Уæрæсейы боны цытæн паддзахадон драмон театры сценæйыл цымыдисон концерт радта зындгонд советон æмæ уæрæсейаг джазмен, композитор æмæ дирижер Олег Лундстремы номыл джазон музыкæйы Паддзахадон камерон оркестр. Концертон программæйы арæхстдзинад æвдыста Цæгат Ирыстон-Аланийы сгуыхт артисткæ, джазон солисткæ Каботы Елизаветæ.
Ахæм популярон сфæлдыстадон коллективтæ нæм арæх кæй не ‘рцæуынц, уымæ гæсгæ театры зал байдзаг музыкæйы аивадæн табугæнджытæй. Хуссарирыстойнаг музыкæуарзджытæ артисттæн æмдзæгъд кодтой лæугæйæ, уымæй бæрæг уыдис, джазон музыкæйæн æгæрон аргъ кæй кæны ирон публикæ, уый.
Уæрæсейаг легендарон оркестр йæ аивадон къухдариуæггæнæг, сæйраг режиссер æмæ адæмон артист Борис Фрумкины къухдариуæгадæй сæххæст кодтой зындгонд уæрæсейаг æмæ фæсарæйнаг композиторты джазон музыкæйы шедевртæ, афтæ ма сценæмæкæсджыты зæрдыл æрлæууын кодтой кинонывтæй ист музыкæтæ æмæ адæмон зарджытæ, кæцыты рацарæзтой джазмæ.
Олег Лундстремы номыл оркестр Цхинвалы концерт радта проект «Обменные культурные мероприятия России в Южной Осетии»-йы фæлгæтты Уæрæсейы Федераци æмæ нæ республикæйы Культурæты министрадты æххуысæй. Бæрæгбонон концертмæ фæуазæг сты нæ республикæйы къухдариуæгад Президент Гаглойты Аланы сæргълæудæй, афтæ ма Хуссар Ирыстоны Уæрæсейы Федерацийы æххæстбарджын минæвар Марат Кулахметов. Уæрæсейаг минæвар бæрæгбоны сæраппонд арфæ ракодта æгас республикæйы адæмæн дæр æмæ банысан кодта Уæрæсейы бон кæй у стыр æмæ æппæтадæмон бæрæгбон, уый. «Ныртæккæйы дуджы ацы бæрæгбон у нысаниуæгджын æмæ сæрмагонд бæрæгбон, кæцы махæй домы иудзинад æмæ уый абон фæбæрæг ацы концертæй дæр. Цæмæй Хуссар Ирыстоны нæ бæрæгбон хуыздæрæй ацыдаид, уый тыххæй нын «Росконцерт» балæвар кодта стыр æхцондзинад. Ахæм популярон æмæ номдзыд коллективимæ, кæцыйы сарæзта йæ хъуыддаджы стыр профессионал композитор Олег Лундстрем», – банысан кодта Марат Кулахметов.
Культурæйы министр Зæгъойты Рада дæр сценæмæкæсджытæн арфæ ракодта Уæрæсейы боны цытæн æмæ банысан кодта, Хуссар Ирыстон æмæ Уæрæсейы адæмты рагæй фæстæмæ кæй иу кæны бирææнусон хæлардзинад: «Хуссар Ирыстоны Уæрæсейы бон у паддзахадон бæрæгбон æмæ нæхи нымайæм стыр паддзахады иу хайыл. Мах Уæрæсейы Федерациимæ иу кæны æмгуыстад алы фадыджы дæр, уыимæ культурæйы къабазы дæр. Тынг æхсызгон нын у нæ республикæмæ ахæм зындгонд сфæлдыстадон коллективы æрцыд æмæ йæ концертмæ бакæсын. Ахсджиаг хъуыддагыл нымайæм ахæм цымыдисон мадзæлттæ уадзын æмæ Уæрæсейы Федерациимæ культурæйы фадыджы æмгуыстад кæнын. Уадз æмæ нæ адæмты æхсæн ноджы арфдæр кæной хæлардзинады тæгтæ æмæ нæ фæндæгтæ уæрæхдæр кæной культурæйы къабазы. Бæрæгбоны хорзæх не ‘ппæты дæр уæд!», – загъта Зæгъойты чызг.
Кæронбæттæны хуссарирыстойнаг сценæмæкæсджытæн арфæ æмæ бузныджы ныхæстæ загъта легендарон оркестры аивадон къухдариуæггæнæг Борис Фрумкин. Уый ма йæ раныхасы банысан кодта, зæгъгæ, йын тынг æхсызгон у, ахæм нысаниуæгджын бон кæй нысан кæнынц Хуссар Ирыстоны æмæ ирон адæмы уазæгуарзондзинад æмæ хъарм ахаст та кæй бахъуыды кæндзæн цæргæ цæрæнбонтæм.
Нæ уацх.
