25 майы Республикæ Хуссар Ирыстоны тыхджын ихуард кæй уыд æмæ кæй разиæнттæ кодта, уый фæдыл Президент Бибылты Анатоли ауагъта æмбырд. Йæ куысты хайад райстой Хицауады Сæрдар Пухаты Эрик, Финансты министр Хæбæлаты Азæ, горæт Цхинвалы администрацийы сæргълæууæг Коцты Алан, Цхинвалы районы администрацийы сæргълæууæг Мамытаты Вахтанг æмæ Дзауы районы администрацийы сæргълæууæг Джиоты Андрей.
Паддзахады сæргълæууæг бахатыд æмбырды хайадисджытæм, цæмæй йæ базонгæ кæной сæвзæргæ уавæримæ.
«Мæн фæнды сымахимæ æруынаффæ кæнын ихуарды фæстиуджытыл, кæцы уыд республикæйы æмæ оперативон æгъдауæй сæ аиуварс кæныны механизмтыл бакусын. Сæйраджыдæр, бакусын хъæуы сæрмагонд планыл, цæмæй цыбыр æмгъуыдмæ ихуарды фæстиуджытæ аиуварс кæнæм», – загъта уый.
Горæт Цхинвалы сæргълæууæг Коцты Алан загъта, зæгъгæ, Цхинвалы ныппырх ис Фидауынгæнджыты уынджы 12-æм бирæфатерон хæдзары æмбæрзт, кæцыйы цалцæг кæнынмæ æрæвналдзысты æмбæлон службæтæ.
Дзауы районы администрацийы сæргълæууæг Джиоты Андрейы ныхæстæм гæсгæ, районы бахъыгдард сты цалдæр хъæуы хæдзæрттæ.
«Ручъы хъæуы ныппырх сты бирæфатерон æмæ сæрмагонд хæдзары æмбæрзтытæ. Бирæфатерон æндæр хæдзарæн та разиан чындæуыд 60 проценты бæрц. Хуыцъейы хъæуы хъыгдард баййæфтой ис 19 хæдзары, бæрæгбæрцæй разианчындæуыд Тъонтъобеты хъæуы дæр. Райцентры бахъыгдард ис 23 хæдзары, кæцытæй Дзауы районы администрацийы тыхтæй сцалцæг кæндзыстæм 21 хæдзары æмбæрзт. 11 раны та бахъыгдард ис электроифтонгады хахх», – загъта уый.
Цхинвалы районы ихуард разиан кодта æртæ хæдзарæн. Æрдзон æнамонддзинад стыр зиан æрхаста республикæйы хъæууон хæдзарадæн.
Президент бахæс кодта, цæмæй банымайой ракæнгæ зиæнттæ æмæ æрæвналой ихуарды фæстиуджытæ аиуварс кæнынмæ.
«28 майы Хицауады рабадты хъуамæ информаци уа, зиæнттæ аиуварс кæныны фæдыл финансон хæрдзтæ цас хъæуы, уый тыххæй. Афтæ ма хъæуы, цæмæй специалисттæ аргъ скæной бæлæсты уидæгты уавæрæн æмæ кæд уыдонæй кæцыдæртæн тæссаг у ракæлынæй, уæд сæ лыг кæнын хъæуы», – загъта Бибылты Анатоли.
РХИ-йы Президент æмæ
Хицауады пресс-службæ
Comments are closed, but trackbacks and pingbacks are open.