СÆ АРÆХСТДЗИНАД ÆВДИСЫНЦ ТАБЕЛОН ÆХСÆНГАРЗИМÆ АРХАЙЫНÆЙ

Табелон æхсæнгарз йæ куыстуаты домæнтæм гæсгæ чи дары, уыдонæн рæстæгæй-рæстæгмæ æнæмæнг ауадзынц нормативтæ æхсæнгарзимæ архайынæй æмæ æхсынæй. Ахæм мадзæлттæ регуляронæй уагъд фæцæуынц Мидхъуыддæгты министрады дæлхæйтты дæр. Кæд æмæ милицийы сæрмагонд къордты кусджытæ æрвылмæй дæр фæцæуынц полигонмæ сæ службæйон-хæстон цæттæдзинады программæйы фæлгæтты, уæд иннæ дæлхæйтты кусджытæ та – æртæ мæйы иу хатт.

Цхинвалы районы милицийы управленийы кусджытæ дæр та радон хатт ацыдысты полигонмæ, цæмæй равдисой сæ цæттæдзинад автомат æмæ пистолетæй æхсынæй. Семæ ма ацыдысты ведомствойы службæйон-хæстон цæттæдзинады хайады сæргълæууæг Хуриты Станислав æмæ медицинон хайады кусджытæ. Рæнхъон скондæн полигоны развæлгъау ауагътой инструктаж. Милицийы кусджытæ мысанмæ æхстой 100 метры дæрдзæфмæ хуысгæйæ, уæрагыл бадгæйæ æмæ лæугæйæ. Фехстой ма ноджы пистолет «Макарова»-йæ дæр 25 метры дæрддзæгмæ. Нормативты хайад райстой сылгоймæгтæ дæр, кæцытæ нæлгоймæгты æмрæнхъ иттæг хорз равдыстой сæ дæсныдзинад æхсæнгарзимæ архайынæй.

Полигонмæ ма ацыдысты милицийы сæрмагонд нысаниуæджы къорды кусджытæ дæр, кæцытæ автомат «Калашникова»-йæ фехсыны нормативтæй сарæзтой ерыстæ. Ротæтæй бацæттæ кодтой командæтæ æмæ сæ кæрæдзийы æхсæн быцæу кодтой хорз фехсынæй, – тымбыл кодтой очкотæ уæлахиздзау рабæрæг кæныны тыххæй. Уыдис ма сæм сæрмагонд зачет дæр – фылдæр очкотæ кæцы хайадисæг æрæмбырд кодта, уыдон бæлвырд æрцыдысты æмæ сæ схорзæхджын кодтой.

Ам дæр сын развæлгъау сæ физикон æмæ хæстон цæттæдзинады хистæр инструктор Коцты Александр ауагъта инструктаж æмæ сæ бафæдзæхста, зæгъгæ, æдасдзинады домæнтæ чи фехала, уый ист æрцæудзæнис ерыстæй. Æхсгæ та кодтой æртæ хицæн мысанмæ хуысгæйæ, уæрагыл бадгæйæ æмæ лæугæйæ эстафетæйы хуызы. Ацы ерысты æрмæст рæстдзæвин ма хъуамæ уай, фæлæ ма хъуамæ фехсай тагъд, цæмæй дæ рæстæгы лимит ма фæуа.

Хъазуатон тохты фæстиуæгæн 4-æм оперативон ротæ ссис ерысты уæлахиздзау, дыккаг бынат бацахста спецкъорды ахуырадон ротæ æмæ æртыккагыл та ацыд 2-æм оперативон ротæ.

Æхсынæй нормативтæ милицийы дæлхæйтты æхсæн цæудзысты дарддæр дæр. Планмæ гæсгæ азы фæудмæ иууылдæр хъуамæ сæххæст кæной сæ службæйон-хæстон программæйы домæнтæ. Уымæн æмæ милицийы кусæджы алыварсон цæттæдзинад комкоммæ баст у æхсæнады æдасдзинад æмæ фæтк æмбæлон уагыл бахъахъхъæнынимæ.

ДЖИОТЫ Алыксандр