Стыр Фыдыбæстæйон хæсты Уæлахизы бон кад æмæ цытимæ банысан кæныны сæраппонд Республикæ Хуссар Ирыстоны ацы бонты уагъд цæуынц бирæ алыгъуызон культурон мадзæлттæ.
Бæрæгбоны сæраппонд нæ республикæйы Нывгæнджыты цæдис дæр сæхи цæттæ кæнынц 9-æм маймæ. Уыдон ныридæгæн æрæвнæлдтой сæ равдыстмæ бæцæттæ кæныны куыстытæм, архайынц, цæмæй нывты равæрд уа аив æмæ ахадой æрбацæуджыты цæстыты. Нывгæнджыты цæдис сæ равдыст рахуыдтой «Гремят истории колокола, взывая к памяти моей». РХИ-йы Нывгæнджыты цæдисы сæрдар Цхуырбаты Тамерлан нын куыд загъта, афтæмæй бæрæгбонон равдыст официалон æгъдауæй баконд æрцæудзæнис 9-æм майы киноконцертон зал «Чермен»-ы. «Ирыстоны иу ахæм хæдзар дæр нæ разындзæнис, кæцыйыл Стыр Фыдыбæстæйон хæст нæ бандæвта. Уый махæн у нæ истори æмæ рох кæнын нæ хъæуы йæ хъайтарты. Хъæуы архайын, цæмæй нæ кæстæртæ ма рох кæной ахæм стыр æмæ нысаниуæгджын цаутæ.
Нырма нæ нывгæнджытæ се ‘ппæт не ‘рбахастой сæ нывтæ, фæлæ ныридæгæн бæрæг у, сæ темæ, сæйраджыдæр, баст кæй у Стыр Фыдыбæстæйон хæстимæ. Аивады æвзагæй мах дæр фæнды балæггад кæнын уæлахизхæсджытæн æмæ уымæй нæ чысыл хайбавæрд бахæссын ацы стыр бæрæгбонмæ», – загъта Цхуырбаты Тамерлан.
Нывгæнджыты цæдисы сæрдар ма куыд банысан кодта, уымæ гæсгæ адæмæн фадат уыдзæнис æнæхъæн мæйы дæргъы равдысты куыстимæ зонгæ кæнынæн. Æдæппæтæй бæрæгбонон равдысты уыдзæн 70 нывæй фылдæры бæрц, кæцытæн сæ фылдæр фыццаг хатт хаст æрцæудзысты адæмы рæгъмæ.
Нывтæй дарддæр ма равдыстмæ хаст æрцæудзысты æрмдæсныты куыстытæ дæр. Ныридæгæн уал равдыстмæ йе сфæлдыстадæй цалдæр куысты æрбахаста Козаты Игорь. Сæ бынæттæ дзы ссардзысты Гæбæраты Юри æмæ Коцты Дженнийы куыстытæ дæр.
Нæ уацх.
Comments are closed, but trackbacks and pingbacks are open.