Кæрæдзимæ радтой ратификацион грамотæтæ

Республикæ Хуссар Ирыстоны Президент Бибылты Анатоли фембæлд Донецкы Адæмон Республикæйы Фæсарæйнаг хъуыддæгты министр Наталья Никонороваимæ.

Фембæлды хайад райстой РХИ-йы Фæсарæйнаг хъуыддæгты министр Медойты Димитр, йæ фыццаг хæдивæг Цхуырбаты Андрей, Донецкы Адæмон Республикæйы Фæсарæйнаг хъуыддæгты министры фыццаг хæдивæг Сергей Пересада.

Уазджытæн æрцæуинаг бæрæгбонты цытæн раарфæ кæнгæйæ, паддзахады сæргълæууæг банысан кодта, зæгъгæ, республикæмæ уыдоны балцæн ис раздæры сразыдзинæдты размæ кæныны нысаниуæг.

«Хуссар Ирыстонмæ уæ балц баст у дывæрсыг ахастыты ахсджиаг этапимæ. Мах нæ кæрæдзимæ ратдзыстæм ратификацион грамотæтæ æмæ Хæлардзинад æмæ æмгуыстады фæдыл бадзырд йæ тыхы бацæудзæн. Фæлæ мах ныридæгæн бадзырдмæ гæсгæ нæ хæстæ æххæст кæнæм. Эффективонæй æмгуыст кæнынц Хуссар Ирыстон æмæ Донецкы Адæмон Республикæйы Фæсарæйнаг хъуыддæгты министрадтæ æмæ æндæр ведомствотæ. Дарддæр дæр уæрæх кæндзыстæм нæ æмархайд», – загъта Бибылты Анатоли.

Донецкы Адæмон Республикæйы адæмæн йæ цæст бауарзта сабырад æмæ ног æнтыстытæ æрцæуинаг ног азы.

Йæ фарсæрдыгæй Донецкы Адæмон Республикæйы Фæсарæйнаг хъуыддæгты министр Наталья Никонорова бузныджы ныхæстæ загъта, хъæрмудæй сæ кæй райстой, уый тыххæй æмæ банысан кодта, зæгъгæ, ногазон рæстæгмæ фидыдадыл украинаг фарсимæ нæма бадзырдтой, фæлæ йæ ныфс ис, уый къухты кæй бафтдзæн. Уый ма бузныджы ныхæстæ загъта РХИ-йы къухдариуæгадæн, се ‘ххуысы къух сæм кæй фæдаргъ кодтой – Донецкы Адæмон Республикæйы хæдбардзинад кæй банымадтой, уый тыххæй.

«2017 азы 11 майы мах нæ республикæты ‘хсæн Хæлардзинад æмæ æмгуыстады фæдыл бадзырдыл нæ къухтæ æрфыстам. Банысан кæнын хъæуы уый, æмæ уæдæй фæстæмæ æмархайд кæй кæнынц не ‘нæниздзинад хъахъхъæныны министрадтæ, базарадон-сæудæджерадон палатæтæ, бангтæ. Абон уыцы сразыдзинад скусдзæн æххæстæй», – загъта Донецкы Адæмон Республикæйы министр.

Министры цæст бауарзта Хуссар Ирыстонæн размæцыд æмæ дидинæфтыдад, республикæйы адæмæн та – амонд æмæ фæрныгад.

Президентимæ официалон фембæлды кæрон РХИ-йы æмæ Донецкы Адæмон Республикæйы Фæсарæйнаг хъуыддæгты министртæ сæ кæрæ-дзимæ радтой ратификацион грамотæтæ.