Ног азы хæдразмæ – ног куыстуат

Ног куыстуат байгом кæныны церемонимæ æрбацыдысты Республикæ Хуссар Ирыстоны Президент Бибылты Анатоли, Хицауады Сæрдар Пухаты Эрик, йæ хæдивæг  Бекъойты Геннади  æмæ Хицауады æндæр бæрнон кусджытæ.

Цытджын мадзалы куыстуаты акционертæй сæ иу – Васили Шишков куыд загъта, афтæмæй куыстуат саразыны фæдыл проект реализаци кæныныл бахардз  70 милуан сомы æмæ æввахсдæр азты та план  цæуы, цæмæй инвестицитæ фæфылдæр уой æртæ хатты. Уый бузныг загъта республикæйы разамынадæн,  куыстуат  байгом  кæнынæн æппæтфарсон  æххуыс кæй кодта, уый тыххæй.

Президент Бибылты Анатоли йæ раныхасы банысан кодта республикæмæ инвестицитæ æрбакæныны ахсджиагдзинад, зæгъгæ, уымæй кæнгæ у экономикæйы рæзт, ног кусæн бынæттæ саразын, адæмы фæрныгад рæзын кæнын, паддзахадон бюджет баххæст кæнын æмæ афтæ дарддæр.

Уый куыд загъта, афтæмæй республикæйы территорийыл ныридæгæн реализаци æрцыдысты уæрæсейаг инвесторты егъау проекттæ. Уыдон сты Цхинвалы хуыйæн фабрикæ «БТК-4», «Ирыстоны дыргъдæттæ» æмæ æндæртæ. «Ныртæккæ сымах дæр уæ капитал бавæрдтат Хуссар Ирыстоны уæ проект сæххæст кæнынмæ. Уый та дзурæг у, уæрæсейаг бизнесментæ тынгæй тынгдæр кæй æууæндынц нæ республикæйыл. Мах дарддæр дæр, гæнæн уæвгæйæ, алцыдæр араздзыстæм, цæмæй инвестортæн Хуссар Ирыстоны уа хæрзвадат уавæртæ. Президент куыд банысан кодта, афтæмæй хæслæвæрд радта, цæмæй «Ирон сæн» саразыны фæдыл проекты реализацигæнджытæ сæ фиддонтæ фидой хатырон уавæрты.

Уый фæстæ Бибылты Анатоли алыг кодта сырх лентæ æмæ азылдысты куыстуаты. Уыдон базонгæ сты куыстуаты архайд æмæ сæн уадзыны технологиимæ. Федтой йæ адæй æмæ бафиппайдтой сæны хæрзгъæддзинад.

Зæгъын хъæуы уый æмæ ацы куыстуат 2017 азы кæй æрбынат кодта Консерваразæн заводы. Уым æвæрд æрцыдысты, нырыккон домæнтæн дзуапп чи дæтты, ахæм италиаг ифтонггæрзтæ.

Завод иу мæймæ уадздзæнис 600 сæны авджы. Ныртæккæ куыстуат уадзы цыппар хуызы сæн – «Шираз», «Каберне Совиньон», «Мерло», æмæ «Совиньон». Фæлæ куыстуаты къухдариуæггæнæг куыд зæгъы, афтæмæй фæнд кæнынц ноджыдæр сæ куыстуат райтынг кæнын æмæ сæны ног хуызтæ рауадзын. Уыдон ма фæнд кæнынц коньяк æмæ дыргъы дæттæ уадзын дæр.

Завод йæ продукци реализаци кæндзæнис куыд Уæрæсейы Федерацийы базæртты, афтæ ам бынæттон базары дæр.

Æхсызгон хъуыддаг у ныридæгæн куыстуаты 30 кусæджы бæрц кæй кусы, уый. Уыдонæн сæ куыстмызд æххæссы 30 мин соммæ. Куыстуат куыд уæрæхдæр кæна, афтæ фылдæр кæндзысты сæ кусджытæ дæр. Сæ фæнд у, уыдоны 150 бæрц скæнын.

БЕСТАУТЫ Валя