Ног азы æрлæудмæ сывæллæттæ фæбæллынц, цæмæй сын Митын Дада сæ бæллицтæ сæххæст кæна. Фæфыссынц фыстæджытæ, фæзæгъынц сæ фæндиæгтæ æмæ фенхъæлмæ кæсынц сæ лæвæрттæм. Ацы аз Цхинвалы районы милицийы управленийы кусджытæ сæ къухдариуæгады хъæппæрисæй æрæмбырд кодтой æхцайы фæрæзтæ æмæ Ног азы агъоммæ баххуыс кодтой цыппар æвæрæз бинонтæн. Ӕххуыс та сын бакодтой хæлцадон продукттæй.
29-æм æмæ 30-æм декабры милицийы управленийы æнахъомты фæдыл хайады кусджытæ азылдысты ацы бинонтыл æмæ сæм фæхæццæ кодтой сæ ногазон лæвæрттæ. Ӕнахъомты фæдыл милицийы хайады сæргълæууæг Тедеты Линæйы ныхæстæм гæсгæ æххуысхъуаг бинонтæ ноджы фылдæр сты, фæлæ сæм цы фæрæзтæ уыдис, уыдон фыццаг рады радтой иууыл цыбыркъухдæр бинонтæн.
Фыццаг уал фæуазæг сты Дменисы хъæумæ Дзанайты бинонтæм, цыран мад æмæ фыдæн ис цыппар æнахъом сывæллоны – 3 лæппуйы æмæ иу чызджы. Хистæр лæппуйыл цæуы 9 азы, кæстæрыл та – 10 мæйы. Ацы би-нонтæ сты цыбыркъух, не ‘ххæссынц сæ цардыл æмæ сын исты баххуыс кæнын у «уды бæстæ». Цы хæлцадон продукттæ сын бахастой, уыдоныл зæрдиагæй бацин кодтой æмæ арфæйы ныхæстæ загътой ацы акци саразджытæн.
Дарддæр та ацыдысты Дменисы хъæуы цæрæг Дудуайты Иринæмæ, кæцыйæн ис æртæ сывæллоны – дыууæ чызджы æмæ иу лæппу. Хистæр цæуы 11-æм къласмæ, кæстæр та – 5-æм къласмæ. Иринæ никуы кусы æмæ йын уымæ гæсгæ тынг зын у йе ‘ртæ сывæллоны хъомыл кæнын. Йæ азмæлæнтæ сты къуындæг, нæй йын элементарон уавæртæ цæрынæн. Ӕгæрыстæмæй йæм дон дæр нæ цæуы æмæ сыхæгтæй фæхæссы дон.
Сæ фæндаг адарддæр кодтой Цъунары хъæумæ. Мæлдзыгаты бинонтæн ис 4 сывæллоны. Хистæрыл цæуы 16 азы, кæстæрыл та – 7 мæйы. Тынг æхсызгонæй сæмбæлдысты ахæм лæварыл, уымæн æмæ ахæм хуызы æххуыс райсын æнхъæл нæ уыдысты.
Ацыдысты ма Икортайы хъæумæ дæр. Ам та баххуыс кодтой Къæбулты Зæринæ æмæ йе ‘ртæ сывæллонæн. Хистæр сывæллон цæуы 3-æм къласмæ, кæстæрыл та цæуы 4 азы. Милицийы хистæр инспектор Къусраты Индирæ куыд зæгъы, афтæмæй лæмбынæг зонгæ сты Цхинвалы районы æппæт æвæрæз бинонты цардимæ æмæ сын, гæнæн уæвгæйæ, сæ къух фæрæуæг кæнынц.
«Махæн алыхатт нæ бон нæу æмæ ахæм бинонтæн материалонæй æххуыс кæнæм. Фæлæ алыхатт дæр сæ фарсмæ балæууæм æмæ сын сæ проблемон фарстатæ аскъуыддзаг кæнынмæ фæкæсæм», – зæгъы Индирæ.
Уымæй уæлдай ма милицийы кусджытæ зонгæ сты сывæллæтты бæллицтимæ дæр. Ӕрæджы, анонимон спонсор, управленимæ æрбахаста лæвæрдтæ сывæллæттæн æмæ сын сæ ныр милицийы кусджытæ Ног азы хæдразмæ радтой. Сатихъары хъæуы æнахъом цæрджытæ Дыгъуызты Владик æмæ Алан лæварæн райстой фæйнæ хъазæн машинæйы, кæцыты тыххæй сæ фыстæджыты бахатыдысты Митын Дадамæ. Дменисы хъæуы æнахъом цæрджытæ Джиголаты Дианæ æмæ Дауыты фыстæджытæ дæр фæхæццæ сты Митын Дадамæ æмæ сын æрæрвыста куклæ æмæ хъазæн машинæ. Уыдис ма дзы æндæр лæвæрттæ дæр.
ДЖИОТЫ Александр
Comments are closed, but trackbacks and pingbacks are open.