Уæрæсейы Федераци æмæ Республикæ Хуссар Ирыстоны ‘хсæн Æмцæдисад æмæ интеграцийы фæдыл бадзырды фæлгæтты, Мидхъуыддæгты министрады куыст фæхуыздæр кæныны фæдыл ист æрцыд бирæ мадзæлттæ. 2017 азæй фæстæмæ милицийы кусджыты куыстмызд этапгай фылдæр кæны æмæ материалон-техникон ифтонгад дæр хуыздæр кæны. «Тынг бирæ проблемон фарстатæ скъуыддзаг æрцыдысты нæ Президент Бибылты Анатолийы фæрцы. Цыдæриддæр нын планы хаст уыд, уыдон бабæстон кодтам рæстæгыл. Оптимизаци æмæ организацион-штатон мадзæлтты руаджы милицийы кусджыты мызд фæфылдæр ис. Ныр дæр та 2019 азы ногæй хъуамæ фæфылдæр уой сæ куыстмыздтæ», – банысан кодта Мидхъуыддæгты министрады сæргълæууæг Наниты Игорь.
Мидхъуыддæгты министрады автопарчы æмбис ис мæгуырау уавæры æмæ сæ баивын хъæуы ног автомашинæтæй. «2018 азы ведомство самал кодта 18 автомашинæйы æмæ сæ байуæрстам милицийы дæлхæйттыл. Ацы аз дæр та нын бантыст 42 автомашинæ балхæнын. Ацы автомашинæты æмбис лæвæрд æрцæудзæнис автоинспекцийы управленийæн. Уымæн æмæ сæ автопарк ис тынг уæззау уавæры. Иннæты та байуардзыстæм милицийы æндæр дæлхæйттыл. Оргтехникæ дæр регуляронæй ивд цæуы. Фæстаг азты ма зындзинæдтæ æвзæрстам милицийы кусджыты уæлæдарæсæй сифтонг кæныны, фæлæ уыцы фарст дæр цыбыр æмгъуыдмæ скъуыддзаг æрцæудзæн», – загъта Наниты Игорь.
Бæстæйы Президент Бибылты Анатолийы хъæппæрисæй ма 2018 азы æхцайы фæрæзтæ снысан кодтой, милицийы кусджытæй чи фæмард йæ службæйон хæстæ æххæст кæнгæйæ æмæ йæ райгуырæн бæстæ хъахъхъæнгæйæ, уыдоны бинонтæн. Æдæппæтæй æххуыс райстой 45 бинонтæ. Ацы аз дæр ма уыцы æххуыс бакæндзысты 12 бинонтæн.
Джиоты Александр
Comments are closed, but trackbacks and pingbacks are open.