Мæскуыйаг юрист æмæ испайнаг æвзаджы ахуыргæнæг Маргарита Исаакова иу азы бæрц зæрдиагæй ахуыр кæны ирон æвзаг. Йæ сахуыр кæнын æй бафæндыд Цæгат Ирыстонмæ йæ балцы фæстæ. Чызджы бафæндыд ирон адæмы истори æмæ культурæ арфдæр базонын, æмæ куыд культурæйы ахсджиагдæр хай, афтæ æвзаджы ахуыр ссис йæ цымыдисы фæстиуæг. «Ирон æвзаг ахуыр кæнын райдыдтон иу азы размæ, Цæгат Ирыстоны цалдæр хатты куы уыдтæн, уый фæстæ, уымæн æмæ мæ зæрдæмæ тынг фæцыд йæ диссаджы культурæ.
Уæд æз схæснаг кодтон мæ студенттæ-ирæттимæ, зæгъгæ, цалынмæ уыдон испайнаг ахуыр кæной, уæдмæ æз ирон æвзаг тагъддæр сахуыр кæндзынæн. Æз фембылды дæн, æвзаг нырма нæ сахуыр кодтон, фæлæ йæ дарддæр ахуыр кæнын. Æгæронæй мæ зæрдæмæ цæуы ирон культурæ, æз кастæн Къостайы уацмыстæ æмæ Нарты кадджытæ æмæ уый фæстиуæгæн æрцыдтæн ахæм хатдзæгмæ, зæгъгæ, хъæуы ирон æвзаг сахуыр кæнын. Æз дæн юрист æмæ испайнаг æвзаджы ахуыргæнæг, каст фæдæн МГИМО. Ахуыр кодтон æхсæз æвзаджы, сæрибарæй дзурын цыппар æвзагыл. Фæлæ мын ирон æвзаг сахуыр кæнын афтæ æнцон нæу, уымæн æмæ раздæр ахуыр кодтон романаг-гермайнаг æвзæгтæ, æмæ ирон æвзаг та хауы индоевропæйаг æвзæгтæм», – дзуры специалист.
Ныртæккæ Маргарита Исаакова ссардта дзæуджыхъæуккаг æвзонг ахуыргæнæджы æмæ йын уый онлайн-форматы амоны ирон æвзаг. Традицион академион амал у дзырдуатимæ ахуыр кæнын, йæ хъуыддаджы æцæг дæсны ахуыргæнæджы къухдариуæгадæй грамматикæ ахуыр кæнын у иууыл растдæр фæрæз. Интернеты цъус контент ис иронау. Ис ахуыргæнæн чингуытæ, æвзаг чи нæ зоны, уыдонæн, фæлæ се ссарын стыр проблемæ у. Ис бирæ фильмтæ æмæ мультфильмтæ ирон æвзагыл, фæлæ уыдон хуыздæр сты, иронау иу чысыл дæр чи дзуры æмæ æмбары, уыдонæн. Бирæ хъуыстон «Иристон ТВ»-мæ ирон æвзагыл, райдианы æмбæрстон 5 проценты, уый фæстæ – 15 æмæ афтæ куыдфæстагмæ райдыдтон æмбарын, цы хъусын, уыцы ныхæсты 75 проценты», – радзырдта чызг. Исаакова мæйы дæргъы иу хатт финансон æххуыс бакæны журнал «Ногдзау»-æн. «Сывæллæтты ацы журнал у тынг хорз ирон æвзагыл æмæ мæ фæнды мæ чысыл хайбавæрд æм уæддæр бахæссон», – загъта уый.
Нæ уацх.
