгтӕ. Уыдонӕй дыууӕ фыдгӕнӕджы нӕ республикӕмӕ ӕрластой ӕмӕ уӕй кодтой хосгӕнӕн препарат «Габапентин» ӕмӕ йӕ аналогтӕ. 38-аздзыд бынӕттон цӕрӕджы автомашинӕйы та ссардтой 146 капсулӕйы хосгӕнӕн препараттӕ «Катэна». Уымӕй уӕлдай ма бӕрндзинадмӕ ӕркодтой 24-аздзыд горӕттаг цӕрӕджы, кӕцыйы афтиагы рейдон мадзӕлтты рӕстӕджы ссардтой хосгӕнӕн препараттӕ – 490 капсулӕйы «Габапентин» ӕмӕ 60 капсулӕйы та «Катэна».
Оперативон кусджытӕ ма уадзынц профилактикон мадзӕлттӕ, наркотикон буарадтӕ цы зайӕгойты ис, ахӕмты парахат кӕныны ныхмӕ дӕр. Азы дӕргъы бӕрндзинадмӕ ӕркодтой цыппар адӕймаджы. Зӕгъӕм, горӕттаг 41-аздзыд цӕрӕг Цхинвалы районы ныссагъта 151 дзӕгъдзӕгъаджы(мак) къутӕры ӕмӕ йын сӕ скуынӕг кодтой. Знауыры районы 55-аздзыд цӕрӕгмӕ та хӕдзары ссардтой 2 килограммӕй фылдӕр марихуана.
Милицийы кусджытӕ ма хибар бынӕтты дӕр сарынц, наркотикон буарадтӕ кӕм ис, ахӕм зайӕгойтӕ. Рейдон мадзӕлтты рӕстӕджы ссардтой ӕмӕ скуынӕг кодтой гӕны къутӕртӕ 500 фылдӕр ӕмӕ 28 къутӕры та дзӕгъдзӕгъагтӕ.
Нӕ республикӕмӕ ма нӕй ӕрбаласӕн, дымгӕ кӕй нӕ кӕнынц, ахӕм тамакотӕ дӕр. «Снюс» ӕмӕ «Насвай»-ы тыххӕй бӕрндзинадмӕ ӕркодтой цыппар адӕймаджы. Ӕдӕппӕт та наркотиктӕй спайда кӕныны тыххӕй бӕрндзинадмӕ ӕркодтой 72 адӕймаджы.
ДЖИОТЫ Алыксандр
