Поэзийы бон æрвылаз дæр банысан кæнынц 21 марты. Адæймаджы царды поэзи у иууыл гениалондæр æнтыстытæй сæ иу. Поэзийы дунеон боны сæйраг нысан у, нырыккон æхсæнады культурон царды литературæйæн цы стыр нысаниуæг ис, уый банысан кæнын, æппæт дунейы поэтты æрбаиу кæнын æмæ сæхи базонын кæнынæн фадат радтын.
Поэзийы рæсугъд бæрæгбоны сæраппонд нæ горæты 3-æм астæуккаг скъоламæ поэзийы изæрмæ æрбамбырд сты ацы скъолайы ахуыргæнджытæ, ахуыргæнинæгтæ æмæ поэзиуарзджытæ. Мадзал бацæттæ кодтой ирон æмæ уырыссаг æвзæгты æмæ литературæты ахуыргæнджытæ Хъуылымбегты Раисæ æмæ Пухаты Аллæ.
Æрæмбырдуæвджытæн раарфæ кодта скъолайы ахуыры хайы сæргълæууæг Пухаты Аллæ. Уый лæмбынæг æрдзырдта поэзийы бæрæгбоны сæвзæрды истори æмæ йæхæдæг поэзиимæ куыд базонгæ, уыддæтты тыххæй. «XX-æм æнусы кæрон ЮНЕСКО-йы инициативæмæ гæсгæ скъуыддзаггонд æрцыд бæрæгбонæн официалон статус радтыны тыххæй. Уый арæзт æрцыд, дунеон политикон змæлды ног сгуыхтдзинæдтæм сразæнгард кæныны сæраппонд. Уымæ гæсгæ ацы бæрæгбон фыццаг хатт нысан æрцыд 2000 азы 21 марты æмæ уæдæй фæстæмæ ацы бон ссис поэзиимæ баст иумиаг банымад дунеон бæрæгбон.
Поэзи æз бауарзтон, скъолайы ма куы ахуыр кодтон, уыцы рæс-тæджы. Махæн уыд диссаджы ахуыргæнæг, кæцы йæ ахуыргæнинæгтæн бауарзын кодта иумиагæй литературæ», – банысан кодта Пухаты Аллæ.
Мадзалы скъолайы ахуыргæнинæгтæ æмæ ахуыргæнджытæ кастысты сæ уарзон авторты æмдзæвгæтæ, куыд, зæгъæм, Хетæгкаты Къоста, Джусойты Нафи, Хостыхъоты Зинæ, Александр Пушкин, Сергей Есенин æмæ æндæрты уацмыстæ. Сæйрагдæр ныхас цыд уарзондзинады темæйыл. 11-æм æмæ 8-æм кълæсты ахуыргæнинæгтæ Бекъойты Филипп æмæ Гобозты Роман мадзалы сæ рæсугъд зардæй бахъæлдзæг кодтой æрæмбырдуæвджыты зæрдæтæ. Уыдон азарыдысты Есенины æмдзæвгæйыл фыст зарæг «Заметался пожар голубой», кæцыйæн музыкæ ныффыстой æвзонг музыканттæ сæхæдæг. 5-æм къласы ахуыргæнинаг Коцты Дианæ та ацагъта скрипкæйыл кавказаг зарæг «Эльбрус – красавец».
Мадзалы рæстæджы æрæм-бырдуæвджытæ иу уысм æмырæй алæугæйæ ссардтой зынгæ ирон фысджытæ Джусойты Нафи æмæ Мæргъиты Къостайы рухс нæмттæ.
Кокайты Зæринæ
Comments are closed, but trackbacks and pingbacks are open.