Президентон стипендитæ – хуыздæр студенттæн

7-æм июны Республикæ Хуссар Ирыстоны Президент Бибылты Анатоли Тыбылты Алыксандры номыл паддзахадон университеты хуыз-дæр студенттæн радта президентон стипендитæ.

Нæ республикæйы уæлдæр ахуыргæнæндон йæ бакондæй нырмæ цы алыхуызон кадртæ цæттæ кæны, уыдон кæддæриддæр уыдысты æмæ сты нæ фидæны ныфс. Нæ кадрты куырдадзмæ стыр хъусдард здæхт цæуы нæ республикæйы къухдариуæгады ‘рдыгæй. Президент Бибылты Анатоли хуыздæр чи ахуыр кæны, уыцы студенттæн снысан кодта президентон стипендитæ æмæ сæ æрвылаз дæр йæхæдæг радты цытджын æгъдауæй. Ныр дæр та уыдис афтæ. Уый ивгъуыд къуырийы кæрон фембæлдис университеты профессортæ-ахуыргæнджыты сконд æмæ студенттимæ, кæцытæн снысан кодтой президентон стипенди. Се ‘хсæн ма уыдысты ахæмтæ, кæцытæ систы президентон конкурс «История Осетии в биографиях ее героев»-ы финалисттæ.

Фембæлды рæстæджы, фыццаджыдæр, Президент Бибылты Анатоли бузныджы ныхæстæ загъта уæлдæр ахуыргæнæндоны профессортæ-ахуыргæнджытæн, ахуырады фарстытæм стыр хъусдард кæй здахынц æмæ студентты размæцыдыл кæй кусынц æмæ тыхсынц, уый тыххæй. Бузныджы ныхæстæ ма загъдгонд æрцыдысты студенттæн дæр, ахуырмæ кæй тырнынц æмæ сæ сомбоныл кæй хъуыды кæнынц, уый сæраппонд. «Сымах аразут æппæт дæр, цæмæй уæ мах сомбоны уæм сæрыстыр. Уый у ахсджиаг хъуыддаг, уымæн æмæ нæ адæмæн раздæр уыдис вазыгджын рæстæг. Æз афтæ хъуыды кæнын æмæ фæстаг азты нæ ахуырады цæуы серьезон ивын-дзинæдтæ хорзæрдæм»,  – загъта бæстæйы сæргълæууæг.

Уый ма куыд банысан кодта, афтæмæй хъæуы популяризаци кæнын уæлдæр ахуырад æмæ аразын æппæт дæр, цæмæй уа бæрзонд, æмбæлон æмвæзадыл. Уый та, сæйраджыдæр, зæгъгæ, у æмткæй æхсæнад æмæ бæстæйы къудариуæгады стыр хæс. «Хорз ахуыры тыххæй цы финансон фæрæзтæ рахицæнгонд æрцæуынц, уымæн, мах куыд уынæм, афтæмæй ис хорз фæстиуджытæ æмæ махæн дæр у æхсызгон», – банысан кодта Президент Бибылты Анатоли.

Университеты студенттæ æмæ ахуыргæнджыты номæй ректор Тедеты Вадим арфæ æмæ бузныджы ныхæстæ загъта Бибылты Анатолийæн, æппынæдзух сæ фарсмæ кæй ис æмæ сæм стыр хъусдард кæй здахы, уый тыххæй. «Мах хъуыды кæнæм, раздæр президентон стипенди кæй уыдис 5 мины бæрц. Ныр та ссис 7 мин сомы бæрц. Кæй зæгъын æй хъæуы, президентон стипенди-исæг студентты нымæц дæр кæй фæфылдæр ис. Раздæр уыцы студентты нымæц уыдис 5 æмæ ныр та сты 14. Æз афтæ хъуыды кæнын, æмæ ацы хæрзиуæгон хъуыддаг кæй у уæлæмхас стимул, цæмæй студенттæ ахуыр кæной хуыздæр. Бандæвта сыл æмæ махæн дæр у тынг æхсызгон», – банысан кодта ректор.

Президентон конкурс «История Осетии в биографиях ее героев»-ы тыххæй та университеты ректор загъта, зæгъгæ, сæрмагонд къамисы руаджы æрцыдис стыр куыст. «Конкурсы хайад истой канд нæ университеты студенттæ нæ, фæлæ ма æндæр уæлдæр ахуыргæнæндæтты студенттæ дæр, афтæ ма нæ республикæйы скъолатæй дæр», – банысан кодта ректор.

Ацы конкурсы тыххæй лæмбынæгдæр æрдзырдта къамисы къухдариуæггæнæг, профессор Гаглойты Юри. «Ивгъуыд азимæ абаргæйæ, бæрæг фæуæрæхдæр ис йæ тематикæ æмæ йæ хайадисджыты нымæц. Мæн фæнды зæгъын уый, æмæ райгондæй кæй баззадыстæм йæ фæстиуджытæй», – загъта Гаглойты Юри.

Президент Бибылты Анатоли сразы ис Гаглойты Юрийы хъуыдыимæ æмæ ма банысан кодта, цæмæй конкурсы арæнтæ уæрæхдæр кæной æмæ дзы фылдæр хайадисджытæ уа, уымæн æмæ ахъаз кæны фæсивæды духовон-хæрзæгъдауон хъомыладæн.

Цытджын фембæлды кæрон уагъд æрцыдис студенттæн президентон стипенди радтыны æмæ конкурсы уæлахиздзауты схорзæхджын кæныны церемони.

ЦХУЫРБАТЫ Ларисæ