Сæ хæс – куысты æмвæзад рæзын кæнын

Цхинвалы районы администрацийы ахуырады хайад (йӕ сӕргълӕууӕг Лолоты Барис) 2019-ӕм ахуыры азы рӕстӕджы бакодта ахадæн  куыст.

Ногазон бӕрӕгбоны фӕстӕ методисттӕ цыдысты скъолатӕм ӕмӕ дарддӕр кодтой методикон ӕххуыс ахуыргӕнджытӕн. Арӕзт ӕрцыд куысты график ӕвзонг специалисттимӕ. Комплексон басгӕрсты рӕстӕджы методисттӕ уыдтой программӕты, тематикон ӕмӕ уроктӕ уадзыны плӕнттӕ, скъоладзауты ахуыргӕнӕн ӕмӕ фыссӕнгӕрзты ифтонгад, фыссыны куыстыты хуызтӕ ӕмӕ формӕты ӕххӕсткӕнынад, ахуыры методтӕ, формӕтӕ, ахуыргӕнинӕгты зонындзинӕдтӕ ӕмӕ арӕхстдзинады ӕмвӕзад. 

Ахуыры азы дӕргъы скъолаты уагъд ӕрцыдысты олимпиадӕтӕ ӕмӕ фронталон бафарстытӕ ӕппӕт ахуыргӕнӕн дисциплинӕтӕй, цӕмӕй рабӕрӕг уыдаид, ахуыргӕнинӕгты зонындзинӕдтӕ ӕмӕ рацӕугӕ ӕрмӕг цас базыдтой, уый. Бацӕттӕгонд ӕрцыдысты предметон олимпиадӕтӕ ауадзыны тесттӕ ӕмӕ республикон олимпиадӕмӕ кандидаттӕ равзарын дӕр. Ахуыргӕнинӕгтӕ активон хайад райстой куыд районон, афтӕ республикон фӕлгӕтты дӕр, скъолайӕн ӕмӕ уымӕн ӕддейӕ мадзӕлтты.

Ӕппӕт мадзӕлттӕн дӕр арӕзт ӕрцыдысты ӕмбӕлон плӕнттӕ ӕмӕ сценаритӕ. Районы скъолаты ахуыргӕнджытӕ бацӕттӕ кодтой ӕмӕ ауагътой ахӕм тематикон бӕрӕгбонтӕ, куыд Тырысайы бон, Республикӕ Хуссар Ирыстоны бон, Ирыстоны номдзыд хъӕбул Хетӕгкаты Къостайы райгуырды бон, Фыдыбӕстӕ хъахъхъӕнӕджы бон. 15 майы республикӕйы нысан кодтой Ирон ӕвзаг æмæ литературæйы бон ӕмӕ иумиагахуырадон скъолаты дӕр уый фӕдыл уагъд ӕрцыдысты гом уроктӕ ӕмӕ поэзийы изӕртӕ. Республикон фӕлгӕтты ауагъдӕуыд мадзӕлттӕ Къостайыхъӕу ӕмӕ Дменисы астӕуккаг скъолаты. Уырдӕм фӕхуыдтой Ахуырады министрады минӕвӕртты, фысджыты, «Стыр Ныхас»-ы хуссарирыстойнаг хайы уӕнгты ӕмӕ Цхинвалы скъолаты ирон ӕвзаг ӕмӕ литературӕйы     ахуыргӕнджыты.

 Ацы аз 150 азы сӕххӕст Д. И. Менделеевы химикон элементты периодикон таблицӕйыл ӕмӕ Дменис ӕмӕ Къостайы хъӕуы астӕуккаг скъолатӕ ацы зынгӕ цауы тыххӕй ауагътой мадзӕлттӕ.

Апрелы мӕйы ӕппӕт скъолаты дӕр ауагътой техникон фӕлындзынад, скъолайон ӕмӕ хӕдзарон дзаумӕтты инвентаризаци, афтӕ ма полилингвалон ахуырады системӕйы тыххӕй ахуыргӕнӕн чингуыты хыгъд. Ахуыры азы дӕргъы скъолаты ахуыргӕнинӕгтӕ алы хуыцаубоны дӕр цыдысты Сывӕллӕтты сфӕлдыстады галуанмӕ ӕмӕ сӕ зонындзинӕдтӕ фылдӕр кодтой «Дунейы афӕлгӕст»-ы темӕйӕ. Республикон конкурс «Зонды къуыбар»-ӕй Тъбеты ӕнӕххӕст астӕуккаг скъолайы ахуыргӕнинаг Бибылты Ацӕмӕз ссис уӕлахиздзау ӕмӕ хорзӕхджын ӕрцыд грамотӕ, сертификат ӕмӕ зӕрдылдарӕн лӕвӕрттӕй. Хорз ӕнтыстытӕ ис Къостайыхъӕуы астӕуккаг скъолайы цур нывгӕнӕн студийӕн, уымӕн йӕ ахуыргӕнинӕгтӕ активон хайад райсынц, куыд республикон, афтӕ уымӕн ӕддейӕ дӕр алыхуызон равдыстыты ӕмӕ цалдӕр хатты систы Ӕхсӕнадӕмон конкурсты лауреаттӕ. Уымӕй дарддӕр ма ацы аз 16 ахуыргӕнӕджы ӕнтысгӕйӕ рацыдысты радон аттестацийы.

