Паддзахадон университеты цæттæгонд кадртæ кæддæриддæр сты нæ Ирыстоны ныфс æмæ фидæн. Уымæ гæсгæ республикæйы къухдариуæгады ’рдыгæй студенттæм кæддæриддæр вæййы аудгæ ахаст.
Ног азы размæ нæ университеты хуыздæр студенттæн Гаглойты Алан йæхи къухæй радта президентон стипендитæ. Ацы сти-пендийы аккаг систы дыууадæсæй æмæ сæ хорзæхтыл сæмбæлдысты цингæнгæйæ. Цытджын мадзал уыдис университеты актон залы. Бæрæгбонвæлыст залы Ног 2023-æм азы æрбалæуд нысан кодтой студенттæ сæ ахуыргæнджытимæ æмæ сæм уырдæм фæуазæг бæстæйы сæргълæууæг. Фыццаджыдæр сын бæрæгбоны цытæн раарфæ кодта: «Фæнды мæ, цæмæй абон куыд хъæлдзæг æмæ рæсугъд стут, афтæ алы бон дæр æрвитат уæ бонтæ. Ног аз уын уæ бинонтæн æрхæссæд амонд, æнæниздзинад æмæ уарзондзинад, кæддæриддæр ут фæрнджын æмæ уæ ахуыры фæндæгтыл та æрмæстдæр хизут бæрзæндтæм, нæ зæрдæтæ-иу нын куыд барухс кæнат æмæ уын уе ’нтыстытыл куыд цин кæнæм, афтæмæй», — банысан кодта Гаглойты Алан. Уый ма студентты зæрдыл æрлæууын кодта Донбассы æрцæугæ цаутæ æмæ банысан кодта, зæгъгæ, нæ ирон адæмæй бирæтæн се ‘ввахс адæм сты сæрмагонд операцийы хайадисджытæ æмæ уый хъæуы хъуыды кæнын. Ирон адæм кæд бирæ зындзинæдтæ æвзæрстой, уæддæр-иу тыхтæ æмæ хъарутæ ардтой сæ дарддæры хъæлдзæг цардæн æмæ ныр дæр фæразын кæй хъæуы, уый. Президент ма йæ раныхасы банысан кодта, президентон стипендиты хицæутты нымæц дарддæр кæй фылдæр кæндзæн, уый.
Ног азы бæрæгбоны фæдыл æмæ президентон стипендитæ кæй райстой, уый тыххæй арфæйы ныхæстæ загъта университеты ректор Тедеты Вадим. Уый сæрмагондæй раарфæ ракодта Президент Гаглойты Аланæн йæ хъусдарды тыххæй.
Студентон фæсивæд мадзал адарддæр кодта хиирхæфсæн концертон программæйæ. Зæрдылдарæн къамтæ студенттæ систой Президент Гаглойты Аланимæ.
