Горæт Сочийы 8-12 июны уыдис сывæллæтты-æвзæнгты æмæ хистæр кары адæймæгты сфæлдыстады 2-аг æхсæнадæмон конкурс «Жемчужина Черноморья», зæгъгæ. Мадзал ацыд аншлагимæ. Архайдтой дзы Краснодар, Астрахань, Черкесск, Цæгат Ирыстоны сфæлдыстадон коллективтæ. Конкурсы хайад райста Цъинагары хъæуы Культурæйы хæдзары хореографион ансамбль «Арвырон» йæ аивадон къухдариуæггæнæг Гуссойты Ласкойы сæргълæудæй. Куыд æрвылхатт, афтæ та ныр дæр ансамблы уæнгты курдиат æмæ арæхстдзинад фæцыд жюрийы уæнгты зæрдæмæ æмæ та йын ам дæр саккаг кодтой Гран-При æмæ дыккаг къæпхæны лауреаты диплом.
Ансамбль Гран-При райста, «Хонгæ кафт» тынг хорз кæй сæххæст кодтой, уый тыххæй. Дыккаг къæпхæны лауреаты диплом та жюри радта æвзонг артисттæн «Зилгæ кафт»-ы тыххæй. Афтæ ма «Народный сценический танец»-ы номинацийы ансамбль «Арвырон»-ы солисттæ Хуыбылты Виктория æмæ Болататы Давидæн саккаг код-той фыццаг бынат.
Сывæллæтты кафты аивады рæзты хъуыддагмæ йæ хайбавæрды тыххæй ансамблы аивадон къухдариуæггæнæг Гуссойты Ласкойы конкурсы организатортæ схорзæхджын кодтой арфæйы фыстæгæй.
Гуссойы фырты ныхæстæм гæсгæ мадзалы организатортæ райстой тынг хорз. Сывæллæттæ сæ балцæй баззадысты райгондæй.
Уый размæ, апрелы мæйы кæрон та «Арвырон» Гран-Прийы хицау æмæ фыццаг къæпхæны лауреат ссис æхсæнадæмон конкурс «Сказочный Домбай»-йы.
Нæ уацх.
