Къостайы азы фæлгæтты Дзауы поселочы киноконцертон залы байгом ацы районæй нывгæнджыты куыстыты равдыст. Сорганизаци йæ кодтой Дзауы районы администрацийы культурæйы хайады кусджытæ Цхуырбаты Галинæйы сæргълæудæй. Равдысты æвæрд æрцыдысты РХИ-йы адæмон нывгæнджытæ Санахъоты Валентин æмæ Бежанты Вадимы нывтæ, афтæ ма нывгæнджытæ Гаглойты Багир, Санахъоты Вячеслав, Карсанты Измаиль, Цхуырбаты Аллæйы конд нывтæ. Равдысты сæ бынат ссардтой æрыгон нывгæнджытæ горæт Къуайсайæ – Зассеты æфсымæрты нывтæ дæр. Уыдонæй сæ иу аив сныв кодта Къостайы портрет.
Цхуырбаты Галинæ куыд банысан кодта, уымæ гæсгæ сын Къостайы азы фæлгæтты плангонд ис æнæхъæн азы дæргъы 25 мадзалы ауадзын æмæ, зæгъ, ацы нывты равдыст у фыццаг мадзал.
Равдыст гом кæныны церемонимæ æрбацыд бирæ адæм. Сценæйыл конд уыд Къостайы стыр портрет, афтæ ма залы иннæ кæрон æвæрд уыд Къостайы бюст æмæ йæ цуры стъолыл та Костайы азы сæраппонд куысты план æмæ фæндæтты журнал. Залы иннæ фарс та æвæрд уыд Къостайы ныв ахæм фыстимæ: «Иры хур скасти Нарæй».
Равдыстмæ æрбацæуджытæ дзырдтой сæ тæлмæнтæ курдиатджын нывгæнджыты сфæлдыстады фæдыл. Нывгæнæг Санахъоты Валерийы нывтæ сты уыд юморы ‘рдæм здæхт. Бежанты Вадимæн йæ нывты æвдысты æрцыдысты ирон адæмы цар-дуагон æгъдæуттæ. Гаглойты Багир та йæ нывты равдыста Ирыстоны рæсугъд æрдз æмæ афтæ дарддæр.
Бузныджы ныхæстæ зæгъын æмбæлы равдыст чи сорганизаци кодтой, уыдонæн – Дзауы районы администрацийы культуæйы хайады кусджытæ Цхуырбаты Анжелæ, Къæбысты Роберт, Санахъоты Сергей, Кокойты Вадим, Кæркуысты Индирæ æмæ Джиоты Ларисæйæн. Бузныг зæгъын хъæуы нывгæнджытæн дæр сæ цымыдисон куыстыты тыххæй.
Цхуырбаты Галинæ ма куыд банысан кодта, уымæ гæсгæ уыдон сæрыстыр сты Дзауы районы ахæм бирæ курдиатджын нывгæнджытæ кæй ис, уый тыххæй.
Джиоты Екатерина
Comments are closed, but trackbacks and pingbacks are open.