Алы горæты цард дæр, чи дзы цæрынц, уыдон аразынц. Нæ горæты цард та, советон дугимæ абаргæйæ, бирæбæрцæй фæивта. Кæм хуыздæрæрдæм, кæм та – æвзæрæрдæм. Абон астæуккаг æмæ хистæр фæлтæр æрымысынц, цæй æнцой, æдас цард кодтой раздæр. Æмæ, уый, æцæгæйдæр, афтæ уыдис. Кæрæдзийы фарсмæ ахуыр кодтой, куыстой, уынджы кæрæдзийыл æмбæлдысты, адджын сыхæгтæй цардысты бирæ æндæр æмæ æндæр нациты минæвæрттæ. Фæлæ фехæлд Советон Цæдис, хæст сцырын нæ зæххыл æмæ бирæтæ фæлыгъдысты, сæ цардæн æдас кæм уыд, ахæм рæттæм.
Йæ бон уыд æмæ фæлыгъдаит хæсты цæхæрæй Леван Тертеров дæр, цæмæй йын тасдзинад цы хъизæмæрттæ хаста, уыдон ма бавзæрстаид æмæ фæрсæрдыгæй хъуыстаид, ам цы трагикон хабæрттæ цыдис, куыд мæлынц кæй æхсæн цард, уыдонæй бирæтæ. Фæлæ Леван йæ сæрмæ не схаста ардыгæй фæлидзын. Ирыстоны уый кæддæриддæр нымадта йæ райгуырæн бæстæйыл, уымæн æмæ ам, нæ горæты, райгуырд, ам схъомыл, ам рацыд адæмы рæгъы. Ам, нæ горæты, райгуырд йæ фыд Ваня дæр. Йæ рæстæджы горæты чи цардысты, уыдон æй хорз зыдтаиккой. Уыд авглыггæнæг æмæ уæды рæстæджы та ахæм дæсныйад хъæуæг уыдис. Уæдæ иу æмæ дыууæ цхинвайладжы хæдзары рудз-гуытыл кæм бакодтаид æвгтæ!
Леван йæ фыды хъуыддаг нæ адарддæр кодта. Йæ фыдæй хъауджыдæр, уымæн фадат уыдис ахуырдзинад райсынæн æмæ ныллæууыд ахуыры фæндагыл.
Нæ горæты цы иунæг гуырдзиаг астæуккаг скъола уыдис, уым ахуыр кодта æмæ йæ куы бакаст, уæд ацыдис Ростовмæ æмæ йæ гæххæттытæ бахаста Ростовы паддзахадон университеты юридикон факультетмæ. Диссаг уый уыд æмæ скъола кæд гуырдзиаг æвзагыл бакаст, уæддæр уырыссаг æвзагыл æнтыс-гæйæ радта фæлварæнтæ. Фæстæмæ æрыздæхт юристы дипломимæ æмæ йæ кусынмæ райстой нæ горæты адвокатурæмæ адвокатæй. Фæкуыста дзы 50 азы бæрц. Хæларæй цард Леван, чи йæ зыдта, йæ царды рæсугъддæр бонтæ кæимæ æрвыста, уыцы ирон адæмимæ. Æмæ йын тынг зын уыд, кæм схъомыл, уыцы Ирыстоны зæххыл хæсты арт кæй ссыгъд, уый. Йæхи цæстæй уыдта Леван, цы уæззау хабæрттæ цыдис йæ алыварс, уыдон. Йæхæдæг дæр æвзæрста уыцы уæззау дуджы æппæт зындзинæдтæ. Тæссаг уыдис йæ цардæн дæр, фæлæ уый иу бон дæр нæ ныууагъта, кæм схъомыл, уыцы горæт æмæ нæ бафснайдта йæ сæр, кæд ын уый фадат уыд, уæддæр. Уый карз тæрхон хаста, хæст чи райтынг кодта, уыдонæн. Йæ зæрдæмæ нæ цыд, уыцы зын рæстæджыты йæ райгуырæн къуым чи уагъта æмæ æндæр рæттæм цæрынмæ чи лыгъдысты, уыдон дæр. «Кæм схъомыл уай, дæ фыццаг къахдзæфтæ кæм акæнай, уыцы зæхх зынаргъ у, æмæ йæ куыд æнцонæй ныууадзынц бирæтæ» – арæх иу дзырдта Леван æмæ ма-иу йæ ныхасмæ бафтыдта, зæгъгæ, дыууæ адæмы ‘хсæн фыдæхдзинад чи байтыдта, уыдонæн Хуыцау ма ныббарæт.
Леван сæрыстыр уыд, цхинвайлаг кæй уыд, уымæй. Уый ирæтты ‘хсæн цæргæйæ, хъахъхъæдта ирон традицитæ æмæ культурæ. Бирæ хæлæрттæ йын уыд ирон адæмæй. Адджынæй цардис йæ сыхæгтимæ.
Æнувыд уыд йæ куыстыл дæр. Уый архайдта йæ зонындзинæдтæ фылдæр кæныныл æмæ кастис тынг бирæ литературæ. Куыд адвокат, афтæ архайдта закъонмæ гæсгæ йæ куыст аразыныл.
Леваныл кæд 82 азы цыд, уæддæр уыд уæнгрог, хъæлдзæг. Йæ худæн ныхас æдзух йæ былалгъыл дардта. Фæлæ йæ æнæнхъæлæджы мæлæт атыдта йе ‘мгæрттæй, йæ хиуæттæй, кæимæ куыста, уыдонæй.
Афтæ æмудæй фæцард йæ царды кæронмæ ирон адæмимæ Тертеров Леван. Æмæ йын уыдон дæр кад æмæ аргъ кодтой. Йæ фæстаг фæндагыл æй куы фæндараст кодтой, уæд, кæд боныгъæд æвзæр уыдис, уæддæр бирæ адæм æрцыдис хæрзбон ын зæгъынмæ. Стыр кад ын скодтой йæ коллегæтæ дæр…
Бестауты Валя
Comments are closed, but trackbacks and pingbacks are open.