Культурæйы боны цытæн информацион агентад «Спутник»-ы пресс-центрмæ хуынд æрцыдис нæ горæты Битеты Павелы номыл 2-аг музыкалон скъолайы директор Æлборты Дианæ. Уымæн Культурæйы кусæджы бæрæгбоны цытæн арфæйы ныхæстæ загътой республикæйы бынæттон журналисттæ æмæ йæм уый фæстæ фарстытæ радтой йæ куысты тыххæй. Музыкалон скъолайæн цавæр æнтыстытæ ис, афтæ ма сæ разы цы проблемæтæ æвзæры, æппæт уыдæтты тыххæй Æлборты чызг радзырдта брифингы рæстæджы. Уый йæ ныхасы райдианы арфæйы ныхæстæ загъта культурæйы боны цытæн, ацы къабазы чи кусы, æппæт уыдонæн. «Фæнды мæ радзурын нæ музыкалон скъолайы архайды тыххæй. 2-аг музыкалон скъола бындуронæй йæ куыст райдыдта 1981 азы æмæ йын уæдæй нырмæ нæй йæхи сæрмагонд бæстыхай. Махмæ цы авд хайады ис, уыдоны ахуыр кæны 175 ахуыргæнинаджы. Уыдон сты фортепиано, скрипкæ, ирон фæндыр, аккордеон, гуымсæг, гитарæ æмæ эстрадон вокал. Уавæртæ нын кæй нæй, кълæстæ нын кæй нæ фаг кæнынц, уымæ гæсгæ нæ ахуыргæнджыты иу хай сæ куыст кæнынц нæ горæты 12-æм астæуккаг скъолайы.
Мах бацæттæ кодтам концерт Культурæйы кусæджы бæрæгбоны цытæн. Уымæй дарддæр ма мах 20-æм марты банысан кодтам, не скъола кæй ном хæссы, уыцы дзæнæттаг Битеты Павелы мысæн изæр.
Музыкалон скъолайы директор куыд радзырдта, афтæмæй уыдон ацы аз фыццаг хатт се скъолайы бакодтой цæттæгæнæн кълас.
Директоры ныхæстæм гæсгæ 1984 азæй фæстæмæ рауагътой 800 рауагъдоны бæрц. Уыдонæй бирæтæ сты зындгонд нæ республикæйы æмæ республикæйæн æдтейæ дæр. Уыдон сты: зындгонд оперон зарæггæнæг Джиоты Вероникæ, Уалыты Нинæ «Айзæлд»-ы къухдариуæггæнæг, Гасситы Ацæмæз, кæцы ныртæккæ кусы музыкалон ахуыргæнæндоны, æмæ бирæ æндæртæ.
Скъолайы кусы бирæ хорз ахуыргæнджытæ, кæцытæ сæ дæсныйадыл сты иузæрдион, уыдонæй 9 сты РХИ-йы сгуыхт ахуыргæнджытæ æмæ иу та – РХИ-йы сгуыхт артист.
Директор ма куыд банысан кодта, афтæмæй се скъолайы фæстаг цалдæр азы популярондæр сты ирон фæндыры, аккордеон æмæ гуымсæджы хайадтæ.
Рæхджы уагъд цæудзæнис фестиваль «Фæндыры зæлтæ» æмæ дзы хайад исдзысты нæ сывæллæттæ.
Скъолайы архайы эстрадон вокалы архайы. Йæ ахуыргæнинæгтæ Къæбулты Яна æмæ Зассеты Сослан ацы аз январы мæйы хайад райстой Налцыччы уагъдцæуæг конкурсы æмæ систы лауреаттæ, æрхастой фыццаг къæпхæны дипломтæ. Директоры ныхæстæм гæсгæ сæм ис курдиатджын фæсивæд æмæ сын æххуыс кæнынц уыцы курдиат райхалыны хъуыддаджы.
«Не скъолайы нын иууыл проблемондæр у уый, æмæ нæ уавæртæ мæгуырау кæй сты. 2013-æм азы нын баиу кодтой хъармгæнæн системæ. Уæдмæ пайда кодтам суджы пецтæй. Уый та æвзæрæрдæм æндæвта нæ инструменттыл. Ацы бæстыхай у арæзтадон организацийы, ныртæккæ ам нал кусынц. Фыццаг уæладзыджы цы кабинеттæ ис, уыдон сты æхгæд æмæ нæ фæнды, цæмæй сæ радтой скъолайæн. Мах ма райсиккам 50-100 сывæллоны, фæлæ нын кълæстæ нæ фаг кæнынц. Ахуыргæнджытæ фæлæууынц рады, цæмæй сæ уроктæ ауадзой. Ацы фарст мах бирæ хæттыты æвæрдтам Хицауады раз. Проблемæ зонгæ у нæ Президент Бибылты Анатолийæн дæр æмæ нын ныфс бавæрдтой, горæты администрацийы ‘рдыгæй фарст скъуыддзаг кæй æр-цæудзæн æмæ æхгæд кабинеттæ цал-цæггонд кæй æрцæудзысты», – зæгъы Æлборты чызг.
Дианæ ма радзырдта скъолайы музыкалон инструментты тыххæй дæр. Фæстаг азты сæ уавæр ацы хъуыддаджы фæхуыздæр, культурæйы министрад нын самал кодтой 2 пианинойы æмæ сын горæты администраци та радта домрæтæ, иу электропианино. Хъыгагæн сын нæй рояль.
Цхуырбаты Ларисæ
Comments are closed, but trackbacks and pingbacks are open.