РЦИ-Аланийы физикон культурæ æмæ спорты министрæй нысан æрцыд Гæззаты Юри Фарзуны фырт. уый фæдыл барамындыл йæ къух æрфыста РЦИ-Аланийы Сæргълæууæг Сергей Меняйло. Раздæр ацы ведомствæйы сæргъ лæууыд Коцты Сослан. Уый та Меняйлойы иннæ барамындмæ гæсгæ нысан æрцыд РЦИ-Аланийы туризмы комитеты сæрдары рæстæгмæ хæстæ æххæстгæнæгæй.
Раздæр Гæззаты Юри куыста РЦИ-Аланийы Сæргълæууæджы уынаффæгæнæгæй.
Гæззаты Юри у советон, уæрæсейаг футболист æмæ тренер. Фæстаг хатт ма 2020/2021 сезоны уыд Ярославлы «Шинник»-ы тренер.
ФУТБОЛ
Футболæй Уæрæсейы Фыццаг дивизионы 12-æм туры Дзæуджыхъæуы «Алани» уазæгуаты хъазыд Саратовы «Сокол»-имæ. Фембæлды рæстæджы командæтæй никæмæн бантыст пурти бакъуырын æмæ хъазт фæцис 0:0 хыгъдæй.
12 туры фæстæ «Алани» æрæмбырд кодта 24 очкойы æмæ турнирон таблицæйы цæуы 2-аг бынатыл. Фыццаг бынаты ис Махачкалайы «Динамо». Уымæн дæр ис 24 очкойы, фæлæ уæлæмхас бæрæггæнæнтæм гæсгæ ссис чемпионаты лидер.
«Алани» радон хъазт акæндзæн 9 октябры чемпионаты фавориттæй сæ иу -«Химки»-имæ.
ХУРИТЫ Батрадз