Ахуырады хайад ма бӕрӕг куыст бакодта ӕнахъомтимӕ, уагъта профилактикон мадзӕлттӕ, ӕргом цыдысты, йӕ уагахаст мӕгуырау кӕмӕн уыд, уыцы ахуырдзаутӕ, зынхъомылгӕнӕн ахуырдзауты ныййарджытимӕ уагъдӕуыд беседӕтӕ.

 РХИ-йы Ахуырад ӕмӕ зонады министрады бахӕсмӕ гӕсгӕ  Мӕскуымӕ Ногазон бӕрӕгбон ӕмӕ Сывӕллӕтты хъахъхъӕныны дунеон бонмӕ районӕй арвыстой дыууӕ скъоладзауы. 5 июнӕй 18 июнмӕ иумиагахуырадон скъолаты ахуыргӕнджытӕ ӕрвыст ӕрцыдысты сӕ квалификаци фӕбӕрзонддӕр кӕныны курсытӕм. Ахуыры аз фӕци районы рауагъдонты цытӕн бӕрӕгбонон мадзалӕй ӕмӕ сын цытджын ӕгъдауӕй радтой буклеттӕ ӕмӕ лӕвӕрттӕ.

Кӕй зӕгъын ӕй хъӕуы, ис ӕнтыстытӕ, фӕлӕ уӕддӕр ӕмбӕлӕм хъӕндзинӕдтыл дӕр. Куыд ивгъуыд азты, афтӕ та ацы ахуыры азы дӕр республикон предметон олимпиадӕйы, ӕрмӕстдӕр, Рустауы астӕуккаг скъолайы ахуырдзау Кокойты Ланӕ ирон ӕвзаг ӕмӕ литературӕйӕ райста 2-аг къӕпхӕны диплом. Уымӕ гӕсгӕ районы    ахуырдзауты бӕрӕггӕнӕнтӕ республикон олимпиадӕйы рауадысты тынг мӕгуырау. Скъолаты разамонджытӕн базонын афон у, предметон олимпиадӕтӕ уагъд кӕй фӕцӕуынц, хорз ӕмӕ тынг хӕрзтыл чи ахуыр кӕны, ӕрмӕстдӕр уыдонӕн. Кӕд сӕ цалдӕр хатты ба-фӕдзӕхстӕуыд, уӕддӕр олимпиадӕмӕ ӕрбарвитынц ӕнӕхъӕн къласы    ахуырдзауты. Ацы азы 20 рауагъдонӕй ӕрмӕстдӕр Дменисы скъолайы ахуыргӕнинаг Джиголаты Муртазӕн ис иттӕг хорз бӕрӕггӕнӕнтӕ. Скъолаты нӕй химийы кабинеттӕ, реактивтӕ химийы фӕлварӕнтӕ уадзынӕн, ирон, уырыссаг ӕмӕ англисаг ӕвзӕгтӕн нӕй цӕстуынгӕ ӕрмӕджытӕ. Спортзал ис ӕрмӕстдӕр Къостайыхъӕуы астӕуккаг скъолайы, иннӕ ахуыргӕнӕн уагдӕтты кӕнӕ не сты, кӕнӕ та дзуапп нӕ дӕттынц абоны домӕнтӕн. Азӕй азмӕ    ахуыргӕнинӕгты контингент кӕны къад-ӕр ӕмӕ афтӕ куы ахӕсса, уӕд районы скъолаты нымӕц фӕкъаддӕр уыдзӕн.

Цӕмӕй ахуырады гъӕд фӕбӕрзонддӕр уа, ууыл методкабинет бакусдзӕн дывӕр хъаруйӕ. Хайады методисттӕ ӕмӕ методкабинеты сӕргъ-лӕууӕг ӕппӕт дӕр бакӕндзысты цухдзинӕдтӕ аиуварс кӕныны тыххӕй.

ХУЫБИАТЫ Никъала